Rayon Sports yatsinze Etincelles mu gikombe cya Fezacup

Ikipe ya Rayon Sports mu myenda mishya iriho amazina y'abaterankunga bombi (Photo/Courtesy)

Mu irushanwa ryateguwe na Fezabet, umuterankunga w’amakipe yombi, Etincelles na Rayon Sports. Umukino warangiye Rayon Sports itsinze Etincelles ibitego 2-0, ihita yagukana igikombe.

Ku wa Gatatu tariki ya 20 Nzeri 2017, i Rubavu kuri Stade Umuganda, Rayon Sports yihereranye Etincelles iyitwara igikombe iyitsinze ibitego 2-0. Ni mu irushanwa ry’umunsi umwe ryateguwe n’umuterankunga w’amakipe yombi, mu rwego rwo gutegura shampiyona y’umupira w’amaguru mu Rwanda mu mwaka 2017-2018.

Nk’uko tubikesha urubuga rwa Rayon Sports, uyu mukino watangiye ikipe zombi bigaragara ko zifite inyota yo kureba mu izamu, cyane cyane Etincelles yakiniraga ku kibuga cyayo.

Etincelles yabanje kugerageza izamu ririnzwe na Abouba binyuze kuri rutahizanu Kambale Salita Gentil wahoze muri Rayon ubu akaba ari na we kapiteni wa Etincelles.

Rayon Sports yabonye uburyo bwo gutsinda ku munota wa 10 aho umupira uvuye muri koruneri watewe n’umutwe na Diarra ariko myugariro wa Etincelles akawukuriramo ku murongo w’izamu. Amakipe yombi yakomeje asimburanwa gusatirana.

Ku munota wa 28 Ange Mutsinzi yateye umutambiko w’izamu, nyuma y’aho Nova yari akase neza umupira muri koruneri.

Ubundi buryo bukomeye bwabonetse ku munota wa 45 aho Diarra wari umaze gucenga myugariro wa Etincelles yateraga umupira umuzamu wa Etincelles akawushyira muri koruneri.

Muri iki gice cya mbere, abasore ba Rayon Sports bagaragaje inyota yo gutsinda igitego ariko ntibyabakundira kuko cyarangiye ari 0-0.

Ku munota wa 32 w’iki gice cya mbere, Master yavuyemo nyuma yaho agize imvune y’urutugu  asimbuzwa Pierrot, wahise afata igitambaro cy’ubu kapiteni cyari cyambawe na Abouba Bashunga.

Mu gice cya kabiri Rayon Sports yatangiranye imbaraga nyinshi ariko Etincelles ikomeza kuba ibamba mu bwugarizi bwayo mu gice cya kabiri ku buryo byagoye cyane Ubusatirizi bwa Rayon Sports kubona igitego.

Ku munota wa 73 nibwo Rayon Sports yashoboye kubona igitego  gitsinzwe na Pierrot. Aha hari nyuma y’aho Shassir acengeye ba myugariro babiri ba Etincelles hanyuma agaha umupira Caleb wahise awuterekera Pierrot, na we agahita awuboneza mu izamu.

Etincelles yahise ireka kugarira cyane isa n’ifunguye ikibuga. Ibi byahise bituma Rayon Sports ibona igitego cya kabiri cyatsinzwe na Djabel ku munota wa 82 nyuma y’akazi gakomeye kakozwe na Shassir wacenze abantu ku ruhande rw’ibumoso, agakata umupira mu rubuga rw’amahina, Kone akawutambuka maze Djabel wigaragaje cyane muri uyu mukino agahita awohereza mu rushundura rwa Etincelles..

Nyuma y’icyo gitego Etincelles na yo yahushije ikindi cyari cyabazwe, aho Kambale yateye umupira mu buryo bwa gikorobasi (accrobatic kick) ugakubita umutambiko w’izamu.

Panorama

Be the first to comment

Leave a Reply

Your email address will not be published.


*