Bugesera: Hegitare 50 zihinzeho imyaka zarengewe n’amazi

Inkuka yose yarengewe (Photo/Cypridion HABIMANA)

Hegitare zigera kuri 50 zari zihinzeho imyaka y’Abaturage zo mu   gishanga cya Gashora giherereye hagati y’Akarere ka Bugesera n’aka Ngoma mu ntara y’Iburasirazuba, zarengewe n’amazi y’Uruzi rw’Akagera yuzuye kubera imvura irigwa bice bitandukanye by’igihugu bituma uru ruzi rwuzura.

Abahinzi bahinze muri iki gishanga bari bafite imyaka yari yeze, bavuga ko bahuye n’ibihombo bitewe no kuba ibyo bahinze birimo ibishyimbo, soya n’ibigori byarengewe n’amazi, bakaba basaba ubufasha.

Nyiramana Belancilla agira ati «nari nahinze umurima wa metero maganatatu kuri mirongo itanu w’ibishyimbo, none byose byarengewe kandi byari byeze, ukuntu narushye mbihinga none nta na ducye nkuyemo  nta n’ikilo na kimwe nari mfite mu nzu, nibadutabare.»

Iki ni ikibazo cyateye ururondogoro mu bahinzi bose bahinga muri iki gishanga dore ko bitari biherutse.

Umukozi ushinzwe ubuhinzi mu murenge wa Gashora, Rugabire Daniel, avuga ko ubusanzwe abahinzi bitabazaga imifuka n’amabuye kugira ngo bakumire aho amazi yanyuraga ajya mu mirima, none kuri ubu amazi akaba yabirushije imbaraga.

Agira ati «nihabeho umuti urambye, kuko n’ubundi twari dusanzwe twifashisha ibiti, tukanashyira amabuye mu mifuka ngo dukumire amazi, none yabirushije imbaraga.»

Ubwo twavuganaga n’umukozi ushinzwe ubuhinzi mu karere ka Bugesera, Nkinzingabo Jean de Dieu, yadutangarije ko bitabaje  inzobere zo mu kigo cy’igihugu gishinzwe guteza imbere ubuhinzi n’ubworozi mu Rwanda RAB, ishami ryacyo ryo kuvomerera imyaka.

Agira ati «kubera birenze ubushobozi bwacu twitabaje inzobere za RAB, kugira ngo zidufashe kureba uburyo ariya mazi twayakamya abahinzi bakabasha gusarura, ariko izo nzobere nizo ziribumenye niba bishoboka, nibidashoboka turakora ubuvugizi harebwe ubundi bufasha abahinzi bahabwa kuko leta yacu ari Umubyeyi. »

Avuga kandi ko n’ubwo ubu buryo bwashoboka ari ubw’igihe gito, kuko n’ubundi hari gahunda yo gutunganya izi hegitare ni uko bisaba ingengo y’imari nini, maze izi hegitari zikiyongera ku zindi 250 ziri gutunganywa zo zitarengewe.

Iki gishanga cyaherukaga kuzurira ku myaka y’abahinzi mu mwaka wa 2014, kuko ubundi cyari gisanzwe cyuzura mu mpera z’ukwa cumi na kumwe.

Cypridion Habimana

Aha niho amazi arimo kunyura ajya mu mirima (Photo/Cypridion HABIMANA)
Aha niho amazi arimo kunyura ajya mu mirima (Photo/Cypridion HABIMANA)

Be the first to comment

Leave a Reply

Your email address will not be published.


*