Kigali: Imodoka nke zitwara abagenzi zituma binubira serivise bahabwa

Abajya Kimironko mu gitondo bajya ku murongo wo gutegereza imodoka muri gare ya Nyabugogo (Ifoto/Marie Josée U.)

Marie Josee Uwiringira

Muri Gare ya Nyabugogo no ku byapa abagenzi bahagararaho bateze imodoka, bamara igihe kinini ku murongo bazitegereje, bigatuma binubira serivise bahabwa kuko bibicira izindi gahunda. Jali Holidings, ikigo gikuriye amasosiyeti atanga serivise zo gutwara abagenzi mu Rwanda, kigiye gushyiraho imihanda yihariye y’imodoka zitwara abagenzi no gukoresha imodoka nini nk’umuti w’iki kibazo.

Kuva mu mwaka wa 2013,  ikibazo cy’imirongo y’abagenzi batega imodoka zitwara abagenzi mu mujyi wa Kigali cyaravuzwe ndetse kikagawa n’abazikoresha, binubira uburyo bamara umwanya munini ku murongo bakahanyagirirwa n’imvura cyangwa bakicwa n’izuba, kandi bikabangamira gahunda za bo.

Mu masaha ya mu gitondo n’ay’umugoroba, abakozi bava cyangwa bajya ku kazi, ni bwo iki kibazo kigaragara cyane. Abakozi batega izi modoka buri munsi batangaza ko kuzitegereza umwanya munini bibicira gahunda z’akazi ndetse ngo hakaba hari n’abagira igihombo cy’amafaranga kubera gutega moto.

Icyerekezo Nyabugogo – Kicukiro, ni hamwe mu hategera abantu benshi kuko n’aberekeza mu karere ka Bugesera baba bagomba kujya gufatira imodoka zijya yo muri Gare ya Kicukiro. Umulisa Liliose, mwarimukazi mu karere ka Kicukiro, atuye mu murenge wa Kimisagara, buri munsi aba agomba gutega imodoka inshuro ebyiri kugira ngo agere ku kazi. Avuga ko ahangayikira cyane  ku murongo w’imodoka zijya Kicukiro,  kuko uba uriho abantu benshi n’imodoka yaza ntibatware bose.

Aragira, ati “ni gake ngerera ku gihe ku kazi . Abayobozi banjye baranyinubye bararuha kandi mu by’ukuri simba naryamiriye. Ahubwo iyi ligne (icyerekezo) ifite abagenzi benshi ariko imodoka ni nke. Uhagera saa kumi n’ebyiri n’igice, akazi kagomba gutangira saa moya n’igice ariko hari n’igihe zikugereraho utarayicaramo”.

Ikibazo cya serivise itanoze ihabwa abatega imodoka zitwara abagenzi muri rusange kigarukwaho  na Mugabo Justin, umuyobozi w’Ikigo cy’Itangazamakuru Isango Stars. N’ubwo Isango Star ifatanya na RDB (Ikigo cy’igihugu cy’Iterambere ), gukora ubukangurambaga ku kwakira neza ababagana muri gahunda  yiswe “Na Yombi”; Mugabo asaba ko uburyo bwo gutwara abagenzi bwanozwa.

Ati “abazi mu bihugu by’Uburayi uhagarara ahantu ukaba uzi neza ko mu masegonda make, uhita ubona ikigutwara. Ariko muri Kigali, muzi uburyo abagenzi banyagirirwa ku muhanda bategereje imodoka ibatwara. Aho ni ahantu nk’abayarwanda batanga serivisi, twakagombye gutekereza abanyamahanga  baza batugana”.

Muri Kanama 2013, binyuze mu ipiganwa, nibwo Ikigo cy’igihugu gishinzwe imirimo imwe n’imwe ifitiye igihugu akamaro (RURA) n’Umujyi wa Kigali, bemereye amasosiyeti nka KBS, Royal Express na RFTC kuba ariyo yonyine azajya atwara abagenzi mu byerekezo bitandukanye mu mujyi wa Kigali.

Ibi ngo bikaba byari bigamije gukemura ikibazo cy’abagenzi basaga ibihumbi 200, ubuyobozi bw’Umujyi wa Kigali bwavugaga ko bakerererwa akazi cyangwa bagahendwa n’ingendo kubera akajagari karangwaga mu gutwara abantu. Aya masosiyete rero akaba yari yiyemeje gukoresha imodoka nini no kutamara iminota irenze itanu ku cyapa.

