Ngoma: Perezida uzatorwa yifuzwaho kuvugurura Umujyi wa Kibungo

Amwe mu maduka yo mu mujyi wa Kibungo (Photo/Theoneste N.)

Abatuye n’abakorera mu mujyi wa Kibungo basanga nubwo muri manda ya Perezida igeze ku musozo   yarabagejejeho byinshi, birimo amashanyarazi, imihanda yoroshya ubuhahirane, Girinka Munyarwanda n’ibindi, barifuza kubona umujyi wabo  na wo ukomera nk’indi mijyi yo mu gihugu.

Hakizimana Eric ashoreye ihene avuye kugura mu isoko rya Kibungo,  aganira n’umunyamakuru wa Panorama yamubwiye ko yishimira cyane ibyagezweho muri manda ishize harimo kuba baremerewe gukorerwa umuhanda Ngoma-Bugesera -Nyanza, kuba harubatswe ibikorwa remezo byinshi nka Hoteli ya Ngoma ni ubwo itaruzura.

Yongeyeho ko abona uwatorwa yashyira ingufu mu kuvugurura umujyi wa Kibungo we abona udakura. Yagize ati “Nibyo turashimira ibyakozwe ariko uyu mujyi ukwiye kuvugururwa ukagera ku rwego rw’indi mijyi. Ahangaha ntiwahagera bwije cyangwa mu gitondo kare ngo ubone serivise, usanga bose bakinze; bityo rero uretse no kuvugurura amazu amwe n’amwe ashaje yo ku gihe cy’abarabu, hakenewe izindi mbaraga jye niko mbibona.”

Mukankusi Chantal na we utuye mu karere ka Ngoma, avuga ko yifuza kubona umujyi wabo ususurutse nk’indi mijyi; kuri we asanga ba nyirawo aribo batawitaho, aho atanga urugero rw’uko ni uwikorera ubonye amafaranga ahita ahimuka kubera ko nta bakiriya bahaba.

Yongeraho ko uzatorwa kuba Perezida wa Repubulika yazabafasha kugira ngo uyu mujyi na wo uzamuke. Yagize ati “Uzatorwa twe turanamuzi, ariko rwose azadufashe uyu mujyi wacu uzamuke wenda aduhe nk’uruganda runini rwakoresha nk’abakozi benshi bajya bataha aha wenda byagira icyo bihindura.”

Umuyobozi w’Akarere ka Ngoma Nambaje Aphrodise avuga ku ivugururwa ry’Umujyi wa Kibungo agaragaza ko ahanini byatewe ni uko igishushanyombonera cyawo cyari cyitaraboneka ariko mu 2014 Inama Njyanama y’Akarere yaracyemeje. Uyu muyobozi we akaba atabibona kimwe n’abavuga ko Umujyi  wa Kibungo udahinduka, kubera ko  bashyizeho uduhanda tw’amabuye ndetse n’amatara yo ku muhanda atarahabaga.

Agira ati  “Abantu benshi babona amaduka gusa kandi hari isoko  n’ibindi bikorwaremezo nk’amashuri avugururwa, Katedarali irimo kubakwa, Hoteli ya Kiliziya Gaturika n’ibindi.”

Icyokora anemera ko ibiganiro bikomeje hagati y’Akarere n’abacuruzi ba nyiri aya maduka ashaje,  kugira ngo na yo avugururwe.  Abivuga muri aya magambo “Dufite abantu bafite intege nkeya bitwa abacuruzi bagenda biguru untege; twakoranye na bo ingendoshuri Musanze, Huye, Rusizi dusinyana nabo amasezerano yo kuvugurura ariko bamwe bakavuga ko nta mafaranga. Hari abo dufitanye amasezerano y’umwaka umwe cyangwa ibiri.”

Umuyobozi w’Akarere ka Ngoma anavuga ko bashyizeho ingamba zikarishye zo kubaka  inyubako zo guturamo mu mujyi bikaba byaratanze umusaruro .

Ku bafite  amikoro aciriritse  bateganyirijwe imidugudu umunani iherereye mu nkengero z’Umujyi wa Kibungo, aho bashobora kubakisha ibikoresho bisanzwe birimo rukarakara kugeza mu kwezi kwa Nzeri uyu mwaka .

Akarere ka Ngoma kaza ku mwanya wa Gatatu mu kugira abaturage batuye ku mudugudu ku rwego rw’igihugu aho 97% batuye ku mudugudu. Aka Karere  ka Ngoma  kandi kagizwe n’imirenge 14 nayo ifite udusantere tw’ubucuruzi, harimo udushyushye mu mikorere no mu bucuruzi  nka Rukira, Sake na Mutenderi.

Akarere ka Ngoma gatuwe n’abaturage basaga ibihumbi 340,000  biganjemo urubyiruko. Abahatuye batunzwe cyane n’ubuhinzi n’ubworozi, ibihingwa bahinga byiganjemo  ibishyimbo, ibigori, soya, urutoki, imyumbati, ikawa n’inanasi.

Nkurunziza Theoneste

Bimwe mu bice bigize Umujyi wa Kibungo bikeneye kubakwa (Photo/Theoneste N.)

1 Comment on Ngoma: Perezida uzatorwa yifuzwaho kuvugurura Umujyi wa Kibungo

Leave a Reply

Your email address will not be published.


*