Abashakanye n’abamugariye ku rugamba mu kwishakamo ibisubizo

Bamwe mu banyamuryango b'ishyirahamwe Benurugo ry'abashakanye n'abagabo bamugariye ku rugamba (photo/Panorama)

“Ni ibyishimo kubana n’uwo mwashakanye mwembi mufatanya gushaka icyabateze imbere, ariko nanone ntibyoroshye kubyakira, kumva inkuru y’incamugongo ko uwawe yahuye n’ubumuga. Ni urugamba rutoroshye ariko kubyakira bigufasha kwiyubaka no guharanira icyabateza imbere.”

“Uwawe ntiyabaho nabi uhari ngo umutererane, guhitamo kwigomwa ibindi byose ukamwitangira birushaho kumurema kandi mugafatanya gutekereza icyabateza imbere n’ubwo we aba adafite imbaraga zo kubishyira mu bikorwa.”

Umugudugu wa Nyarugunga, mu murenge wa Kanombe, akarere ka Kicukiro, utuwemo n’imiryango y’abamugariye ku rugamba rwo kubohora igihugu. Bose bubakiwe amacumbi babanamo n’imiryango yabo.

Uretse amafaranga y’ingoboka bahabwa na Komisiyo y’igihugu ishinzwe gusezerera no gusubiza mu buzima busanzwe abari abasirikare, abo bashakanye bakora ubushabitsi bunyuranye kugira ngo bubabere inyunganizi mu mibereho y’imiryango yabo.

Kugira ngo bashobore kubona igisubizo kirambye, abashakanye n’abamugariye ku rugamba, bashinze koperative bise “Benurugo” ikora ubucuruzi bw’amakara. Buri wese yigomwa 5000Frw nk’umugabaneshingiro, maze bishyirahamwe ari 25 bahuje ibibazo byatumye bahuza intego n’intumbero.

Ubuhamya

Gahongayire Paruth, atuye mu mugudugudu wa Kibaya, Akagari ka Kamashashi, Umurenge wa Nyarugunga. Umugabo we yamugariye ku rugamba rwo kubohora igihugu, ntiyigeze yinubira kubana na we ahubwo yarabyakiriye n’ubwo bitamuhiriye ngo bakomeze babane nyuma akaza kwitaba Imana kubera uburwayi.

“Ubuzima bwari bugoranye cyane kubana n’umutware umufasha buri kimwe cyose kandi hari n’ibindi bigukeneye. Ubuzima bwarangoye ariko ngeze aho ndabyakira icyakora binsaba ko imbaraga nkoresha nzikuba kabiri. Uba ugomba kumufasha kugira ngo atagira agahinda, atiheba kandi mugire n’imibereho y’urugo.”

“Ubwonko aba ari buzima mufatanya gutekereza, hanyuma akaba ari wowe ushyira mu bikorwa ibyo mwatekereje. Inkunga y’ingoboka ihabwa abamugariye ku rugamba irafasha ariko ntihagije kuko hari byinshi urugo ruba rukeneye.”

Mugabe Joyce, atuye mu mudugudu w’abamugariye ku rugamba. Yahisemo kureka ubundi buzima yita kuri musaza we wamugariye ku rugamba kuko umugore yari yarashatse yabonye umugabo agize ubumuga aramuta. Yahisemo kudatererana musaza we, yiyemeza kumwitaho muri ubwo buzima bukomeye yari yinjiyemo.

“Ni urugendo rukomeye, ni urugendo rutoroshye. Musaza wanjye ntiyari kumara kugira ubumuga ngo mutererane. Nahisemo kumufasha dore ko n’umugore we yari amusize wenyine. Nakiriye ubwo buzima, ndamukurikirana kandi mwitaho hamwe n’umwana we umugore yamusigiye hamwe n’uwanjye.”

Nzamurambaho Marie Claire, yashakanye n’uwamugariye ku rugamba bamaranye imyaka itatu. Avuga ko yakiriye neza umugabo we ubwo yajyaga kumurambagiza, bahuza umutima.

“Aza kundambagiza sinitaye ku bumuga afite kuko umuntu ni mu mutwe, hari igihe ibyifuzo byanjye byahuye n’ibye. Nabitekerejeho, nsanga inama yahaga abandi ndetse n’ibikorwa agira bimpa imbaraga zo kubana na we. Kubana na we byatumye mfunguka ubwonko, iyo ampaye inama ndazikoresha, sininuba.”

