Hari abadafite amahirwe ku nguzanyo y’ibikoresho bya BDF

Marie JoseeUwiringira

  • Uzi imyuga atabifitiye impamyabushobozi nta mahirwe afite ku nguzanyo y’ibikoresho ya BDF

Mu gihe gahunda yo gufasha urubyiruko n’abagore, bahabwa inkunga n’inguzanyo y’ibikoresho ireba abafite impamyabushobozi yemewe n’ikigo cy’igihugu gishinzwe guteza imbere imyuga n’ubumenyingiro (WDA) gusa; abakora imyuga badafite impamyabushobozi na bo bavuga ko bifuza kubona kuri ayo mahirwe kuko na bo bakeneye ubufasha ngo batere imbere.

Bamwe mu bakora imyuga bavuga ko kutagira impamyabushobozi zitangwa na WDA byabadindije mu iterambere, kuko ngo n’ubwo uburambe bafite mu kazi cyangwa amashuri bize mbere bituma bakora neza imyuga bakora, bafite imbogamizi zo kudahabwa amahirwe nk’ay’abo barangiza kwiga, yo gufashwa n’Ikigegacy’Ingwate cya BDF kubona inkunga n’inguzanyo mu bigo by’imari.

Inkunga n’inguzanyo byishingiwe na BDF, bihabwa agaciro k’amafaranga y’u Rwanda, ariko bigatangwa mu bikoresho muri gahunda ya Toolkit Program yatangiriye ku rubyiruko rwarangizaga kwiga imyuga ku kigo cya Iwawa mu mwaka wa 2014, ariko mu mwaka wa 2016 gahunda yageze no ku rubyiruko n’abagore bigiye imyuga ku bindi bigo ariko bikabaha impamyabumenyi yemewe na WDA.

Mukanziga Jeannete, umaze imyaka 15 akora akazi ko gusuka imisatsi y’abagore. Ahamya ko hari bagenzi be bakora umwuga neza kandi batarawize. Ngo ndetse hari n’abize imyuga mbere y’uko WDA ibaho. Asanga rero guha amahirwe abakirangiza kwiga bonyine, ari ukurenganya abasanzwe bakora kuko na bo bakeneye ayo mafaranga ngo biteze imbere.

Aragira, ati “ntacyo baturusha mu byo gukora,uretse ko inkunga ziza zikaba ari bo zigeraho bonyine, kandi natwe ayo mafaranga tuyakeneye ngo turebe ko twagira ibikorwa by’iterambere bigaragara. Nk’ibikoresho bya Salo (Salon de coiffure) birahenda nta muntu wabyibonera acungira ku yo ahabwa n’abakiriya gusa”.

Ikigo cya WDA cyatangiye gukorera isuzuma abakora imyuga batabifitiye impamyabushobozi, abatsinze kigahita kizibaha (Impamyabushobozi) ngo bazifashishe basaba inkunga muri BDF.

Mu ntangiro z’umwaka wa 2018, Gasana Jerome, Umuyoboziwa WDA, yaravuze, ati “twakoreye isuzuma abafundi ibihumbi cumin a kimwe icya rimwe ariko hari n’abandi twagiye duhugura, ku buryo mu minsi mike turaba tugeze ku bihumbi makumyabiri. Gahunda iriho ni uko buri mufundi wese mu gihugu azakorerwa isuzuma. Ariko turimo turaganira n’ibindi byiciro by’abakora imyuga nk’abatunganya imisatsi, ngo na bo tubahe ayo mahirwe”.

Kuva muri Gashyantare 2017, ku bufatanye na Sendika y’abafundi, ababaji n’abanyabukorikori (STECOMA), ni bwo WDA yatangiye guha abo bafundi impamyabushobozi , nyuma yo kubakorera isuzuma.

Abanyamyuga bataragerwaho n’iyi gahunda, bifuza ko na bo bakorerwa isuzuma kuko ngo abenshi mu muri bo bafite inshingano zo gutunga imiryango yabo bifashishije amafaranga bakura mu kazi ku buryo batabona umwanya wo kujya mu ishuri kwiga ngo bahabwe impamyabushobozi.

Uwitwa Gasongo wubaka ibisenge by’inzu, ati “bazaduhe ibizamini kuko natwe izo mpamyabushobozi turazikeneye ngo natwe tujye dusaba inkunga kandi ibyo turabikeneye ngo twiteze imbere. Iyo urebye imikorere y’umwana urangije kwiga n’iyo yaba yarize amashuri atandatu mu myuga, hari igihe usanga arushwa n’uwa byize ahereye ku buyedi.”

Inkunga n’inguzanyo z’ibikoresho zishingirwa na BDF, zihabwa amatsinda cyngwa Koperative z’urubyiruko cyangwa abagore bafite impamyabushobozi ziriho umukono wa WDA. Ibigo by’imari bitanga ibikoresho byo kwifashisha mu mushinga w’uwasabye inguzanyo; mu kwishyura akazishyura igice na BDF ikamwishyurira ikindi.

Be the first to comment

Leave a Reply

Your email address will not be published.


*