Guca akajagari ntibyakemuye ikibazo cyo gutinda ku mirongo

Kihangire Bishop , Ushinzwe ubuvugizi mu kigo Jali Holdings, atangaza ko hari ibisubizo birimo gushakirwa, iki kibazo kandi kikaba kigomba kuboneka vuba. Avuga ko  kuvugurura gahunda yo gutwara abagenzi byahereye ku kugabanya akajagari kagaragaragamo, maze buri modoka zihabwa icyerekezo zigomba gukoreramo.

Kihangire  asobanura ko kuri ubu barangije kubona ibyerekezo bigira abagenzi benshi n’amasaha imirongo miremire, hakaba hagiye gukurikiraho gahunda yo kujya babashakira inzira.

Ati “Guhera mu kwezi kwa gatatu, imodoka zitwara abantu muri rusange zigiye guhabwa imihanda ya zo yihariye masaha yo kujya no kuva ku kazi. Guhera saa kumi n’ebyiri  kugera saa mbiri n’igice za mu gitondo. Izindi modoka zizajya zihagarara bazibuze guhita, kugira ngo bisi yihutishe abantu bagere aho bajya vuba ndetse inagaruke ize gutwara abandi”.

Ikindi gisubizo cyihuse mu gukemura ikibazo cy’imirongo, ngo amasosiyeti atwara abagenzi agiye guhindura imodoka yakoreshaga, ave ku modoka zitwara abantu29 (Coaster), akoreshe amabisi manini abasha gutwara abantu 70.

Nsabimana Emmanuel, Ushinzwe itumanaho no gushyiraho amategeko agenga ubukerarugendo mu Kigo cy’igihugu gishinzwe iterambere (RDB), ahamya ko ikibazo kiri muri gahunda yo gutwara abagenzi mu mujyi wa Kigali kidashingiye kuri serivise zitangwa n’abatwara abagenzi gusa, aho bwo ko hariho n’ikibazo cy’ibikorwa remezo bidahagije.

Ati “hari igihe birenga kuba bafata abantu neza bikajya ku bikorwa remezo. Kuko umuhanda uko ungana, n’imodoka ziri muri Kigali bishobora gutuma icyo kintu cyo gutinda kibaho. Ariko ku bijyanye no kwakira neza ababagana, RDB ifatanya na RURA na RGB gutanga amahugurwa mashyirahamwe abatwara abagenzi. Ibyo by’ibikorwa remezo bikarebwa n’izindi nzego zibishinzwe”.

Mu buryo burambye, Kihangire Bishop, Umuvugizi  wa Jali Holdings, avuga ko hari gukorwa inyigo yo gukora imihanda yihariye imodoka zitwara abagenzi muri rusange zizajya zicamo zonyine.

Abisobanura muri aya magambo “dufite icyizere ko mu mpera z’uyu mwaka [2018],  inyigo izaba igaragaje uburyo byizwe, iyo mihanda ikazajyaho, aho imodoka rusange zizajya zicamo zonyine; igihe kikazanagera  mu mujyi wa Kigali   umuntu azajya abona kugenda mu modoka ye bihenze mu rwego rw’amafaranga no mu rwego rw’igihe kurusha gutega bisi”.

Ubushakashatsi buheruka gushyirwa ahagaragara na RGB k’uko abaturage babona ibibakorerwa, CRC (Citizen Report Card) 2017, imitangire ya Serivise iri ku kigereranyo cya 70%. Serivise zitangwa n’abikorera zikaba zinengwa kurusha izitangwa n’inzego za Leta.

Kihangire Bishop, Umuvugizi wa Jali Holdings (Ifoto/Marie Josée U.)
Umurongo w’abateze imodoka zijya Kicukiro muri Gare ya Nyabugogo nimugoroba (Ifoto/Marie Josée U.)
Umurongo w’abateze imodoka zijya Kicukiro muri Gare ya Nyabugogo mugitondo (Ifoto/Marie Josée U.)

 

 

 

Be the first to comment

Leave a Reply

Your email address will not be published.


*