Ikipe ya Basketball y’abamugariye ku rugamba yerekeje muri Tanzaniya

Ikipe y'Abamugariye ku rugamba y'i Nyarugunga (abambaye umukare) bari mu mikino itegurwa na Komisiyo y'Igihugu ishinzwe gusezerera no gusubiza mu buzima busanzwe abari abasirikare -RDRC (Ifoto/RDRC)

Mu gitondo cya kare ahagana saa kumi n’ebyiri ni bwo ikipe y’umukino wa Basketball y’abagendera mu magare y’abafite ubumuga y’abamugariye ku rugamba batuye mu mudugudu wa Nyarugunga, yerekeje muri Tanzaniya mu marushanwa yo kwizihiza umunsi mpuzamahanga w’abafite ubumuga.

Nk’uko bitangazwa n’Umunyamabanga Mukuru wa Komisiyo y’igihugu ishinzwe gusezerera no gusubiza mu buzima busanzwe abari abasirikare (RDRC), Umulisa Henriette, ni ubwa mbere ikipe ya basketball y’abamugariye ku rugamba isohokeye igihugu.

Agira ati “Ni ishema ryacu kuba ikipe y’abamugariye ku rugamba bakina umukino wa basketball y’abafite ubumuga bagendera mu magare yaratumiwe. Kwita ku basezerewe mu gisirikare ni inshingano zacu ariko abamugariye ku rugamba bo tubitaho by’umwihariko kandi tukabashyira no muri gahunda zose harimo n’imikino.”

Akomeza agira ati “Iyi kipe y’i Nyarugunga ni ubwa mbere isohokeye igihugu. Isanzwe ikina imbere mu gihugu. Twayihaye ibyangombwa byose kandi twizeye ko izitwara neza igahesha ishema igihugu.”

“Ikipe y’i Nyarugunga isanzwe yitwara neza imbere mu gihugu mu marushanwa Komisiyo itegura, igatwara ibikombe. Ikipe isanzwe izwi ku rwego rw’igihugu none igiye no kumenyekana ku rwego mpuzamahanga.”

Avuga kandi ko gushyira gahunda y’imikino ku bamugariye ku rugamba bibafasha no mu mibereho no kubakura mu bwigunge. “Iyi mikino igaragaza imiyoborere myiza igera ku banyarwanda bose.”

Nyarugunga Wheelchair Basketball Team, ihagarariye u Rwanda mu mikino yo kwizihiza umunsi w’abafite ubumuga muri Tanzaniya ku butumire bw’Inama y’igihugu y’abafite ubumuga yo muri icyo gihugu.

Imikino izaba ku wa 5 Ukuboza 2017. Ikipe yohereje abakinnyi batanu baherekejwe n’Umukozi wa Komisiyo y’igihugu ishinzwe gusezerera no gusubiza mu buzima busanzwe abari abasirikare, ushinzwe imikino. Bazagaruka i Kigali ku wa Gatatu tariki ya 6 Ukuboza 2017.

Mu Rwanda uyu munsi wizihirijwe i Gahini, Akarere ka Kayonza, mu ntara y’Iburasirazuba, ku Cyumweru tariki ya 3 Ukuboza 2017.

Rwanyange Rene Anthere

Umulisa Henriette, Umunyamabanga Mukuru wa Komisiyo y’Igihugu yo Gusezerera no gusubiza mu buzima busanzwe abari abasirikare (Ifoto/Panorama)
Nyarugunga Wheelchair Basketball Team (Ifoto/RDRC)

 

Be the first to comment

Leave a Reply

Your email address will not be published.


*