Kayonza: Umukecuru wasabiwe n’Abadepite kubakirwa amaze umwaka asembera

Musaniwabo Josiane w'imyaka 63 akeneye ubufasha akava mu busembere. Inkunga yasabiwe yabaye nka ya mabati... (Photo/Bwiza.com)

Musaniwabo Josiane ufite imyaka 63 utuye mu mudugudu w’Akabarima mu kagari ka Nkamba, Umurenge wa Ruramira mu karere ka Kayonza, arasaba gutabarwa kubera ubuzima bubi abayemo n’inkunga Abadepite bamusabiye amaze umwaka ayitegereje amaso yaheze mu kirere.

Ubwo Abadepite basuraga umurenge wa Ruramira, yabagejejeho ibibazo afite, abayobozi basabwa kumufasha akabona icumbi ndetse n’inkunga ya VUP, umwaka urashize nta na kimwe yahawe uretse ihene yahawe na yo ubuyobozi bw’akagari burayimwambura buyiha umuyobozi w’umudugudu.

Mu kiganiro yagiranye na Bwiza.com, Musaniwabo Josiane avuga ko abana be 8 biciwe i Nyamata muri kiriziya n’umugabo we yishwe muri jenoside yakorewe Abatutsi ndetse na we Interahamwe ngo zaramukubise zimusigira ubumuga ntacyo abasha kwikorera, mu buzima bubi abayemo avuga ko inkunga zigenerwa abandi we zitamugeraho.

Agira ati “Abana banjye n’umugabo bamaze gupfa,  nabuze aho mba kuko yari yaradushatse turi 4 kandi njye nari uwa 4, imitungo yose yasigaranye abana b’umugore mukuru, nasubiye iwacu Rukumberi mpageze nsanga abo twavukanaga barashize, umugabo wundi twabanye  mu 2011 yagurishize imitungo yose ansiga njyenyine, nabuze aho nerekeza ntangira kurara mu ntoki z’abaturage”.

Musaniwabo avuga ko abayeho nabi atunzwe no gucuruza imboga za dodo nazo abanza gusaba abaturage akazigurisha, arema isoko kabiri mu cyumweru ku buryo amafaranga menshi abona atarenga 1200 mu cyumweru.

 

Musaniwabo avuga ko yasabye Abadepite ko yafashwa akava mu ruzerero, bamusabiye gufashwa akabona icumbi n’inkunga ya VUP ariko amaso yaheze mu kirere.

Agira ati “Abadepite baraje mbagezaho ibibazo byanjye inshuro ebyiri zose,  babwiye abayobozi ko bagomba kunyubakira ndetse nkahabwa ‘Ntugasaze’  nk’abandi ariko abayobozi b’utugari basimburanye gatatu banyandika ngo nzahabwa vijyupi [yashakaga kuvuga VUP] ariko bakansimbuza benewabo bafite amasambu n’imiryango,  ubu barimo kunsohora mu nzu kuko maze amezi 3 narananiwe kwishyura ikode, ubu nzongera nsubire kurara mu ntoki z’abaturage” .

 

Abaturanyi ba Musaniwabo Josine barasaba ubuyobozi kumutabara:

Umuturage utarashatse ko izina rye ritangazwa, avuga ko uyu mukecuru abayeho mu buzima bubi, ati “Nkubu ararwaye batamufashije ashobora kwicwa n’inzara, ararwaye kandi nta muntu afite wo kumwitaho,  kubona igikoma ntibyoroshye ubundi yatungwaga no gusoroma utuboga none ni mu zuba, bagiye bavuga ko bazamugurira inzu ariko birarambiranye”.

Arakomeza yibaza, ati “ ese ubu bazafasha uwenda gupfa? Nk’ubu yabuze amafaranga yo kwifotoza ngo abone mituweri kandi urebye abantu bahabwa VUP baba mu mazu yabo n’abana ariko uyu  bagahora bamurerega”.

Ubuyobozi bw’umurenge wa Ruramira buvuga ko habuze ubutaka bwo kumwubakiramo   ndetse bakamwizeza ko azabona inkunga ya VUP.

Ubwo umunyamakuru wa Bwiza.com yasangaga umunyamabanga nshingwabikorwa w’umurenge wa Ruramira, Gatanazi Rongin, ku biro, yamubije icyo ubuyobozi buteganya gukora kuri iki kibazo cya Josiane, abanje kumugora amwima amakuru, yahise amwohereza muri ofisi y’ ushinzwe imibereho myiza mu murenge ngo abe ari we umuha amakuru, na we ahita avuga ko adashobora kugira icyo abivugaho mu gihe abona n’umukuriye abikwepa.

Umunyamakuru yatashye nta makuru abonye, nyuma y’iminsi 2 yamuhamagaye [gitifu] ku murongo wa telefoni ye igendanwa,  amusubiza agira ati “Icyo kibazo ndakizi, uriya mukecuru koko ntagira aho aba ariko twagerageje gushaka uko tumwubakira ariko twabuze ikibanza kuko mu murenge wacu nta butaka bwa Leta dufite twamutuzamo, ikibazo cye twagishykirije akarere ubwo kazamujyana mu murenge urimo ubutaka bwa Leta bamwubakire naho inkunga ya VUP azayihabwa”.

N’ubwo ubuyobozi buvuga  bwabuze ubutaka bwo kumutuzaho Musaniwabo, abaturage bemeza ko hari umuturage washatse kumuha ikibanza ariko ubuyobozi buvuga ko bitashoboka ngo kuko aramutse apfuye ubutaka nyirabwo yabusubirana.

Musaniwabo amaze imyaka 23 mu murenge wa Ruramira, uvuga ko yarokotse Jenoside yakorewe Abatutsi ariko ntabarirwa mu batishoboye bacitse ku icumu, avuga ko yabuze uburyo yagera i Nyamata ngo ahabwe ibyangombwa byatuma ajya ku rutonde  abe yanafashwa na FARG.

Source: Bwiza.com 

 

Be the first to comment

Leave a Reply

Your email address will not be published.


*