Abarwanyi basaga 30 ba M23 bageze ku butaka bw’u Rwanda (Yavuguruwe)

Abarwanyi 35 ba M23 bahungiye mu Rwanda bategereje ubufasha. (Photo/Kigalitoday)

Mu rukerera rwo ku cyumweru tariki ya 29 Mutarama 2017, abarwanyi bivugwa ko ari aba M23 batangiye gusesekara ku butaka bw’u Rwanda bahunga ingabo za Congo.

Nk’uko tubikesha itangazo ryatanzwe n’Umuvugizi w’agateganyo w’igisirikare cy’u Rwanda, Lt Col René Ngendahimana, abo barwanyi bambukiye ku mupaka ugabanya u Rwanda na Repubulika Iharanira demokarasi ya Congo batungukira mu murenge wa Bugeshi, mu karere ka Rubavu. Kugeza ahagana saa kumi n’imwe z’umugoroba abagera kuri 30 bari bamaze kubarurwa ku butaka bw’u Rwanda.

Amakuru igisirikare cy’u Rwanda cyatangaje ni uko abo barwanyi bavuga ko bahunze ibikorwa by’imirwano by’ingabo za Congo (FARDC)

Abo barwanyi bakiriwe n’Umuryango Mpuzamahanga utabara imbabare (ICRC), abari bakeneye ubuvuzi baravurwa hakurikijwe amahame mpuzamahanga agenga uburenganzira bwa muntu.

Amakuru dukesha kigalitoday.com avuga ko abo barwanyi bagera kuri 35, batangiye kwitabwaho no guhabwa ubufasha.

Guverineri w’Intara ya Kivu y’Amajyaruguru, Julien Paluku, ku wa 15 Mutarama 2017, uwahoze ayoboye inyeshyamba za M23, Sultan Makenga n’abandi basirikare bakuru, ku nshuro ya kabiri, bongeye gutoroka aho bari bacumbikiwe muri Uganda, berekeza Bunagana ku mupaka ugabanya icyo gihugu na Congo muri Kilometero 70 uvuye i Goma.

Ushinzwe itumanaho mu karere ka 34 ka gisirikare, Maj. Guillaume Djike Kaiko, yatangaje ko icyo gitero cyanyuze mu duce twa Bunagana na Ishasha, ariko ingabo ziteguye gufunga imihanda yose, asaba abaturage gutuza.

Abarwanyi ba M23 batangiye imirwano hagati muri Mata 2012, ariko muri Gicurasi ni bwo imirwano yatangiye ku mugaragaro. Iryo zina rikomoka ku masezerano y’amahoro yashyizweho umukono ku wa 23 Werurwe 2009 (23 Mars 2009 ‘M23’) hagati ya guverinoma ya Repubulika Iharanira Demokarasi ya Congo n’ingabo za CNDP inyeshyamba zari ziyobowe na Laurent Nkunda.

Mu mezi atanu yonyine, inyeshyamba za M23 zari zimaze kwigarurira tumwe mu duce twa Kivu y’Amajyaruguru ahahereye Kiwanja-Ishasha muri Rutshuru. Mu kwezi k’Ugushyingo 2012, inyeshyamba za Sulutani Makenga zafashe Umujyi wa Goma, ari na wo murwa mukuru w’Intara ya Kivu y’Amajyaruguru.

Nyuma yo gufata uwo mujyi, M23 yatangiye imishyikirano na Leta ya Congo i Kampala, ariko ntacyo yagezeho kuko mu kwezi k’Ukuboza imirwano yongeye kubura. Ku wa 25 Ukwakira 2013, ingabo za Congo zagabye igitero gikomeye cy’iminsi itanu ku barwanyi ba M23 bahereye Kibumba, kuri Kilometero 30 uvuye i Goma.

Icyo gitero cyagabwe na nyakwigendera Col. Mamadou Ndala, atewe inkunga n’ingabo za MONUSCO, biturutse ku mwanzuro w’akanama gashinzwe umutekano ka Loni, wo ku wa Kane tariki ya 28 Werurwe 2013, hagamijwe kurwanya imitwe yitwaje intwaro ikorera mu burasirazuba bwa Repubulika Iharanira Demokarasi ya Congo.

Inyeshyamba za M23 zimaze gutsindwa, bamwe mu basirikare bakuru bazo bashatse ubuhungiro mu bihugu bihana imbibi na Congo, birimo u Rwanda na Uganda. Aba barwanyi ba M23 bahungiye mu Rwanda baje basanga abandi bahageze mu kwezi k’Ugushyingo 2013.

Panorama

Be the first to comment

Leave a Reply

Your email address will not be published.


*