Mubiligi Fidele yatorewe kuyobora Ishyirahamwe ry’imikino ngororamubiri mu Rwanda

Mubiligi Fidele watorewe kuyobora RAF yavuze ko agiye kongera gukundisha abanyarwanda imikino ngororamubiri (Photo/Izuba Rirashe)

Panorama

Ku cyumweru tariki ya 28 Mutarama 2018, Ishyirahamwe ry’Imikino ngororamubiri mu Rwanda (RAF), ryagize amatora ya Komite Nyobozi nshya, aho Mubirigi Fidèle wari umukandida umwe rukumbi yatsinze n’amajwi 5 kuri 5.

Mubirigi Fidele yatanzwe n’ikipe ya APR, na ho ku mwanya wa Visi Perezida ntawawutorewe kuko nyuma y’uko uwari wawusabye yavanyemo candidature ye ntihabonetse undi uwiyamamariza.

Umunyamabanga Mukuru yabaye Mutangana Olivier waturutse mu ikipe ya Rwamagana, yabonye amajwi 4 kuri 5, ushinzwe umutungo yabaye Tabaruka Dieudonné wabonye amakwi 5 kuri 5, akaba aturuka mu ikipe ya NAS.

Mu bajyanama hatsinze Sandrine Murangwa wagize amajwi 5/5 na Mutuyezu wabonye amajwi 4 kuri 5.

Mu bagenzuzi hatowe Saidi Hamisi watanzwe n’ikipe ya APR wabonye amajwi 4 kuri 5 na Musabyemariya Delphine waturutse mu ikipe ya Rwamagana wagize amajwi 5 kuri 5.

Mubirigi yavuze ko agiye kongera gukundisha Abanyarwanda imikino ngororamubiri, abakinnyi bakitwara neza mu marushanwa abera mu Rwanda n’ayo ku rwego mpuzamahanga, ikindi yavuze ni uko yiteguye gufatanya n’abakinnye kera imikino ngororubiri ndetse n’undi wese ushaka kubaka iyi siporo.

Muri aya matora kandidatire ya Umuhoza Angelique watanzwe n’ikipe ya Nyamasheke wari wasabye ku mwanya w’Umujyanama, yakuwemo.

Nk’uko tubikesha Izura Rirashe, Capt Rutagengwa Oswald wari uyoboye komisiyo y’amatora yavuze ko “candidature” ya Angelique bayanze ku munota wa nyuma kuko Umuyobozi w’Akarere ka Nyamasheke yandikiye ibaruwa Ishyirahamwe ry’imikino ngororamubiri mu Rwanda ivuga ko itazi uwo mukandida.

Amatora y’Ishyirahamwe ry’imikino ngororamubiri mu Rwanda yabereye muri Sitade Amahoro i Remera.

Mubirigi yasimbuye Munyandamutsa Jean Paul wari umaze imyaka ibiri ku buyobozi bw’Ishyirahamwe ry’Imikino ngororamubiri mu Rwanda (RAF) waje kuri uwo mwanya asimbuye Nkezabo Jean Damascene wari umaze gusezera atarangije manda.

Be the first to comment

Leave a Reply

Your email address will not be published.


*