Indwara y’imbasa mu Rwanda yabaye amateka ku bana bato

Ibi byagarutsweho mu nama nyafurika iteraniye i Kigali yiga ku buzima bw’abana aho barebera hamwe indwara zahitana abana mu gihe badakingiwe cyangwa ba nyina badakingiwe mu gihe batwite.

U Rwanda ni kimwe mu bihugu bya Afurika byagabanyije imfu z’abana ziterwa n’indwara zikingirwa nk’uko byasobanuwe na   Sibomana Hassan, Umuyobozi w’agateganyo wa gahunda yo gukingira mu kigo cy’ubuzima (RBC). Avuga ko ibinjyanye n’ikingira mu Rwanda bihagaze neza ugereranyije n’ibihugu bya Afurika.

Sibomana agira ati “U Rwanda ruhagaze neza kuko indwara zikingirwa kugeza ubu ntizikigaragara mu bana bato dukingira; hari nk’indwara y’imbasa yacitse,  kuko iheruka kugaragara ku mwana mu 1993, mu cyahoze ari Cyangugu, ubu ni mu karere ka Nyamasheke”

Yakomeje avuga no ku zindi ndwara zitandukanye zikingirwa zagabanyutse ku buryo bugaragara, avuga kandi ko hari n’izindi nkingo batangiye gukingira abana bato.

Yagize ati “Abana bagera kuri 93% bakingiwe inkingo zose ariko n’aba 7% ntibivuga ko batakingiwe, ahubwo ntibakingiwe neza ngo inkingo zose bazirangize, aribo bashobora no kuvamo uwagira indwara imufata cyangwa ikamuhitana; nk’iseru ntikiboneka mu bana kuko mu myaka yashije batangira gukingira mu Rwanda, abagera ku bihumbi mirongo inani bafashwe n’iseru ariko ubu usanga nko mu mwaka hashobora kuboneka abatagera ku icumi.”

Avuga kandi ko n’abo bafashwe n’iseru bavurwa vuba ku buryo ntawe yahitana keretse abaye atageze kwa muganga. Indi ndwara isa n’iyacitse ni Agakwega, kuko ubu abayirwara ari bake cyane kuko bayikingira abagore batwite n’abana bato.

Hari kandi n’urukingo  rwatangijwe 2002 rwo gukingira indwara y’umwijima wo mubwoko bwa B, bakingira abana bafite ukwezi n’igice, abiri n’igice n’atatu n’igice; ku buryo kugeza ubu abana bari munsi y’imyaka 15 bakingiwe.

Nanone muri uwo mwaka hatangijwe urukingo rw’impiswi ku buryo byagabanyije imfu z’abana no guhora mu bitaro  kimwe n’urwatangiye mu 2009 rw’umusonga, umuhaha n’utundi dukoko dutandukanye.

Umusonga ni imwe mu ndwara zahitanaga abana benshi, ariko abajyanama b’ubuzima bafasha abaturage kuwurwanya ku buryo na wo mu minsi Minisiteri y’Ubuzima yiteguye kuzatangaza imibare iri hasi kuko utangiye kugabanyuka binyuze mu gukingiza.”

U Rwanda rwakiriye inama ya mbere y’ibihugu bya Afurika y’Umuryango w’Abibumbye ishami ry’ubuzima (WHO/OMS Africa) yiga ku buzima bw’abana, u Rwanda rwamaze kugabanya imfu z’abana ku kigero kiri munsi ya 50 ku bana igihumbi. Iyi nama ni ubwa mbere ibereye ku mugabane wa Afurika, ihuje ibihugu 7 bihagarariye ibindi mu turere bihereyemo.

Mutesi Scovia

Abitabiriye inama mpuzamahanga ku buzima (Photo/Courtesy)

Be the first to comment

Leave a Reply

Your email address will not be published.


*