Rwamagana:Urubyiruko rwasoje amahugurwa ku ikoranabuhanga

Abasore n’inkumi 22 baturutse  mu turere twa Rwamagana na Kayonza Burazirazuba bw’u Rwanda basoje amasomo bari bamazemo amezi atatu bahugurwa mu ikoranabuhanga yaberaga mu kigo cy’ishuri ryisumbuye rya Lycée du Lac Muhazi riri mu Karere ka Rwamagana mu murenge wa Muhazi. Abasoje aya mahugurwa  bavuga ko ubumenyi bungutse bagiye kubishyira mu bikorwa bihangira imirimo nk’urubyiruko rudafite akazi.

Abanyeshuri bahuguwe mu gukoresha ikoranabuhanga
Abanyeshuri bahuguwe mu gukoresha ikoranabuhanga

Aba barangije babiherewe impapuro zemeza ko ibyo bize babimenye kandi ko bashoboye no kubishyira mu bikorwa.

Bamwe muri aba basore n’inkumi twaganiriye batubwiye ko biteguye gushyira mu bikorwa ibyo bakuye muri ASPEJ  kandi bizeye ko bizabafasha kwiteza imbere .

Mukangayisaba Claudine uturuka mu Karere ka Nyarugenge mu mujyi wa Kigali yarangije Kaminuza ariko nawe yaje kwiyungura ubumenyi mu ikoranabuhanga.

Yabwiye Umuseke ko nyuma y’aya masomo agiye guhita yihangira umurimo kuko yari asanzwe ari umushomeri.

Ati: “Nyuma y’aya masomo nkuye aha ngiye kwihangira imirimo nkoresheje ikoranabuhanga banyigishije ndahamya ko bizamfasha kwiteza imbere nikura m’ubushomeri nzasangiza na bagenzi bange ubwenge nkuye hano.”

Umuyobozi w’ishuri rya Lycée du Lac Muhazi(ASPEJ)Murekatete Alphonsine  avuga ko aya masomo y’igihe gito kurubyiruko bayategura bagamije gufasha urubyiruko kubona ubumenyi bubafasha kwihangira imirimo.

Uwari uhagarariye ikigega SDF  Byandaga Livingstone gikorera mu kigo cya WDA gishinzwe guteza imbere imyuga n’ubumenyi ngiro ari nabo bateye inkunga aya masomo y’igihe gito yibukije uru rubyiruko kwegera ikigega SDF kugira ngo barusheho kwihangira imirimo.

Kambanda Alphonse Perezida wa Njyanama mu murenge wa Muhazi  yasabye  rubyiruko gukomera k’ubwenge bakuye aha kugira ngo biteze imbera  n’igihugu cyabo muri rusange.

Aragira ati: “Abantu benshi bagize akamaro ntabwo ari impapuro nkizi muhawe bagiye berekana ahubwo bagiye berekana ibyo bazi, namwe rero nimugende mwerekane ubumenyi bwanyu maze mwiteze imbere mudasize n’igihugu cyacu.”

Abarangije aya masomo y’igihe gito  baragera kuri 25 baturuka mu Ntara y’Uburasirazuba ndetse na bake bo mu mujyi wa Kigali.

 Elia BYUKUSENGE

 UMUSEKE.RW

 

Be the first to comment

Leave a Reply

Your email address will not be published.


*