Cyanika: Abagore bahitamo kwikorera imizigo aho guhinga

Abagore bakora imirimo y’ubwikorezi ku mupaka wa Cyanika uhuza u Rwanda na Uganda, uherereye mu karere ka Burera, bavuga ko akazi ko kwikorera imitwaro bayivana mu Bugande indi mu Rwanda, aka kazi kabarutira kujya mu bihinzi kuko binjiriza amafaranga menshi aruta ayo guhingiriza.

Usengimana Angelique ni umubyeyi w’abana babiri afite w’imyaka 28, ahamya ko akazi k’ubwikorezi kamurutira kujya guhingira amafaranga kuko nta sambu ihagije afite yatunga umuryango we.

Agira ati “Aka kazi nkamazemo imyaka 6  nikorera imizigo nyivana i Bugande nyizana hano mu Rwanda, cyangwa nkayivana mu Rwanda nyijyana i Bugande; ariko amafaranga mbona aruta ayo nakorera nagiye guhingira rubanda, kuko ndambara, mpahira abana bakarya neza kandi bariga bose sindabura amafaranga y’ishuri. Si ibyo gusa kuko ndi no mu kimina ntangamo amafaranga igihumbi ku munsi kandi iyo ntaza muri aka kazi sinari kujya nyabona ya buri munsi.”

Benimana John ni umugabo ufite umugore ukora akazi k’ubwikorezi kuri uyu mupaka wa Cyanika. Na we avuga ko amafaranga umugore we acyura iyo avuye gukora aka kazi k’ubwikorezi, aruta kure ayo we acyura iyo yagiye guhingira abandi.

Agira ati “Umugore wanjye akora akazi ko gutwara imizigo hano ku mupaka, ariko mbona biruta kure guhingiriza kuko nta sambu tugira duhingamo. Nanjye ni ko nakoraga nyuma nza kugira ikibazo cyo kurwara imitsi, ntangira kujya guhingira abandi ariko ayo mpembwa ntaho ahuriye n’ayo nakoreraga mu bwikorezi bw’imizigo.”

Habumuremyi   Evariste, Umuyobozi w’Akarere  ka Burera wungirije ushinzwe iterambere ry’ubukungu, avuga ko abaturage baturiye uyu mupaka wa Cyanika barimo n’abagore bamaze kumenya ko bagomba kuwubyaza umusaruro bakorerayo ibikorwa bibateza imbere.

Ati “Abaturage baturiye uriya mupaka bamaze kubona akamaro ubafitiye, bakorerayo ibikorwa bitandukanye byiganjemo iby’ubucuruzi, byatumye n’abagore baho bahaguruka barakora barimo abacuruzi, amakoperative y’abagore batwara imizigo n’ibindi bikorwa bitandukanye bihakorerwa kandi abahakorera bose bigaragara ko bamaze kugira byinshi bigezaho babikesha guturira umupaka.”

Igiciro cyo kwikorera umutwaro upima ibiro makumyabiri na bitanu (25kg) ni amafaranga Magana abiri y’u Rwanda (200frw). Byaba birenze hakabaho ubwumvikane hagati ya nyir’umutwaro n’umwikorezi.

Mu murenge wa Cyanika, ubusanzwe umukozi ahingira amafaranga 1000 ku mubyizi mu gihe cy’ihinga, na ho mu gihe nta mirimo myinshi y’ubuhinzi  ihari agahembwa amafaranga Magana atandatu y’u Rwanda (600frw) ku mubyizi bitewe n’imbaraga umuntu afite kuko hari n’abahembwa munsi yayo, iyo bagaragara nk’abanyantege nke, akaba ari na yo mpamvu bahitamo kujya kwikorera imitwaro, nk’uko twabitangarijwe n’abaturage bo muri uyu murenge.

Nziza Paccy

Be the first to comment

Leave a Reply

Your email address will not be published.


*