Umunyamisiri Mohamed Salah yatorewe kuba umukinnyi w’umwaka muri Afurika

Mohamed Salah, Umunyamisiri w’imyaka 25 yegukanye igihembo cy’umukinnyi w’umwaka wa 2017 muri Afurika (Photo/AFP)

Panorama

Umunyamisiri Mohamed Salah w’imyaka 25 yegukanye igihembo cy’umukinnyi w’umwaka wa 2017 muri Afurika. Iki gihembo yakigezeho nyuma yo guhigika Sadio Mane ukomoka muri Senegal bakaba bakinana muri Liverpool na Pierre- Emerick Aubameyang ukomoka muri Gabon we akaba akinira Dortmund.

Ni mu muhango w’ibihembo by’abitwaye neza mu mupira w’amaguru ku mugabane wa Afurika, “Aiteo CAF Awards 2017” wabaye ku nshuro ya 25, i Accra muri Ghana.

Mohamed Salah wakiniye ikipe y’igihugu cya Misiri imikino icumi (10), akayitsidira ibitego bitanu, akanatanga imipira ibiri yavuyemo ibitego kuri bagenzi be, ni we wegukanye igihembo cy’umukinnyi w’umwaka wa 2017 muri Afurika.

Uyu mukinnyi yatowe ku majwi 625, Sadio Mane agira 507 na ho Pierre-Emerick Aubameyang we agira amajwi 311 aza ku mwanya wa gatatu.

Salah yatangiye umwaka ushize muri AS Roma, atsinda ibitego 10 mu mikino 20, anatanga indi mipira icyenda kuri bagenzi be yavuyemo ibindi bitego. Nyuma yaguzwe na Liverpool, akaba amaze kuyikinira imikino 29, atsinda ibitego 23 anatanga indi mipira umunani yavuyemo ibitego ku bo bakinana.

Mu mwaka ushize wa 2016, igihembo nk’iki cyari cyegukanwe na Riyad Mahrez, ukomoka muri Algeria ukinira ikipe ya Leicester City na yo yo mu Bwongereza.

Iki gihembo cyatangiye gutangwa na CAF mu 1992, kuko hagati ya 1970 na 1992, cyatangwaga na France Football.

Mu myaka 24 ishize (1992 – 2016), abakinnyi 16 ni bo bari bamaze kwegukana iki gihembo. Samuel Eto’o yacyegukanye inshuro enye ni ukuvuga 2003, 2004, 2005 na 2010, kimwe na Yaya Toure wacyegukanye mu 2011, 2012, 2013 na 2014.

Abedi Pele (1992), George Weah (1995), Rashid Yekini (1993), Emmanuel Amunike (1994), Nwankwo Kanu (1996 na 1999), Victor Ikpeba (1997), Mustapha Hadji (1998), Patrick Mboma (2000), El Hadji Diouf (2001 na 2002), Didier Drogba (2006 na 2009), Frederic Kanute muri 2007, Emmanuel Adebayor (2008) na Pierre Emerick Aubayemeyang ni abandi bakinnyi babashije kwegukana iki gihembo kuva gitangiye gutangwa na CAF.

Mu bari bitabiriye uyu muhango barimo umuyobozi wa CAF, Ahmad Ahmad, umunyamabanga wa FIFA, Perezida wa Ghana Nana Akufo-Addo, umufasha wa Perezida wa Liberia; George Weah, umuyobozi wa Aiteo yateye inkunga iki gikorwa, abakanyujijeho mu mupira w’amaguru barimo Didier Drogba, Carol Tshabalala n’abahanzi barimo Flavour n’abandi.

Ikipe Nkuru ya Afurika y’Epfo y’abagore ni yo yatowe nk’iy’umwaka muri iki cyiciro ihigitse amakipe ya Ghana na Nigeria yombi y’abatarengeje imyaka 20. Ibrahim Sunday yahawe igihembo cy’umukinnyi wakanyujijeho w’umwaka, Ahmed Yahya wa Mauritania aba umuyobozi w’umwaka.

Wydad Casablanca yo muri Maroc ni yo yabaye ikipe y’umwaka, ihigitse TP Mazembe na Al Ahly. Ibi iyi kipe ibigezeho nyuma yo kwitara neza yegukana CAF Champions League, yayihesheje itike yo kwitabira igikombe cy’Isi cy’amakipe.

Hector Couper utoza Misiri, yahawe igihembo cy’umutoza w’umwaka, ahigitse Gernot Rohr wa Nigeria na L’Hussein Amoutta wa Wydad Athletic Club Casablanca. Patson Daka ukomoka muri Zambia yatowe nk’umukinnyi ukiri muto mwiza ahigitse Krepin Diatta wo muri Senegal na Salam Giddou wo muri Mali.

Asisat Oshoala w’umunya-Nigeria yabaye umukinnyi w’umugore w’umwaka ahigitse Chrestina Kgatlana wa Afurika y’Epfo na Gabrielle Aboudi Onguene wo muri Cameroun. Ikipe y’igihugu ya Misiri y’abagabo yabaye iy’umwaka nyuma yo kuza imbere y’iya Cameroun n’iya Nigeria.

Abagize ikipe y’umwaka ya Afurika yatowe n’abafana

Umuzamu: Aymen Mathlouthi (Tunisia na Etoile du Sahel).

Ba myugariro: Ahmed Fathi (Egypt & Al Ahly), Eric Bailly (Cote d’Ivoire na Manchester United), Ali Maaloul (Tunisia na Al Ahly).

Abakina hagati: Mohamed Ounnajem (Morocco na Wydad Athletic Club), Karim El Ahmadi (Morocco na Feyenoord), Junior Ajayi (Nigeria na Al Ahly), Achraf Bencharki (Morocco na Wydad Athletic Club).

Ba rutahizamu: Khalid Boutaib (Morocco na Yeni Malatyaspor), Mohamed Salah (Egypt na Liverpool), Taha Yassine Khenissi (Tunisia na Esperance).

Muri iyi kipe y’umwaka ya Afurika igihugu cya Maroc ni cyo cyaciye agahigo kuko gifitemo abakinnyi bane. Abakinnyi bakomoka mu bihugu by’Abarabu ahanini akaba ari bo biganjemo.

Mohamed Salah, Umunyamisiri w’imyaka 25 yegukanye igihembo cy’umukinnyi w’umwaka wa 2017 muri Afurika (Photo/AFP)
Sadio Mane (ubanza ibumoso), Mohamed Salah (hagati) na Aubameyang bari bahataniye igihembo cy’umukinnyi w’umwaka muri Afurika (Photo/AFP)
Umutoza w’ikipe y’igihugu cya Misiri, Hector Couper, yabaye umutoza w’umwaka wa 2017 (Photo/AFP)

Be the first to comment

Leave a Reply

Your email address will not be published.


*