Adrien Niyonshuti yegukanye shampiyona y’amagare 2017 mu Rwanda

Adrien Niyonshuti yegukanye Shampiyona y'u Rwanda mu mukino wo gusiganwa ku magare (Photo/Panorama)

Adrien Niyonshuti ukina nk’uwabigize umwuga muri ‘Team Dimension Data’ yo muri Afurika y’Epfo yegukanye Shampiyona y’u Rwanda y’amagare mu gace ko gusiganwa umuntu ku giti cye ‘Individual Time Trial’, mu isiganwa ryabereye mu Bugesera ahareshya na 41.8Km.

Isiganwa ryabereye mu mihanda y’i Nyamata kuri uyu wa Gatandatu tariki 24 Kamena 2017, aho abakinnyi bahagurutse mu mujyi i Nyamata imbere y’ibiro by’aAkarere ka Bugesera, bakatira Ramiro, bagaruka aho bahagurukiye.

Mu gace ko gusiganwa umuntu ku giti cye buri mukinnyi ahaguruka ukwe ndetse hagati ye n’umukurikiye hakabamo intera y’iminota ibiri.

Niyonshuti Adrien yahiriwe n’agace ka Bugesera kuko umwaka ushize n’ubundi ariwe wakegukanye. Uyu munsi yongeye kwisubiza uwo mwanya akoresheje iminota 54 n’amasegonda 32, akurikirwa na Ndayisenga Valens na we ukina nk’uwabigize umwuga muri Tirol Cycling Team yo muri Autriche akoresheje iminota 55 n’amasegonda 17.

Nsengimana Jean Bosco wa Benediction ni we ukinira mu Rwanda waje imbere, ariko akaba afite amateka yo kuba yaregukanye Tour du Rwanda 2015 yegukanye umwanya wa gatatu akoresheje iminota 55 n’amasegonda 40.

Mu cyiciro cy’abatarengeje imyaka 23; Niyomufasha Patrick wa Nyabihu ni we wabaye uwa mbere akoresheje 1h04’23’’.

Mu ngimbi Habimana Jean Eric wa Fly yabaye uwa mbere akoresheje iminota 35 n’amasegonda 37, ku ntera ireshya na 25Km, kuko bahagurutse i Nyamata bagakatira kuri Mbyo.

Mu bakobwa ku nshuro ya mbere Ingabire Beatha ukinira Les Amis Sportif y’i Rwamagana yahigitse Girubuntu Jeanne d’Arc, bakina mu ikipe imwe, ubundi usanzwe ari na we utsinda amasiganwa yose y’imbere mu gihugu akoresheje iminota 40 n’amasegonda 52.

Mu bakobwa batanu ba mbere ari na bo bakinnye uwagaragayemo uteri uwa Les Amis Sportifs, ni Magnifique Manizabayo ukinira Muhazi Cycling Generation, wegukanye umwanya wa kane.

Kuri iki Cyumweru Shampiyona y’Amagare irakomeza hakinwa isiganwa ryo mu muhanda, abakinnyi bazahagurukira i Ngoma basoreze i Kigali ku ntera ya kilometero 99.5 ku ngimbi n’abakobwa, na ho abakuru n’abatarengeje imyaka 23 bo bakazakora urugendo rwa Ngoma-Kigali, nibahagera bongere bazenguruka inshuro indwi bingana n’ibilometero 187.

 Rene Anthere

Be the first to comment

Leave a Reply

Your email address will not be published.


*