MINEDUC: Abakobwa batsinze kurusha abahungu mu bizamini bisoza amashuri yisumbuye

Panorama

Ku wa 23 Gashyantare 2018, ni ho Minisiteri y’Uburezi yashyize ku mugaragaro ibyavuye mu bizamini bya Leta bisoza umwaka w’ amashuli 2017. Ni amanota y’abanyeshuri basoje umwaka wa 6 w’amashuri yisumbuye, bakaba baratsinze ku kigero cya 89%.

Minisiteri y’Uburezi (MINEDUC) yatangaje ko ishimishijwe n’amanota y’uyu mwaka, kuko muri rusange byagaragaye ko gutsinda byiyongereyeho 0.4% ugereranyije n’umwaka wa 2016. Mu masomo asanzwe abakobwa bakaba baratsinze ku kigero cyo hejuru ugereranyije n’abahungu.

Abanyeshuri bakoze ibizamini bose bangana na 40753, abakobwa bari 22,429 bangana na 55.04% naho abahungu ari 18324 bangana na 44.96%.

Mu mashuri y’imyuga n’ubumenyingiro hakoze abanyeshuli 22101, abatsinze bose hamwe bangana na 89.3%. Na ho mu mashuri y’inderabarezi hakoze abanyeshuri 3,009 barimo abakobwa 1,753 n’abahungu 1,256. Abatsinze bangana na 2,987 bari ku kigereranyo cya 99.27%.

Minisitiri w’Uburezi, Mutimura Eugène yagaragaje ibyishimo batewe n’iyi ntsinzi. Ati “Ibi ni ibyo kwishimira kuba abakobwa baraje imbere mu gutsinda cyane.”

Ibigo by’imyuga n’ubumenyingiro bizashyikirizwa amanota y’abanyeshuri babo ku wa Gatatu tariki 28 Gashyantare 2018, ariko uhereye umunsi aya manota yatangarijwe ubu umunyeshuri ashobora kubona amanota ye yifashishije murandasi (internet) cyangwa telefone igendanwa.

Abanyeshuri baratangira kureba amanota bagize bifashishije ubu buryo bwombi. Ku bize imyuga n’ubumenyingiro kureba amanota ku buryo bwa telefone ni ukujya ahandikirwa nomero ugiye guhamagara, ukandika *775# ukemeza ubundi ugakurikiza amabwiriza.

Na ho abize andi masomo bareba amanota yabo banyuze ku rubuga rwa REB (http://www.reb.gov.rw) cyangwa bagakoresha ubutumwa bugufi kuri telefone, bajya ahandikirwa ubutumwa bugufi bakandika S6 hagakurikizwaho umubare uranga umunyeshuri bifatanye bakohereza kuri 489.

Abakandida bigenga bo bazabona amanota yabo guhera ku itariki ya 7 Werurwe 2018, bakazayafatira ku biro by’ikigo gishinzwe guteza imbere imyuga n’ubumenyingiro (WDA).

Be the first to comment

Leave a Reply

Your email address will not be published.


*