Umunyarwanda uba mu Bubiligi yageneye ubutumwa abadaheruka mu Rwanda

Rutayisire Boniface ubwo yari i Kigali mu kwezi k'Ukuboza 2017 (Ifoto/Ububiko)

Rutayisire Boniface ni umunyarwanda uba mu Bubiligi. Mu mpera z’umwaka ushize ni umwe mu bitabiriye inama ya 15 y’igihugu y’umushyikirano yateranye ku wa 18-19 Ukuboza. Yatashye yishimiye isura y’u Rwanda rufite ubu, uko abanyarwanda babanye anashimwa by’umwihariko Perezida Paul Kagame.

Mu kiganiro n’Ikinyamakuru Panorama, ubwo yari asoje inama y’igihugu y’umushyikirano yadutangarije ko yitandukanyije burundu n’abafite ibitekerezo birwanya Leta y’u Rwanda, avuga ko ashyize imbere inyungu z’igihugu kuruta iz’abantu ku giti cyabo kandi ntacyamubuza gukunda ubuyobozi bw’u Rwanda.

Ageze mu Bubiligi yakoze inyandiko yageneye abanyarwanda bari muri Diaspora, cyane cyane abarwanya Leta y’u Rwanda, abagaragariza ukuri k’u Rwanda.

Amakuru y’u Rwanda agenewe Diaspora nyarwanda  hirya no hino ku isi 

Banyarwanda, Banyarwandakazi mudaheruka mu Rwanda namwe mwese  muba mu murongo w’abarwanya Leta y’u Rwanda,

Mbandikiye mbasuhuza ariko ngira ngo nasabe abarwanya Leta ko basubiza ubwenge ku gihe kuko nasanze ibyo baba bibwira ntaho bihuriye n’uko igihugu giteye.

Mu minsi namaze mu Rwanda mu kwezi kwa cumi n’abiri 2017, nashoboye gusura imigi n’ibiturage ahantu henshi  hanyuranye.

Uko gusura ahantu kandi nabikoze amanywa n’ijoro kuko nagendaga amasaha nshakiye, nkagorobereza aho nshakiye hose ndetse nkasangira n’abantu bamwe tugatarama tukageza no mu masaha akuze cyane.

Icyansekeje n’ubu kikinsetsa ni ukurya akabenzi

Mu Rwanda hari ibintu byinshi byo guhanga udushya tugezweho cyane ku buryo iminsi ya mbere ubanza gutakara no kumvugo zikoreshwa.

Hari ahantu henshi hagezweho bagutembereza ugafata icyo kunywa no kurya (ifi, inkoko y’inyarwanda cyangwa ipondeze,  ibitoki, ibirayi byokeje, boyilo, agatogo,etc.).

Ariko icyanciye imbavu ni abansohokanye bati “tujye kurya akamodoka” ndabicuritse ahubwo ngo ni ukurya AKABENZI. Barabimbwiye ngo tujye KURYA AKABENZI ndapapaza nti “Ese akabenzi umuntu arakarya akabaho?”

Baransetse baratembagara bati “Akabenzi ni ingurube bategura neza, yumutse ku buryo uyiriyeho ayikunda cyane.” N’uyu munsi iyo mbyibutse ukuntu nabyakiriye bikabanza kumpahamura ndiseka nkatembagara.

Aho nagenze hose nahasangaga umutekano usesuye kuko nabaga nitwaye nta muntu nigeze naka umperekeza (escort) kuko numvaga nizeye umutekano wanjye ijana ku ijana.

Ntarafata urugendo rwerekeza i Kigali, hari bamwe babitekereje babingiramo inama mbere y’uko ngenda ko nkwiriye Escort; ariko ngeze mu Rwanda nasanze hari umutekano uhagije mu buryo ntabitekerezaga. Ibyo mbabwira rero nagize igihe cyo kwitegereza ntawe umpagaze hejuru.

Leta y’u Rwanda ntabwo ishonjesha abaturage, ababivuga barayibeshyera

Icya mbere cy’ibanze nababwira mukwiriye guhanagura, ni ikintu cyo kuvuga ko leta ishonjesha abaturage.

Icyo rwose mugihanagure burundu ku babivuga cyane cyane abarwanya Leta y’u Rwanda bakwiza amakuru ko u Rwanda rwose rushonje.  Mu Rwanda nta nzara rusange ihari.

Ku bijyanye no gushonjesha abaturage, nta mabwiriza cyangwa imigirire igamije gushonjesha abaturage ihari.

Ku bijyanye n’inzara, muri rusange mu Rwanda barejeje ndetse aho nageze hose bagiye banganuza ku myaka bejeje n’ubwuzu bwinshi cyane, kuko hose wasangaga banyikundiye cyane. Mu muco habaho umuntu akagira igikundiro nanjye nkunze kwikundirwa n’abantu, rero nsura u Rwanda nasanze ntaho cyagiye.

