Intambara nshya iratutumba muri Congo Kinshasa

Ingabo za Congo (FARDC) ziteguye guhangana n'abarwanyi ba M23, zatangiye kongera abasirikare mu bice bya Goma. (Photo/Monusco)

Amakuru akomeje gukwirakwira avuga ko abahoze ari abarwanyi ba M23 bari barahungiye muri Uganda bagiye kubura imirwano, na ho ingabo za Repubulika Iharanira Demokarasi ya Congo na zo zikaba zatangiye kwitegura guhangana n’icyo gitero.

Nk’uko byatangajwe na Guverineri w’Intara ya Kivu y’Amajyaruguru, Julien Paluku, ku wa 15 Mutarama 2017, uwahoze ayoboye inyeshyamba za M23, Sultan Makenga n’abandi basirikare bakuru, ku nshuro ya kabiri, bongeye gutoroka aho bari bacumbikiwe muri Uganda, berekeza Bunagana ku mupaka ugabanya icyo gihugu na Congo muri Kilometero 70 uvuye i Goma.

Amakuru dukesha radiookapi.net, avuga ko Paluku yemeza ko Makenga n’abarwanyi ba M23 bose bari muri Uganda bamaze kwerekeza ku butanka bwa Congo bagabye igitero gishya.

Ingabo za Congo ziteguye intambara

Nk’uko Radio Okapi ikomeza ibitangaza, Umuvugizi wa Guverinoma ya Congo, Lambert Mende, yatangaje ko abarwanyi ba M23 binjiye ku butaka bwa Congo bambukiye Ishasha, ndetse bamwe bafatwa n’inzego z’umutekano abandi barahangana.

Mende yagize ati «Ubwo bambukaga umupaka banyuze Ishasha, bafashwe n’ingabo z’igihugu n’umutekano. Bamwe muri bo bafashwe abandi bakomeza guhangana, ingabo zirakomeza gukora akazi kazo uko bigombye.»

 Avuga kandi ko batazihanganira ko abo bahoze ari abarwanyi ba M23 bazakomeza guhungabanya umutekano w’abaturage n’igihugu cya Congo. Mu rwego rwa dipolomasi avuga ko bategereje icyo Uganda ibivugaho kuko abo barwanyi ariho bari barahungiye.

Ushinzwe itumanaho mu karere ka 34 ka gisirikare, Maj. Guillaume Djike Kaiko, avuga ko icyo gitero cyanyuze mu duce twa Bunagana na Ishasha, ariko ingabo ziteguye gufunga imihanda yose, asaba abaturage gutuza.

Abarwanyi ba M23 batangiye imirwano hagati muri Mata 2012, ariko muri Gicurasi ni bwo imirwano yatangiye ku mugaragaro. Iryo zina rikomoka ku masezerano y’amahoro yashyizweho umukono ku wa 23 Werurwe 2009 (23 Mars 2009 ‘M23’) hagati ya guverinoma ya Repubulika Iharanira Demokarasi ya Congo n’ingabo za CNDP inyeshyamba zari ziyobowe na Laurent Nkunda.

Mu mezi atanu yonyine, inyeshyamba za M23 zari zimaze kwigarurira tumwe mu duce twa Kivu y’Amajyaruguru ahahereye Kiwanja-Ishasha muri Rutshuru. Mu kwezi k’Ugushyingo 2012, inyeshyamba za Sulutani Makenga zafashe Umujyi wa Goma, ari na wo murwa mukuru w’Intara ya Kivu y’Amajyaruguru.

Nyuma yo gufata uwo mujyi, M23 yatangiye imishyikirano na Leta ya Congo i Kampala, ariko ntacyo yagezeho kuko mu kwezi k’Ukuboza imirwano yongeye kubura. Ku wa 25 Ukwakira 2013, ingabo za Congo zagabye igitero gikomeye cy’iminsi itanu ku barwanyi ba M23 bahereye Kibumba, kuri Kilometero 30 uvuye i Goma.

Icyo gitero cyagabwe na nyakwigendera Col. Mamadou Ndala, atewe inkunga n’ingabo za MONUSCO, biturutse ku mwanzuro w’akanama gashinzwe umutekano ka Loni, wo ku wa Kane tariki ya 28 Werurwe 2013, hagamijwe kurwanya imitwe yitwaje intwaro ikorera mu burasirazuba bwa Repubulika Iharanira Demokarasi ya Congo.

Inyeshyamba za M23 zimaze gutsindwa, bamwe mu basirikare bakuru bazo bashatse ubuhungiro mu bihugu bihana imbibi na Congo, Sulutani Makenga, ushinjwa na Guverineri Julien Paluku kongera gutegura inyeshyamba we aba mu buhungiro muri Uganda kuva mu kwezi k’Ugushyingo 2013.

Panorama

Be the first to comment

Leave a Reply

Your email address will not be published.


*