Uwiyitiriye urwego rw’Umuvunyi yakatiwe gufungwa imyaka10

Ku wa mbere w’iki cyumweru uwitwa Nduwimana André yahamijwe n’Urukiko Rwisumbuye rwa Ngoma, rwo mu karere ka Ngoma mu ntara y’Iburasirazuba, ibyaha birimo kwiyitirira Urwego rw’Umuvunyi akatirwa gufungwa imyaka 10 n’ihazabu ya miliyoni eshanu z’amafaranga y’u Rwanda.

Urukiko rushingiye ku buhamya bw’abo Nduwimana yabeshyaga akabasaba amafaranga ngo akurikirane ibibazo byabo by’Akarengane mu nkiko. Hari uwatanze ubuhamye wamuhaye  ibihumbi magana cyenda nk’uko bivugwa n’umunyamakuru wa Radio Izuba wari mu rubanza.

Nduwimana yafatanywe kandi inyandiko zisanzwe zitangirwaho ibirego bishingiye ku karengane ku Rwego rw’Umuvunyi.

Ku cyaha cyo kwiha ububasha ku mirimo itari iye no kwambara umwambaro atagenewe agamije kuyobya rubanda, urukiko rushingiye ku buhamya bwa Mwizerwa Epimaque aho yahamirije ubushinjacyaha ko yagiranye amasezerano na Nduwimana nk’umwunganizi mu mategeko, yo kumuburanira urubanza mu rukiko rw’ibanze rwa Rukara aho ngo yahise amuha avance ya 25.000 frw ariko nyuma akaza kumubwira y’uko gukurikirana urubanza rwe neza azamushakira undi mwunganizi mu mategeko ngo kuko yari azi neza ko ari nta burenganzira abifitiye.

Urukiko kandi rushingiye ku bimenyetso byagaragajwe n’ubushinjacyaha ko uyu Nduwimana mu gihe cy’ifatwa rye yafatanywe umwambaro ndetse n’ikarita bisanzwe byambarwa n’abunganizi mu mategeko, rwanzuye ko uregwa ahamwa n’iki cyaha nk’uko biteganywa n’ingingo ya 616  y’igitabo cy’amategeko ahana ibyaha mu Rwanda aho iteganya ko uhamwe n’iki cyaha ahanishwa igifungo kuva ku Umwaka umwe kugeza ku myaka itatu z’ihazabu y’amafaranga y’u Rwanda kuva ku 50.000 frw kugeza ku 500.000 frw.

Ku cyaha cy’ubwambuzi bushukana n’ububeshyi, urukiko rushingiye ku bimenyetso rwagaragarijwe n’ubushinjacyaha  birimo iby’abatangabuhamya barimo Habimana Jean Alexis wahamije ko yahaye Nduwimana 900.000 frw ngo kugira ngo amutangire ikirengo cy’akarengane yari afite mu rukiko rw’ikirenga, ngo ibi bintu Nduwimana Andre akabikora atari umwunganizi mu mategeko cyangwa undi muntu amategeko abyemerera bigatuma ahabwa aya mafaranga kubera gushuka abaturage, kuri iki cyaha urukiko rushingiye ku ngingo ya 318 y’igitabo cy’amategeko ahana ibyaha mu Rwanda rwanzuye ko Nduwimana Andre ahanishwa igifungo kuva ku myaka itatu kugeza ku myaka itanu n’ihazabu y’amafaranga kuva kuri 3.000.000 frw kugeza kuri 5.000.000 frw.

Nyuma yo gusoma imyanzuro y’urukiko ku byaha byose Nduwimana Andre  akurikiranyweho n’ubushinjacyaha, umucamanza yanzuye ko hashingiwe ku ngingo ya 83 n’iya 84 zo mu gitabo cy’amategeko ahana ibyaha mu Rwanda iteganya ibihano ku ruhererekane rw’ibyaha nk’uko uregwa aregwa ibyaha birenze kimwe, umucamanza yamuhanishije igihano kiruta ibindi yongeraho igihe cyangwa umubare bitewe n’uburyo ibyaha byakozwe ariko ntarenze urugero ntarengwa hongeweho 1/2 cy’igihano kirushije ibindi gukomera.

Aha umucamanza ahingiye kuri iyi ngingo yanzuye ko Nduwimana Andre ahanishwa igihano cy’igifungo cy’imyaka icumi n’igice n’ihazabu  ya miliyoni eshanu y’amafaranga y’u Rwanda ariko asonerwa amagarama kuko yaburanye afunze.

Umuseke.rw

Be the first to comment

Leave a Reply

Your email address will not be published.


*