Gisagara: Nyuma yo kuzamura Volleyball harakurikiraho Basketball

Gisagara Volleyball Club yegukanye igikombe cya shampiyona 2016-2017 (Photo/Courtesy)

Ikipe ya Volleyball y’Akarere ka Gisagara, nyuma y’umwaka umwe ishinzwe yegukanye igikombe cya shampiyona y’u Rwanda muri uwo mu kino. Imbaraga nk’izi zitezwe mu kuzamura ikipe ya Basketball umwaka utaha.

Ubuyobozi bw’Akarere ka Gisagara bwishimira kuba ikipe ya Volleyball bwashinze, nyuma y’umwaka umwe wonyine yegukanye igikombe cya shampiyona y’umwaka 2016-2017. Ibi bibaha imbaraga zo kuzamura imikino y’intoki muri ako karere, gukomeza gucukumbura impano z’abana bakiri bato no kuzibyaza umusaruro.

Umuyobozi w’ako karere, Rutaburingoga Jérôme, agaragaza impamvu bahisemo kwita ku mikino y’intoki.

Agira ati: “Twasanze mu karere kacu hari abasore n’inkumi bafite impano mu mikino y’intoki. Mu rwego rwo kuyiteza imbere twahisemo kubaka inzu y’imikino y’intoki, twubaka n’ikipe y’akarere ya Volleyball.”

Akomeza agira ati: “Twashimishijwe cyane n’uko ikipe yacu yegukanye igikombe cya shampiyona kandi imaze umwaka umwe ivutse. Byaduhaye imbaraga, ku buryo tugiye gushyira imbaraga no muri basketball.”

Abaturage batuye hafi y’ibiro by’Akarere ka Gisagara bishimira kuba ubuyobozi bwabo bwaratekereje ku mpano z’abasore n’inkumi bagateza imbere imikino, ndetse bikaba bizamura n’iterambere ryabo.

Ngiruwonsanga Anastase ni umuturage o mu mudugudu wa Cyamakuza, Akagari ka Cyamakuza, Umurenge wa Ndora, Akarere ka Gisagara. Atuye mu irembo ry’inzu y’imikino y’ako karere.

Yishimira ko kuva iyo nzu y’imikino ihageze abana babo batangiye kwinjira mu mukino w’intoki wa Volleyball, cyane cyane mu gihe cy’ibiruhuko.

Agira ati: “Mu gihe cy’ibiruhuko abana bacu babona aho bakinira cyane cyane umukino wa Volleyball, kuko natwe ubwacu turabibashishikariza. Hari n’indi mikino bajyamo ariko yo ntirakomera cyane.”

Giswahili Jean Paul, ni umusore w’imyaka 23. Avuga ko inzu y’imikino yakuye abasore n’inkumi mu bwigunge, kuko uretse no gukina, byatumye babona aho bahurira bakamenyana, bakazamura n’impano zabo.

Agira ati: “Twabonye aho tugaragariza impano zacu. Hari abasore batangiye kugeragezwa kwinjira mi ikipe y’akarere ya Volleyball. Indi mikino na yo nishyirwamo imbaraga hazaboneka abakinnyi benshi bafite impano bavuka ahangaha. Nanjye ubwanjye natangiye gukina n’ubwo ntarinjira mu ikipe nkuru.”

Uretse kuba abana barabonye aho bakinira, ababyeyi babo bishimira ko inzu y’imikino y’akarere yabafashije mu iterambere ryabo.

Ngiruwonsanga agira ati: “Kuva iyi nzu yatangira kubakwa nahabonye akazi. Byatumye nta mwana wanjye udindira mu kwiga, kuko sinshobora kuraranya amafaranga y’ishuri. Byanatumye kandi bose mbagurira imyenda ya siporo, mu gihe ubundi bitari binyoroheye.”

Uretse umukino wa Volleyball umaze kwandika izina mu karere ka Gisagara, ubuyobozi bw’aka karere bwemeza ko abaturage bitegura indi kipe ya Basketball umwaka utaha.

Nyuma y’ikipe ya Basketball bazakurikizaho iy’umupira w’amaguru, kuko ikibuga na cyo kigiye gutangira kubakwa hafi y’inzu y’imikino, ikibanza cyacyo cyarateganijwe.

Biteganyijwe ko ahubatswe inzu y’imikino, hazahindurwa ikigo cy’imikino inyuranye, ikinirwa mu Rwanda ndetse no ku rwego mpuzamahanga.

Rwanyange Rene Anthere

Umuyobozi w’ako karere, Rutaburingoga Jérôme, yizeza abaturage ko Gisagara izahinduka igice (Centre) y’imikino ikomeye (Photo/Panorama)
Inzu y’imikino (Gymnase) y’Akarere ka Gisagara (Photo/Panorama)
Ikibuga cyo muri Gymnase y’Akarere ka Gisagara (Photo/Panorama)
Imbere mu nzu y’imikino y’Akarere ka Gisagara (Photo/Panorama)

Be the first to comment

Leave a Reply

Your email address will not be published.


*