Nyanza: Abanyeshuri bafite ubumuga bwo gutumva no kutavuga yegukanye igikombe

Ikipe y'abafite ubumuga bwo kutumva no kutavuga yo mu ishuri ribanza HVP Gatagara yegukanye igikombe mu mukino wa Basketball mu rwego rw'Akarere ka Nyanza.

Ku wa 2 Ukwakira 2016, abanyeshuri bo mu ishuri ribanza rya HVP Gatagara bafite ubumuga bwo kutumva no kutavuga, batsinze abanyeshuri bo mu ishuri ribanza rya Mater dei, mu mukino wa nyuma wo guhatanira igikombe muri Basketball, ku rwego rw’Akarere ka Nyanza.

Iyi  mikino yahuzaga amakipe atandukanye yo mu bigo by’amashuri abanza n’ay’ikiciro rusange byo mu karere ka Nyanza, ikipe y’abafite ubumuga bwo kutumva no kutavuga bo mu kigo cy’amashuri abanza cya HVP Gatagara batsinze amanota 24 kuri 16 ikipe y’ikigo cy’amashuri abanza cya Mater dei  mu mukino wa Basketball.

Muri uyu mukino abantu benshi barimo abarimu n’abanyeshuri bari bafite amatsiko yo kureba uko ikipe y’abatavuga ntibanumve bakina n’abandi badafite ubumuga, maze birangira banatsinze bishimisha cyane abari bategereje uyu mukino n’amatsiko menshi.

Ntwali Jean de Dieu umutoza w’iyi kipe y’abafite ubumuga bwo kutumva no kutavuga, akaba n’umwarimu muri iki kigo cya HVP Gatagara, avuga ko gutoza iyi kipe bimushimisha cyane kuko bafite ubwenge bwo kumva hakoreshejwe amarenga kandi bagafata vuba cyane.

Yagize ati “Abantu benshi ntibiyumvisha ukuntu ntoza iyi kipe ndetse igatsinda kandi abakinnyi batumva ntibanavuge, ariko dukoresha uburyo bw’amarenga kandi bakumva kabanafata vuba cyane ku buryo kubatoza binyorohera. Iyo ikipe yanjye igiye  gukina numva mfite icyizere kuko mba nizeye abakinnyi banjye, nkurikije uko mba nabatoje kandi nabo baba biyizeye kuko baba bakina  ari byo berekejeho umutima, badasakuza ahubwo bakoresha ibimenyetso gusa. Ni na yo mpamvu bashobora gukina n’abandi badafite ubumuga bakabatsinda.”

Ntwali anavuga ko kuba abakinnyi be bahura n’andi makipe y’abadafite ubu bumuga bakabatsinda ngo usanga bitangaza benshi, bakibaza uko babigenza, nyamara ahamya ko abafite ubumuga nk’ubu na bo ari abantu kandi bashoboye nk’abandi bose, nubwo usanga hari bamwe batabasha kubyiyumvisha.

Iyi kipe ni yo yonyine y’abafite ubumuga yabashije kwitabira iyi mikino ndetse ikabasha no kugera ku mukino wa nyuma yari ihanganye n’ikipe y’ikigo cy’amashuri abanza cya Mater dei mu bahungu, na ho iy’abakobwa bafite ubumuga bwo kutumva no kutavuga yo ntiyabashije kugera ku mukino wa nyuma.

Iyi mikino yateguwe n’Akarere ka Nyanza yitabiriwe n’ibigo bitandukanye byo muri aka karere mu mashuri abanza n’ay’icyiciro rusange, mu mikino itandukanye ku bahungu n’abakobwa harimo Basketball, Handball, Volleyball, Football n’amasiganwa yo kwiruka “athletisme”.

Panorama

 

Be the first to comment

Leave a Reply

Your email address will not be published.


*