Ku bakwiza amakuru atariyo, icyo nabonye ahubwo  kigenderwaho na bamwe ni uko mu kugwa kw’imvura hari utuzinga cyangwa uduce usanga itaraguyemo uko bikwiye, ariko ugasanga na ho atari henshi.

Aho ni ho usanga bataka ko bashonje kandi na bwo usanga Leta y’u Rwanda ibitayeho cyane, kuko buri kagari wagereranya na “secteur” ya kera, gafite umukuru w’akagari bita Gitifu (Executif)  wize ubihemberwa, hakaba n’umusosiyari wize ubihemberwa na Leta  buri kwezi nk’aba bose tubona i Burayi. Umuturage rero ugize ikibazo cyo kuteza neza ntabwo atereranwa.

Kugira ngo ntange urugero rwumvikana, navuga nk’akarere Matata Joseph uyobora CLIIR akomokamo muri Kayonza yahoze yitwa Muhazi kera hamwe n’uturere tuhegereye.  Narahasuye nsanga ni ahantu bejeje imyaka myinshi cyane ku buryo bushimishije rwoseeee. Ndetse imyaka wasangaga iteye amabengeza cyane ku buryo waguma kuyireba.

Ibyo kandi ni uturere twose tuhegereye. Ariko igitangaje ni uko hari umusozi umwe mu misozi myinshi bambwiye ko utaguyeho imvura nk’iyindi ku buryo bo batigeze beza uko abandi bejeje. Matata Joseph arahazi nahamubwira ni umusozi wa Nyawera agace kamwe kandi iyindi misozi yose byegeranye irejeje.

None se ubwo wavuga ngo ako karere gafite inzara?  Wavuga se ngo ni leta yabashonjesheje? None se iyo wowe wiyita opoza (opposant), ufashe urugero nk’urwo ukaruhindura rusange ku Rwanda rwose uba ukora politiki yafasha abanyarwanda?

Aho rero ni ho nsaba buri wese guhindura ibyo atangaza k’u Rwanda bitajyanye n’ukuri.

Maze kuzenguruka u Rwanda nasanze abiyita opozisiyo (opposition) bagomba guhwiturwa kuko ibyo batangaza ntabwo bijyanye n’ukuri kandi ntabwo byafasha igihugu n’umuturage kuko aba atari ukuri.

Politiki ireba abahinzi b’ibirayi

Muri iki gihe haravugwa ko abahinzi b’ibirayi babangamirwa ariko sibyo. Ahubwo ikiriho ni uko abahinzi barimo kwigishwa uburyo bushya  ibirayi bejeje bitahinduka akajagari bakabihomberamo. Ndetse hamaze guhanwa abayobozi benshi bazizwa gushaka guhenda umuturage cyangwa kumwiba bamuha igiciro kitari cyo.

Ku mafaranga bahabwa ku kiro muri iki gihe, ubaretse bigahinduka akajagari nta n’ubwo babona kimwe cya gatatu (1/3) cy’ayo bahabwa. Ikigaragara ahubwo ni uko sisiteme (systeme) iriho ari nziza ariko ikaba itaramenyerwa n’abaturage ku buryo ubukangurambaga bugomba gukomeza kwigisha bihagije.

Ku bijyanye n’ubuyobozi 

Ikintu nabonye gikomeye cyane ni uko abayobozi batinya abaturage cyane ku buryo bukomeye. Na none kandi abaturage bazi uburenganzira bwabo ku kigero cyo hejuru cyane ndetse ntibatinya abayobozi nka kera ku ngoma zindi zahozeho.

Ikindi nabonye ni uko abayobozi bakora cyane ahubwo ugasigara ufite impungenge niba nta ngaruka ku buzima bwabo, kuko usanga birenze urugero, ariko iyo muganiriye usanga ari wo muvuduko bamenyereye gukoreraho.

Ikindi kigaragara ni uko umuturage yitaweho cyane na Leta ku buryo buhanitse muri byose. Byarantangaje aho umutegetsi -Gitifu (Executif) aba ahangayikishijwe no gutanga raporo irimo abantu bahanduwe amavunja n’ibindi bintu nk’ibyo by’ubuzima bwa buri munsi bw’umuturage.

Icyitonderwa: Uko mbonye akanya nzajya nkomeza mbaganirire.

Bruxelles, le 10/01/2018

RUTAYISIRE Boniface

Rutayisire Boniface ubwo yari ageze i Gahini mu karere ka Kayonza (Photo/Courtesy)

Be the first to comment

Leave a Reply

Your email address will not be published.


*