“Ntituzahwema kubungabunga ubuzima bw’Abanyarwanda” Dr Diane Gashumba

Minisitiri w'Ubuzima, Dr Diane Gashumba (Photo/Archives)

Ibi ni bimwe mu magambo yavuzwe na Minisitiri w’Ubuzima, Dr Diane Gashumba, mu muhango wo kwizihiza isabukuru y’imyaka icumi umuryango uharanira kurwanya icyorezo AHF umaze utangiye, mu gikorwa cyabaye ku wa   17 Werurwe 2017.

Minisitiri Gashumba yashimiye cyane ibikorwa by’uyu muryango mu gushishikariza abanyarwanda kwirinda ubwandu bwa virusi itera SIDA, hakoreshwa agakingirizo n’uburyo uyu muryango wita ku babana n’ubwo bwandu.

Ati “Nishimiye cyane kuba uyu muryango wujuje imyaka icumi ukora ibikorwa byiza byo kurwanya SIDA, ukora ibishoboka byose ngo abantu barusheho kumenya ububi bwayo, wita ku bamaze kwandura, ukababa hafi mu buzima bwabo bwa buri munsi ari na byo bituma babasha gukomeza kubaho nk’abandi bantu bose.

Igikorwa cyo gutanga udukingirizo ku buntu no gukangurira abantu bose kudukoresha na byo ni ikintu gikomeye uyu muryango wagezeho, kuko abenshi bamaze kubyumva, n’ubwandu bushya bwaragabanutse bigaragara.”

Minisitiri Gashumba yakomeje atangaza ko Minisiteri y’Ubuzima ndetse n’Ikigo cyita ku buzima (RBC), bazakomeza gufatanya nk’uko basanzwe babikora kugira ngo barusheho guhashya iyi ndwara no gukomeza kubungabunga ubuzima bw’abamaze kwandura.

Ati “Ntituzahwema gufatanya mu kubungabunga ubuzima bw’abanyarwanda.”

Muri uyu muhango kandi hamuritswe bimwe mu bikorwa by’ingenzi uyu muryango wagezeho muri iyi myaka icumi umaze ubayeho nk’uko Dr Brenda Asiimwe Kateera, Umuyobozi wa AHF Rwanda abisobanura.

“Muri iyi myaka icumi ishize hari byinshi twagezeho dufatanije n’abandi bafatanyabikorwa birimo nko gukurikirana ababyeyi batwite bafite ubwandu, bakabyara abana bazima, gukurikirana ubuzima bw’abantu bose banduye bakoroherezwa uburyo bwo gufata imiti, gutanga udukingirizo ku buntu, gupima ubwandu bwa virusi itera SIDA ku buntu, gushakira akazi kuri bamwe mu banyamuryango ba AHF no kubaha ibikoresho, no guca burundu akato gahabwa ababana n’ubwandu.”

Uyu muryango watangiye ibikorwa byawo mu mwaka wa 2006 ufasha bamwe mu bari bafite ubwandu bw’agakoko gatera SIDA, ugenda wagura ibikorwa byawo kugeza ubwo utangira no gutanga udukingirizo ku buntu no kudushyira ahantu hahurira abantu benshi.

Ibi bikaba ari kimwe mu byarafashije mu kugabanya umubare w’ubwandu bushya bwa virusi itera SIDA, uva kuri 50% mu mwaka wa 1994 ugera kuri 3% mu mwaka wa 2016, nk’uko ubushakashatsi bubigaragaza; ndetse kuri ubu hakaba hari  n’intego y’uko ubwandu bushya bugomba gucika burundu bugasigara kuri 0% binyuze mu bukangurambaga bukorwa n’imiryango yose ifite kurwanya SIDA mu nshingano zayo.

Pascasie Mukanziza

Dr Brenda Asiimwe Kateera, Umuyobozi wa AHF Rwanda (Photo/Panorama)
Dr Brenda Asiimwe Kateera, Umuyobozi wa AHF Rwanda (Photo/Panorama)
Bamwe mu bitabiriye isabukuru y'imyaka 10 ya AHF ikorera mu Rwanda (Photo/Panorama)
Bamwe mu bitabiriye isabukuru y’imyaka 10 ya AHF ikorera mu Rwanda (Photo/Panorama)

 

Be the first to comment

Leave a Reply

Your email address will not be published.


*