Ngoma: Abanyonzi biyemeje guca ukubiri n’ibiyobyabwenge

Abanyonzi bakorera mu Mirenge ya Sake na Rukumberi mu Karere ka Ngoma, mu Ntara y’Iburasirazuba, bagaragaje ko batazihanganira umuntu uzagaragaraho gukoresha ibiyobyabwenge kabone n’iyo yaba mugenzi wabo.

Ibi babitangaje ku wa mbere tariki  ya 24 Mata 2017 i Sake aho bari mu biganiro bigamije kurebera hamwe  imyitwarire nyayo ikwiye kuranga umunyonzi. Muri ibi biganiro byahuje abayobozi  n’abatwara abagenzi ku igare bazwi ku izina ry’abanyonzi, basabwe  kwirinda gutwara abacuruza ibiyobyabwenge kandi bagomba gutanga amakuru  ku gihe ku baba babicuruza dore ko akenshi abanyonzi ari bamwe mu  batungwa agatoki ku kuba batwara abagenzi  batwaye ibiyobyabwenge.

Ibi biganiro bishojwe bamwe mu banyonzi batangarije ikinyamakuru Panorama.rw ko bahavuye bafashe ingamba zikomeye zo kwirinda gukoresha ibiyobyabwenge no kwitwara neza muri rusange .

Nizeyimana Claude umunyonzi ukorera muri Sake yavuze ko kwirinda ibiyobyabwenge yari asanzwe azi ko ari bibi ariko ko  guhera ubu agiye kubigira umuhigo. Yagize ati “Nshimishijwe no kuba naje muri ibi biganiro ndajya kubwira bagenzi banjye ko dukwiye gushyira hamwe mu gukumira no kurwanya ikoreshwa ry’ibiyobyabwenge cyane mu rubyiruko.”

Uwimana Pierre ni Perezida  wa Koperative y’abanyonzi ba Rukumberi we  yavuze ko nka Koperative bashyizeho ibihano ku munyonzi wafatirwa mu cyaha gifitanye isano n’ibiyobyabwenge. Yagize ati “Twe dusangazwe twarafashe icyemezo ko umunyonzi wo muri koperative yacu uzafatirwa muri icyo cyaha uretse gukurikiranwa n’ubutabera natwe tumusaba amande no gusaba imbabazi mu ruhame imbere y’inteko rusange abanyamuryango bose bateranye mbere yo gusubira mu kazi.”

Ndayambaje Emmanuel Umunyamabanga Nshingwabikorwa w’Umurenge wa Rukumberi we atangaza ko  kuri ubu abanyonzi ari bamwe mu bafatanyabikorwa mu gukumira no kurwanya ibiyobyabwenge  akaba anizera ko bazakomeza ubu bufatanye. Yagize  ati “Buri wa mbere tugirana inama n’abanyonzi ku buryo bimwe mu byo tubashishikariza harimo  kugira ubushishozi mu kazi kabo  no kumenya amakuru y’abagenzi batwara kugira ngo umunsi umwe umunyonzi atazatwara umuntu ufite kanyanga ntabimenye kandi afashwe byamugiraho ingaruka.”

Bizumuremyi Jean Damascene umwe mu bayobozi baganiriye n’aba banyonzi, yabashimiye uruhare rwabo mu kwiteza imbere no guteza imbere igihugu barwanya ibiyobyabwenge kubera ko uretse kuyobya ubwenge bituma ubikoresha asaza imburagihe.Yagize  ati “Iyo tubasaba kugendera kure ibiyobyabwenge ni uko tuzi neza ingaruka mbi bigira ku buzima bw’umuntu, aho umusore ungana namwe iyo akoresheje ibiyobyambwenge usanga asa n’umusaza rukukuri.”

Ku birebana n’ibindi bibazo by’imyitwarire byaganiriweho, abanyonzi bavuze ku birebana no kuzirikana kugira isuku, kwirinda ibihuha, guhanira gukorera hamwe no kumenya kuzigama. Ikindi ni ukwirinda  ibibazo bikomeye bikunze  kuvugwa mu ma Koperative y’abanyonzi birimo nk’imicungire idahwitse y’umutungo.

Koperative Duterimbere Banyamuryango Rukumberi y’abanyonzi ba Rukumberi (CODBR) yabonye ubuzimagatozi mu mwaka wa 2008. Kuri ubu ifite abanyamuryango 48.

Nkurunziza  Theoneste

1 Comment on Ngoma: Abanyonzi biyemeje guca ukubiri n’ibiyobyabwenge

Leave a Reply

Your email address will not be published.


*