Umugororwa wo muri gereza ya Huye yemeza ko gereza ari ishuri

Dadi Rwabireka ufungiye muri gereza ya Huye, amazemo imyaka 19.

Dadi Rwabireka ufungiye muri gereza ya Huye yemeza ko gereza ari ishuri. Rwabireka umaze imyaka 19 muri gereza afungwa nta mwuga yari azi gukora ariko aho aziye muri gereza yize umwuga ujyanye n’ubugeni ku buryo narangiza igihano cye uzamufasha kwiteza imbere ari nako ateza imbere igihugu.

Dadi Rwabireka avuga ko yishimira imyuga yigiye muri gereza cyane cyane uw’ubugeni. Agira ati “Naje hano muri gereza ntazi gukora ibi bintu ariko narabikunze kuko nize ubugeni harimo gushushanya, niga scripture, niga peinture noneho ndangiza njya mu bikorwa ndakora ku buryo ibyo nkora bijya ku isoko ku buryo nindangiza igihano cyanjye ibi bikorwa nzabikomeza, kuko namenye uburyo bikorwa , uko bicuruzwa kugirango nigera hanze bizanyunge n’umuryango wanjye ndetse n’igihgu muri rusange.”

Ku bwa Rwabireka, ngo ni ubwo ari muri gereza arimo kurangiza igihano yakatiwe n’urukiko, ngo yasanze gereza ari ishuri kuko bakosorwa ari nako banigishwa ubumenyi butandukanye

Uretse umwuga w’ubugeni, umugororwa uri muri gereza ya Huye ushaka kwiga ahabwa amahirwe yo guhitamo no yindi myuga nk’ubwubatsi, ububaji, ubudozi, gusudira, gukora amasabune, ubukanishi, ubuhinzi ndetse n’ijyanye n’ubugeni. Abagororwa iyo bageze muri gereza bigishwa kandi gahunda zitandukanye harimo n’iz’uburere mboneragihugu, izo kurwanya ibyaha n’ibyagitera byose ndetse n’amasomo yo gusoma no kwandika ,indimi kugeza no ku mashuri yisumbuye kubayacikishirije.

Komiseri Mukuru Wungirije wa RCS DCGP Jeanne Chantal Ujeneza  asobanura kuri iyi gahunda yo kugorora yavuze ko Leta y’u Rwanda iha agaciro imfungwa n’abagororwa. Agira ati “Ni icyemezo cya leta y’u Rwanda ku buryo aho baba bahaba neza mu cyubahiro cyabo kuko twemera ko iyo umuntu yakosheje aba yatandukiriye imyitwarire y’umuntu muzima mu gihugu kigendera ku mategeko ariko nyuma iyo yagagarijwe ko yakoshejwe, agahanwa n’amategeko mu buryo bwemewe icyiba gisigaye ni ukumugorora ku buryo azasohoka yasubiye mu nzira nziza yabaye umunyarwanda muzima ugomba gufatanya n’abandi kubaka igihugu.”

Kugeza ubu gereza ya Huye icumbikiye imfungwa n’abagororwa 9,216 bose b’igitsina gabo kuko abagore bari bahafungiye bimuriwe muri gereza ya Nyamagabe yashyiriweho kwakira abagore gusa.

Safari Placide

Bimwe mu bikoresho bikorerwa muri Gereza ya Huye
Bimwe mu bikoresho bikorerwa muri Gereza ya Huye
Amwe mu mashusho y'ubugenzi akorerwa muri Gereza ya Huye.
Amwe mu mashusho y’ubugenzi akorerwa muri Gereza ya Huye.

Be the first to comment

Leave a Reply

Your email address will not be published.


*