REG yahawe Umuyobozi Mukuru mushya

Umunya Israel, Ron Weiss, yagizwe Umuyobozi Mukuru wa REG (Photo/Courtesy)

Umunya Israel, Ron Weiss, yagizwe Umuyobozi Mukuru wa REG, asimbuye Mugiraneza Jean Bosco wari usanzwe akiyobora.

Amakuru dukesha Ikinyamakuru Umuseke, aremeza ko Jean Bosco Mugiraneza atakiri umuyobozi mukuru w’ikigo gishinzwe ingufu, (Rwanda Energy Group -REG). Umuyobozi mushya witwa Ron Weiss akaba asa n’uwatangiye uyu munsi.

Inzego zishinzwe gutangaza amakuru muri iki kigo zabwiye Umuseke ko zitaramenya iby’aya makuru.

Amakuru avuga ko kuri uyu wa gatatu tariki ya 17 Gicurasi 2017, uyu muyobozi mushya yeretswe abakozi akanagirana na bo inama.

Ron Weiss yari Umuyobozi Mukuru Wungirije w’ikigo cya Israel Electric Corporation (IEC) akaba yaragize uruhare mu gushyiraho ubufasha Israel irimo guha u Rwanda mu kugera ku ntego y’amashanyarazi angana na 563MW nibura mu 2018 no guha amashanyarazi abagera kuri 70% muri icyo gihe.

Ron Weiss mu 2015 ubwo hasinywaga amasezerano y’ubufatanye bw’u Rwanda na Israel mu by’amashanyarazi yari ahagarariye iki kigo cya IEC.

Mu 2010, Guverinoma y’u Rwanda yihaye intego yo kugera kuri MW 563 z’amashanyarazi mu mu 2017, iyi ntego iza guhuzwa na gahunda y’imbaturabukungu ya kabiri ‘EDPRS2’; Ibi bigafasha guha umuriro ingo byibura 70% mu 2017, na 100% mu 2020.

Mu mpera za 2016 iyi ntego yari itaragera muri 1/2 kuko u Rwanda rwari rufite hafi MW 280 zibasha kugera ku ngo 28%.

Gusa Jean Bosco Mugiraneza iki gihe yavugaga ko amashanyarazi ahari yakwira abanyarwanda bose.

Byatangajwe mu kiganiro n’abanyamakuru cyabanjirije inama yiga ku iterambere ry’ingufu z’amashanyarazi “IPAD Rwanda Energy Infrastructure”  yabaye mu Ugushyingo 2016.

Jean Bosco Mugiraneza wari umuyobozi mukuru wa REG kuva mu 2014, yavuze ko n’ubwo intego zitaragerwaho hari intambwe yatewe kandi ishimishije.

Ayobora iki kigo, hakozwe imishinga myinshi yo kongera ingufu z’amashanyarazi harimo imishinga ya Rukarara, urugomero rwa Nyabarongo rwuzuye, kubyaza Gas Methane yo mu Kivu amashanyarazi n’imishinga yo kubyaza umusaruro Nyiramugengeri iri kubakwa n’uwa Gishoma uri gukora, n’umushinga w’urugomero rwa Rusumo n’indi.

Hakozwe kandi ibikorwa byo Korohereza abaturage kwishyura amafaranga y’ifatabuguzi, Kugabanya ikiguzi cy’amashanyarazi byatangiranye na 2017, kongera ingufu zikomoka ku mirasire y’izuba.

Jean Bosco Mugiraneza ari umuyobozi mukuru wa REG, mu 2015 yafunzwe n’Urwego rw’Umuvunyi rumushinja kurusuzugura. Nyuma ahita arekurwa. Ni we muyobozi mukuru w’ikigo gikomeye wari utawe muri yombi n’uru rwego rushinzwe kurwanya ruswa n’akarengane.

Panorama

Be the first to comment

Leave a Reply

Your email address will not be published.


*