Kwipima SIDA utiriwe ujya kwa muganga

Udukoresho tuzajya dufasha abantu kwisusuzuma Virusi itera SIDA (Photo/Courtesy)

Mu Rwanda ubwo hizihizwaga  umunsi mpuzamahanga wo kurwanya icyorezo cya SIDA hanamuritswe uburyo bushya bwo kwipima Virusi itera SIDA aho buri wese ashobora kwipima atabanje kujya ku kigo nderabuzima.

Kimwe n’Isi yose u Rwanda buri taliki ya mbere Ukuboza buri mwaka, rwizihiza uyu munsi runazirikana ababarirwa mu bihumbi bagirwaho ingaruka n’iki cyorezo. Insanganyamatsiko y’uyu mwaka ishishikariza abantu kwipisha, abanduye bagafata imiti igabanya ubukana, ikanakangurira abayitangiye kuyigumaho kuko aribwo buzima. “Twipimishe SIDA k’uyifite gutangira no kuguma ku miti”.

Mu gutungiza mu Rwanda uburyo bwo kwipima virusi itera SIDA (HIV self-testing) Minisiteri y’Ubuzima ibicishije mu kigo cy’ubuzima (RBC), ivuga ko ubu buryo buzafasha abanyarwanda benshi kumenya uko bahagaze n’ubwo butagiye gusimbura ubwari busanzweho.

Ubu buryo bwo kwipima SIDA ntibukenera amaraso kuko agakoresho gakoreshwa wipima ugacisha mu kanwa ku ishinya kakajyaho amacandwe, wagakuramo, ukakanyuza mu gacupa karimo umuti usa n’amazi, igisubizo kikaboneka hagati y’iminota 20 n’iminota 40.

Gusoma ibisubizo by’aka gakoresho ntibisaba ubuhanga bwinshi kuko ari ukureba kuri aka gakoresho nyuma y’iminota yavuzwe haruguru wasanga hariho uturongo 2 dutukura ukaba  ufite agakoko gatera SIDA, wasangaho akarongo kamwe gatukura ukaba uri muzima mu gihe urebye ugasanga nta karongo na kamwe kariho uba usabwa kongera kwipima ukoresheje akandi gakoresho.

Aka gakoresho gakoreshwa inshuro imwe gusa ntikarashyirwa ku isoko ariko mu minsi mike karaba kari ahasanzwe hagurishirizwa imiti (farumasi) ku giciro cy’amafaranga ibihumbi bitanu (5000Rwf). Ubu buryo butangijwe mu gihe icyorezo cya SIDA kikiri ikibazo gikomereye abatuye isi n’u Rwanda by’Umwihariko kuko Abanyarwanda bagera kuri 40% badakozwa ibyo kwipimisha umubare munini muri bo ukaba ari urubyiruko  ruri hagati y’imyaka 15-24.

13 ku ijana by’Abanyarwanda bafite ubwandu bwa SIDA ntibigeze bipimisha ngo bamenye aho bahagaze batangire gufata imiti igabanya ubukana nk’uko bigaragazwa n’icyegeranyo cyo mu mwaka wa 2015.

Ubu buryo bwo Kwipima agakoko gatera SIDA buje busanga ibindi bikorwa bya Leta y’u Rwanda bigamije gufasha abatarandura aka gakoko gukomeza kwirinda, n’abanduye gukomeza kubaho neza nk’ibikorwa byo kuvura no guha abanduye imiti igabanya ubukana ubuzima bwabo bwose ku buntu, gufasha ababyeyi batwite banduye kubyara abana badafite ubwandu bwa SIDA no kongera amazu abantu baboneramo udukingirizo ku buntu.

Ku rwego mpuzamahanga twavuga ko ibikorwa byo kurwanya agakoko gatera SIDA byiyongereye bigatanga n’umusaruro kuko kuva umwaka ushize wa 2016 abagera kuri miliyoni 19.5 batangiye gufata imiti igabanya ubukana, ababyeyi batwite bafite agakoko gatera SIDA bagera kuri 76 ku ijana bafashijwe kubyara abana bazima. Imibare y’ubwandu bushya yagabanutseho 35 ku ijana kuva mu 2000 mu gihe hagati y’umwaka wa 2003 na 2016 imfu zikomoka kuri SIDA nazo zagabanutseho 48 ku ijana.

Panorama

Be the first to comment

Leave a Reply

Your email address will not be published.


*