Imikino ya gisirikare y’umunsi w’intwari igeze ku musozo

Muri 1/2 ikipe ya GHQ yatsinze iya RAF ku manota 61-44 izacakirana n'iya SOF (Ifoto/Panorama)

Rene Anthere

Imikino inyuranye ihuza abasirikare mu rwego rwo gutegura umunsi w’intwari igeze ku munsi wa nyuma, kuko imikino yose ya nyuma izakinwa ku wa 31 Mutarama 2018.

Mu mupira w’amaguru, Ikipe y’umupira w’amaguru y’abarinda umutekano w’Umukuru w’igihugu n’abandi bayobozi bakuru b’igihugu (Republican Guard Rwanda) yageze ku mukino wa nyuma itsinze iy’abasirikare bakorera ku cyicaro gikuru cya gisirikare (General Headquarters) ibitego 3-0.

Ikipe ya RG izahura ku mukino wa nyuma n’iya Diviziyo ya mbere (1DV) yakuyemo iya Diviziyo ya gatatu (3DV) iyitsinze ibitego 5-1.

Muri Basketball, ikipe y’abasirikare bakorera ku cyicaro gikuru (GHQ) izakina n’iya SOF (Special Operations Force). Muri Volleyball ikipe y’abasirikare barwanira mu kirere (RAF: Rwanda Airforce) izakina n’iya SOF, na ho muri Handball ikipe ya RAF izakina n’iya SOF. Muri Netball ikipe y’abasirikare (abakobwa) bakorera ku cyicaro gikuru begukanye igikombe nyuma yo gutsinda iya RAF ku manota 31 kuri 12.

Nk’uko bitangazwa n’Umuyobozi ushinzwe Siporo mu Ngabo z’u Rwanda Lt Col TS Kinesha, aya marushanwa agamije gushimangira ubuzima buzira umuze mu basirikare, ubusabane n’ubufatanye hamwe no kuzamura morale mu basirikare. Aya marushanwa kandi anagamije kuvumbura impano zitandukanye mu mikino ziri mu Ngabo z’u Rwanda.

Iyi mikino yatangiriye hasi mu mitwe igize Ingabo z’igihugu, ku itariki ya 1 Ukuboza 2017. Abagize imitwe itandukanye y’Ingabo z’U Rwanda bararushanwa mu mikino inyuranye irimo kurasa, umupira w’amaguru, basketball, volleyball, handball, netball hamwe n’imikino ngororamubiri.

Abazegukana ibihembo mu mikino itandukanye bazabishyikirizwa ku itariki ya 1 Gashyantare 2018 kuri Stade Amahoro nyuma y’imikino y’igikombe cy’intwari. Police FC izakina na AS Kigali saa saba z’amanywa (13:00) na ho APR FC ikine na Rayon Sports saa cyenda n’igice (15:30).

Ikipe ya GHQ ntiyoheye iya SOF (Ifoto/Panorama)
Mu mupira w’amaguru ikipe ya RG (yambaye umweru) yasezereye iya GHQ iyitsinze ibitego 3-0 mu mikino ya 1/2.

Be the first to comment

Leave a Reply

Your email address will not be published.


*