Mushishiro: Abaturage barifuza impinduka mu guhabwa Mituweli

Ubwisungane mu kwivuza (Mutuelle de Santé), ni imwe mu ntambwe zigize inkingi y’imibereho myiza y’abaturage,  mu ngamba za Guverinoma z’imyaka irindwi yagiriye umumaro Abanyarwanda batabashaga kwivuza ku bw’ikiguzi cy’ubuvuzi kitoroheye benshi.

Bamwe mu baturage batuye mu karere ka Muhanga mu Ntara y’Amajyepfo, bagaragaza ibyiza ubu bwisungane mu kwivuza bwabagejejeho ariko bagasaba ko habaho impinduka mu kunoza iyi gahunda.

Nyiramana Clémentine, ni umupfazi w’abana batanu yasigiwe n’umugabo. Agira ati ʺIkintu cya mbere igufasha ntabwo urembera mu rugo kuko, wivuriza ku gihe hatabayeho gutegereza ngo nzabona amafaranga ryari? Ubu abantu benshi bitabira kuyitanga kuko bamaze kumenya akamaro kayo, turi mu rugo turi batanu kandi twese turazifite”.

Abaturage bagaragaza ko hakiri imbogamizi mu guhabwa ubwisungane mu kwivuza nko kuba badashobora gutererwa kashi/ikirango ku makarita yabo ya mituweli ngo batangire kuyivurizaho mu gihe hari umwe mu bagize umuryango udahari.

Nyiransanzumuhire Vestine, umuturage wo mu murenge wa Mushishiro, agira ati ʺNk’ubu sindateza kashi kandi naratanze mituweli umwaka ushize mu kwezi kwa munani, baransaba umugereka. Umugabo wanjye ntawe uhari sinzi iyo aba, natanze mituweli yanjye n’abana.”

Yemeza ko yagiye guteza kashi agasanga zitasohotse kuko  atamutangiye umusanzu, bityo bamusaba umugereka kandi avuga ko atawuzi ndetse ngo  ntazi uko bawuzuza.

Akomeza avuga ko bagerwaho n’ingaruka zo kurwara ntibivuze kubera ko batunze mituweli zidateye kashi, kandi barazishyuye n’amazina bakayashyiraho.

Uyu mubyeyi asanga bakwiye gusuzuma  bakamenya ko umuntu atakibarizwa  mu mudugudu, abasigaye  bagatererwa kashi bakabona uburyo bwo kwivuza. Ati “Ubu se umwana aramutse arwaye  ntwabwo yampfana?”

Biziyaremye Théogѐne, umwe mu bajyanama b’ubuzima mu murenge wa Mushishiro mu karere ka Muhanga, avuga ko Mituweli yumvikanye ngo n’ubwo bamwe mu baturage bakigongwa n’imbogamizi z’ubukene na serivisi zitihuta mu kubona imisanzu y’ubwisungane mu kwivuza.

Ati “Dukurikije ibiciro, imiti irahenze ku buryo bitakorohera buri wese kuyigurira ariko iyo duteranije uruhare rwa buri muntu biratworohera kwivuza, gusa Mituweli yagize icyo itumarira ntawe ugipfa kurembera mu rugo kubera uko kwisungana.”

Avuga ko  Mituweli yarumvikanye usibye gusa bamwe mu baturage bashaka kwinangira.

Ati ʺUbundi Mituweli irasobanutse, n’abakene nyakujya baracyahari, ntabwo abantu bose ari ko bafite ubushobozi bwo kuzigura kuko n’ibyiciro by’ubudehe hari igihe usanga barabashyize mu bitabakwiriye ariko ntibibabuza kuzishyura.”

Ku kibazo cyo kuba imwe mu miryango itemererwa gutererwa ikirango/kashi ku makarita y’ubwisungane mu kwivuza ngo ari na byo bidindiza abatanze Mituweli kwivuza, Biziyaremye avuga ko ngo kenshi biterwa no kuba urubyiruko ruva mu byaro rukigira mu mijyi nka Kigali abasigaye ntibashobore guhabwa Mituweli wa wundi atabonetse.

Ngo nubwo kandi hari amahirwe agenerwa abacikanywe na mituweli kubera impamvu zakomojweho zirimo ibyiciro by’ubudehe no kutaboneka k’umwe mu muryango, ngo hari amahirwe y’umugereka yongerwaho abacikanywe binyuze mu nzego z’ibanze.

Biziyaremye ati “Kuko ari ubuyobozi bw’inzego z’ibanze ziwuteraho umukono, akenshi uragenda ugasanga abayobozi badahari, na byo ntabwo byihuta.”

Umuyobozi w’akarere ka Muhanga Uwamariya Béatrice asobanura ko Mituweli yubatse mu buryo bw’urugo, ati  “Turamutse tuvuze ngo umuntu atange ku giti cye byaba ikibazo, ibi bitandukanye n’igihe cya kera aho umuntu yahitagamo kubanza kurihira umugore cyangwa abana gusa.”

Asobanura ko hari amabwiriza mashya ya Minisiteri y’Ubutegetsi bw’Igihugu akuraho inzitizi zo kuba umwe mu muryango adahari bikaba intandaro yo kwima abahari mituweli.

Ati “Niba hari umuntu udahari mu muryango, ubuyobozi bw’ibanze burabigaragaza, abishyuye bagashyirwa ku mugereka.”

Akarere ka Muhanga kageze kuri 76% mu itangwa ry’ubwisungane mu kwivuza mu mwaka wa 2016-2017.

Uwamariya yaboneyeho umwanya wo gushishikariza abaturage gutangira kwishyura imisanzu ya Mituweli y’umwaka utaha wa 2017-2018, akabizeza ko bahita batererwa kashi mu gihe barangije kwishyura, nk’uko byemejwe n’ikigo cy’igihugu cy’ubwiteganyirize (RSSB).

Hakizimana Elias

Nyiransanzumuhire Vestine, umuturage wo mu murenge wa Mushishiro asobanura ko kubona mituweli bitinda. (Photo/Elias H.)
Nyiransanzumuhire Vestine, umuturage wo mu murenge wa Mushishiro asobanura ko kubona mituweli bitinda. (Photo/Elias H.)
Nyiramana Clementine agura mituweli kuko yamenye akamaro kayo. Elias.H
Nyiramana Clementine agura mituweli kuko yamenye akamaro kayo. (Photo/Elias H.)
Biziyaremye Théogѐne, umwe mu bajyanama b’ubuzima mu Murenge wa Mushishiro mu Karere ka Muhanga. Avuga ko Mituweli yumvikanye (Photo/Elias H.)
Biziyaremye Théogene, umwe mu bajyanama b’ubuzima mu Murenge wa Mushishiro mu Karere ka Muhanga. Avuga ko Mituweli yumvikanye (Photo/Elias H.)

 

 

Be the first to comment

Leave a Reply

Your email address will not be published.


*