Ikoranabuhanga rizafasha abahinzi n’aborozi kumenyekanisha ibyo bakora

Mwanzo L. Millinga ushinzwe itumanaho muri Afronet (Africa Organic Network), atanga amasomo ku gukoresha ikoranabuhanga mu buhinzi, i Kigali, muri ROAM (Photo/Panorama)

Umusaruro ukomoka ku buhinzi n’ubworozi mu Rwanda, umaze kurenga imipaka kandi umusaruro wabyo urakunzwe ku isoko mpuzamahanga. Abahinzi-borozi bavuga ko gukoresha ikoranabuhanga bizarushaho kubagurira isoko no gucuruza badahenzwe.

Semugeshi Emmanuel atuye mu murenge wa Nyange, Akarere ka Musanze. Ni umuhinzi wa Tungurusumu ubimazemo imyaka itanu. Avuga ko iki gihingwa cyunguka cyane kandi gikunzwe ku isoko ryo mu bihugu bihana imbibi n’u Rwanda.

Agira ati: “Tungurusumu yera mu Rwanda irakunzwe cyane, kuko mu Rwanda tuyishyiramo ifumbire y’umwimerere_Imborera. Ubu dufite isoko ryaguye muri Uganda, kandi rikomeza kwaguka bitewe n’ubuziranenge bw’ibihingwa byacu.”

Semugeshi akomeza agira ati: “Kumenyekanisha ku Isi hose ibyo dukora ni ukwagura amarembo y’isoko. Iyo ukoresheje ikoranabuhanga isi yose irakumenya.”

Mukantagara Martha atuye mu murenge wa Tumba, Akarere ka Huye. Yize amashuri yisumbuye, yabaye umukozi wa Leta ariko ubu arikorera. Acuruza Divayi yiyengera ikomoka mu bitoki no mu mbuto zitwa Lubarube.

Avuga ko kumenyekanisha ibyo akora bizamufasha kwagura isoko. Agira ati: “Kwifashisha ikoranabuhanga bidufasha kwagura isoko ry’ibyo dukora. Biroroshye kumenyesha abantu benshi ibikorwa byawe, atari ab’imbere mu gihugu gusa ahubwo n’abo ku rwego mpuzamahanga.”

Divayi yenga avuga ko imara imyaka itatu kuko bahita bayijyana idatinda ku isoko. Afite icyizere cyo kwagura ibikorwa bye, kuko aho akorera hari ibitoki kandi aribyo by’ibanze akenera.

Manirakiza Damien ni umuhinzi w’ikawa ukomoka mu karere ka Huye. Akora akazi ko kongerera agaciro umusaruro w’ikawa ariko kandi yorora n’iminyorogoto imufasha kubona ifumbire.

Avuga ko ifumbire akora ayikoresha wenyine kuko atarashobora kuyigurisha abandi. Kuba yongera agaciro ikawa avuga ko bizamufasha kwagura isoko, ndetse akagira ubushobozi bwo kubona abakiriya bo ku rwego mpuzamahanga.

Padiri Yohani Bosiko Nsengimana Mihigo, Umumisiyoneri w’Umutima mutagatifu wa Yezu na Mariya, akaba n’umuyobozi w’Umuryango utegamiye kuri Leta Ukurikirana ubuhinzi bworozi bw’umwimerere, nziramuze na ndemabuzima (ROAM: Rwanda Organization Agricultural Movement), avuga ko iyo bahinga bakoresha ifumbire n’imiti by’umwimerere hubahirizwa ubutabera, gukunda ubutaka n’ubuzima, kumenya ko Isi tuyikeneye twe itadukeneye.

Atangaza ko gukoresha ikoranabuhanga mu buhinzi, bizabafasha kwagura amasoko binyuze mu kumenyekanisha ibyo bakora hifashishijwe ikoranabuhanga.

Agira ati: “Abahinzi n’aborozi sibo bagomba gusigara inyuma mu gukoresha ikoranabuhanga mu kumenyekanisha ibyo bakora. Tuzakoresha cyane imbuga nkoranyambaga kuko zigeza ubutumwa ku bantu benshi kandi vuba. Ufite amakuru aba akurusha imbaraga kuko tuzarushaho kumenya abo dukorana na bo. Nimenya ibyo ukora nawe ukamenya ibyo nkora, tuzafashanya mu kubona isoko.”

Gucuruza ibikomoka ku buhinzi n’ubworozi binyujijwe mu ikoranabuhanga, bizarushaho kumenyekanisha ibikorerwa mu Rwanda kuva mu murima kugeza bigeze ku meza.

Kugira ngo ibicuruzwa bikoreshwamo ifumbire y’umwimerere_ifumbire y’imborera, badakoreshejemo ifumbire mvaruganda, ndetse bakanakoresha imiti y’umwimerere birusheho kugumana agaciro kabyo, iyo bigiye ku isoko biba bifite ikirango cya KILIMOHAI n’icya PGS (Ukwizerana bihuriweho, buri wese icyo azi akagisangiza abandi kandi akanatunga agatoki aho biri ngombwa).

Rwanyange Rene Anthere

Abanyamuryango ba ROAM bakurikirana amasomo ku ikoranabuhanga (Photo/Panorama)
Abanyamuryango ba ROAM bakurikirana amasomo ku ikoranabuhanga (Photo/Panorama)
Tungurusumu zo mu Rwanda zirakunzwe ku isoko ryo mu karere. Abahinzi bazo barangamiye isoko mpuzamahanga bazagezwaho n’Ikoranabuhanga. Semugeshi Emmanuel ni umuhinzi wa Tungurusumu, atuye mu murenge wa Nyange, Akarere ka Musanze (Photo/Panorama)
Mukantagara Martha atuye mu murenge wa Tumba, Akarere ka Huye. Yenga akanacuruza Divayi (Photo/Panorama)
Manirakiza Damien ni umuhinzi w’ikawa ukomoka mu karere ka Huye. Ifumbire akoresha ituburwa n’iminyorogoto (Photo/Panorama)
Padiri Yohani Bosiko Nsengimana Mihigo, Umuyobozi wa ROAM (Photo/Panorama)

 

 

 

1 Comment on Ikoranabuhanga rizafasha abahinzi n’aborozi kumenyekanisha ibyo bakora

Leave a Reply

Your email address will not be published.


*