Nyabihu: Nta gisubizo kirambye cy’abana bata ishuri

Bamwe mu bana ubasanga mu mirimo ivunanye nyamara bari kumwe n'ababyeyi babo. Aha ni mu Gasiza (Photo/Panorama)

Gushaka amafaranga, gutwita imburagihe no gukoreshwa imirimo ivunanye ni ibintu bikomeye bituma abana bata ishuri mu karere ka Nyabihu, ariko kandi ako karere ntikagaragaza umuti urambye wo gukemura burundu icyo kibazo. Abana 530 bataye ishuri nta n’icyizere cyo gusubirayo.

Iyo usuye akarere ka Nyabihu, ubona abakobwa bakiri bato bakora ubucuruzi buciritse aho batuye mu midugudu. Iyo muganiriye ntibatinya kukubwira ko bataye ishuri bagashaka abagabo, ndetse bakaba baramaze kubyara, nta n’agatima ko gusubira mu ishuri.

Mu kagari ka Rega, Umurenge wa Jenda, honyine hagaragaye abana 12 bataye ishuri umwaka ushize wa 2016, mu rwunge rw’amashuri rwa Rega, nk’uko bivugwa n’ubuyobozi bw’ako kagari. Abo bana barimo abakobwa bari munsi y’imyaka cumi n’umunani, muri bo barindwi batwaye inda ariko n’abandi barashatse.

Aline Mukandayisenga, ni umugore w’imyaka 22 kandi abyaye kabiri. Yashatse afite imyaka 18 avuye mu ishuri. Atuye mu kagari ka Rega, adoda inkweto agacuruza n’utuntu ducirirtse. Avuga ko gushaka umugabo yabitewe no kubura amafaranga y’ishuri bitewe n’ubukene bw’ababyeyi.

Agira ati “Nabanaga na Mama ariko nta bushobozi yari afite bwo kundihira ishuri, anyohereza kwa marume na we yanga kunyishurira, mpitamo kuva mu ishuri nisangira umusore twakundanaga. Nigaga mu mwaka wa gatatu w’amashuri yisumbuye.”

Mu murenge wa Rambura, Akagari ka Nyundo, Umudugudu wa Gasiza, ho usanga abana nato mu nganzo y’ibumba no mu birombe babumbiramo amatafari. Ababyeyi b’abo bana ntibihanganira kubakorera ibumba ryakwikorerwa n’umuntu mukuru.

Ababyeyi b’abo bana batemeye kugirana ikiganiro kirambuye n’Ikinyamakuru Panorama, batubwiye ko abo bana iyo bavuye ku ishuri bagomba kuza gukora kugira ngo babone amafaranga, bakavuga ko abato barimo bo baba bakurikiye abandi. Nta soni nta n’ikimwaro kuko bavuga ko umwana agombye kumenyerezwa gukora, ibintu bavuga bisekera.

Abandi bo nko mu murenge wa Jenda, ababyeyi ntibatinya guhingisha abana bari mu myaka umunani, kuko twasanze hari n’uwiga mu mwaka wa kabiri w’amashuri abanza, ababyeyi bavuga ko agomba kujya ku ishuri amaze kubafasha gukura ibijumba.

Umuyobozi w’Akarere ka Nyabihu, Uwanzwenuwe Theoneste, mu kiganiro n’itangazamakuru ku wa 30 Kamena 2017, yatangaje ko abana koko bava mu ishuri kubera impamvu zinyuranye, ariko bakora ubukangurambaga kugira ngo basubiremo n’ubwo nta ngamba zirambye zigaragazwa.

Agira ati “Koko hari abana bata ishuri, dukora ibishoboka byose ngo basubiremo dufatanyije n’ababyeyi babo. Dukora ubukangurambaga. Ibintu bikunze gutuma bata ishuri harimo gushaka gukorera amafaranga ariko nanone hari ababyeyi babigiramo uruhare, abakobwa batwara inda zitateganyijwe n’abishyingira ndetse n’ababyeyi bakoresha abana babo imirimo ivunanye.”

Uyu muyobozi akomeza atangaza ko bakomeje gukora ubukangurambaga ariko abana bagera kuri 530 batarabasha gusubira mu ishuri.

Kugeza ubu imibare y’akarere igaragaza ko abana bataye ishuri barimo 415 bigaga mu mashuri abanza na 115 bo mu mashuri yisumbuye.

Muri rusange abana bata ishuri mu karere ka Nyabihu bangana na 5% mu mashuri abanza na 3% mu mashuri yisumbuye nk’uko byagaragajwe n’Ikigo cy’igihugu cy’ibarurishamibare ariko akarere kavuga ko iyo mibare yagabanyutse nk’uko bigaragazwa n’imibare yatanzwe hejuru.

Imbogamizi igaragara akarere kavuga ni uko ababyeyi bataragera ku rwego rwiza rw’imyumvire ku buryo bahita basubiza abo bana mu ishuri ariko ubukangurambaga bugomba gukomeza.

Nk’uko bigaragazwa na Minisiteri y’uburezi muri raporo y’umwaka wa 2016 ndetse no mu gitabo nkusanyamibare cy’umwaka cy’ikigo cy’igihugu cy’ibarurishamibare 2016, mu mwaka wa 2015 abana bataye ishuri mu karere ka Nyabihu banagana na 9.4% mu gihe ku rwego rw’igihugu abataye ishuri muri uwo mwaka bangana na 6.5%.

Muri aka karere kandi mu mashuri yisumbuye mu cyiciro rusange, abataye ishuri bangana na 12.9% mu gihe ku rwego rw’igihugu bangana na 2.5%, na ho mu cyiciro gikuru gisoza amashuri yisumbuye bo umubare warazamutse cyane bangana na 10.7%.

Rene Anthere

Mu gihe bamwe mu bana bari ku ishuri abandi baba bari mu mirimo n’ababyeyi babo bavuga ko bari bwige mu cyiciro gikurikiraho n’ubwo amasaha yo kujya ku ishuri aba yageze (Photo/Panorama)
Umuyobozi w’Akarere ka Nyabihu, Uwanzwenuwe Theoneste (Photo/Panorama)

 

Be the first to comment

Leave a Reply

Your email address will not be published.


*