Kwishakamo ibisubizo

Ikibazo cyo guhora uteze amaboko ushaka umwenda rimwe na rimwe ntuwuhabwe, cyari cyugarije imiryango y’abamugariye ku rugamba. Mu rwego rwo gushaka igisubizo cy’ibibazo iyo miryango isangiye, abagore babo bishyize hamwe mu kwezi kwa Gicurasi 2016, bashinga Koperative Benurugo ikora ubucuruzi bw’amakara. Bishimira ko hari byinshi yabafashije byari bibakomereye, n’ubwo itaratera imbere cyane. Koperative yatangiriye ku mifuka icyenda (9) y’amakara ariko ubu igeze ku bushobozi bwo kwigurira imifuka 35. Biyubakiye ububiko bw’amakara, amafaranga bakoresha mu gucuruza ni 200,000 na ho andi 150,000 ari kuri konti mu murenge SACCO.

“Mu gushaka igisubizo cy’ibibazo dusangiye twicaye hamwe dutekereza icyo twakora, duteranya buri umwe amafaranga 5000, tugera ku bihumbi 105,000. Igitekerezo twakigejeje kuri Komisiyo y’igihugu ishinzwe gusezerera no gusubiza mu buzima busanzwe abari abasirikare, icyakira neza, idutera inkunga.” Gahongayire Peruth, Umuyobozi wa Koperative Benurugo.

“Twaricaye tubiganiraho dusanga hari byinshi dusabwa kugira ngo turusheho kwita ku bo twashakanye ndetse n’imiryango yacu. Duhuje ibibazo, umugore wese w’uwamugariye ku rugamba byaramurebaga, dutangira turi 21. Ubu dufite aho tugeze, ntacyo umuntu akenera ngo akibure ndetse n’abaturanyi bacu babona amakara ku buryo bworoshye.”

Mugabe Joyce, avuga ko we na bagenzi be banze guheranwa n’agahinda bafata icyemezo cyo kwishakamo ibisubizo, aherano anashima ibyiza byo kwisanga hamwe n’abandi muri Koperative.

“Ubuzima ntibwari bworoshye, hanyuma njye na bagenzi banjye dutekereza gushinga Koperative ngo umusaruro uvuyemo wunganire inkunga y’ingoboka abamugariye ku rugamba bahabwa.”

“Kuba muri koperative byamvanye mu bwigunge kuko numvaga nihebye kandi ubukene bunyugarije. Iyo wicaranye n’abandi muterana inkunga mukungurana inama kandi maze guhinduka cyane kuko duhumurizanya ntiduheranwe n’ubuzima kandi twizera gutera imbere.”

Nzamurambaho Marie Claire, ashima ko koperative yamufashije kwiyubaka no kwaguka mu mitekerereze ndetse no kurushaho kwisanga mu bandi.

“Kujya muri koperative byatumye niyubaka kuko nta mpungenge ngira zo kubura amakara yo gucana kuko iyo ntafite amafaranga bayampa. Turasabana, twungurana ibitekerezo ubabaye nawe tukamufasha kuva mu bwigunge, tugahuza ibitekerezo ndetse no kwaguka mu mitekerereze. Ibyo dukora byunganira inkunga y’ingoboka duhabwa. Kuva twinjiye muri koperative ubwonko bwararuhutse ntabyo tugikora bitugoye.”

Abanyamuryango ba Koperative Benurugo bafite icyerekezo cyo kwagura Koperative yabo bagacuruza amata yunganira amakara kugira ngo batere imbere kurushaho. Bagira inama abagore bashakanye n’abagabo bafite ubumuga kutabatererana, bakumva ko kugira ubumuga bw’umubiri atari ukumugara umutwe, bakwiye kubumva, bakajya inama y’icyabateza imbere.

Ibikorwa by’iyi Koperative, aba bagore babifatanya n’ibindi bitoroshye byo kwita ku miryango yabo, kuko baba bagomba kurihira amashuri abana, gushaka ubwisungane mu kwivuza kuko Komisiyo yishyurira abamugariye ku rugamba gusa, hakiyongeraho no gushaka ibitunga urugo. Ibitekerezo n’icyerekezo byabo bibonye inkunga, gutera imbere kuri bo byaba byoroshye cyane, kuko n’ubundi bahereye kuri duke bakaba bamaze gutera intembwe.

Panorama

Ibikorwa byose barabifatanya. Ukeneye amakara ntibagombera gushaka umukozi. (Photo/Panorama)
Ibikorwa byose barabifatanya. Ukeneye amakara ntibagombera gushaka umukozi. (Photo/Panorama)
Ahabikwa amakara (Photo/Panorama)
Ahabikwa amakara (Photo/Panorama)
Inzu biyubakiye ibikwamo amakara (Photo/Panorama)
Inzu biyubakiye ibikwamo amakara (Photo/Panorama)

Be the first to comment

Leave a Reply

Your email address will not be published.


*