Umushinga w’ishuri ry’ikoranabuhanga ku ndwara zibagwa uzavugurura ubuvuzi mu Rwanda

Prof Jacques Marescaux Umuyobozi wa IRCAD mu kiganiro n'abanyamakuru i Kigali.jpg

Hakizimana Elias

Impuguke mu by’ubuvuzi Prof. Jacques Marescaux agiye gutangiza umushinga w’ishuri rizigisha abaganga kuba inzobere mu kubaga indwara badasatuye, hifashishijwe ikoranabuhanga rya mudasobwa.

Uyu mushinga witezwe mu gihe kitagera mu myaka itatu ukaba wageze mu Rwanda, uzateza imbere ubuvuzi bwo kubaga indwara zirimo na kanseri, ndetse uzanafasha ibihugu byinshi by’Afurika.

Ni umushinga w’ikigo cyo mu bufaransa cyitwa IRCAD gihagarariwe na Prof. Jacques Marescaux.

Marescaux yavuze ko uyu mushinga w’ishuri (center of excellence) uzafasha mu gukemura zimwe mu mbogamizi mu minogereze ya serivisi z’ubuvuzi mu Rwanda no muri Afurika, nk’umubare muke w’abaganga b’inzobere.

Iri koranabuhanga kandi rizifashisha ibikoresho kabuhariwe mu kubaga indwara hadasatuwe igice kinini, bityo ngo bikazagabanya ingaruka zishobora kubaho nyuma yo kubagwa.

Abarwayi  bagera ku bihumbi 750 ku Isi yose bagerwaho n’ingaruka zo kubagwa hakoreshejwe uburyo busanzwe busatura igice inini cy’umubiri nk’uko Marescaux yabisobanuye mu kiganiro yagejeje ku mpuguke za Minisiteri y’ubuzima mu Rwanda ndetse n’itangazamakuru muri iki cyumweru.

IRCAD I ikigo cyatangiriye mu Bufaransa mu myaka 25 ishize, cyagabye amashami muri Taiwan, Latin America, Rio de Janeiro, Saopolo ubu kikaba kije gukorera mu Rwanda.

Uyu mushinga uje nyuma ‘ibyifuzo by’abanyeshuri bo muri kaminuza bifuje kugira ubunararibonye mu kubaga bakoresheje ikoranabuhanga ryifashisha mudasobwa.

Marescaux yagize ati “naje mu Rwanda muri Nyakanga umwaka ushize wa 2017 ntazanywe n’iki gitekerezo gusa, nyuma y’inama nagiranye n’abadogiteri na minisiteri y’ubuzima, naje gusanga ko ari ngombwa ko uyu mushinga wakorerwa mu Rwanda, kuko ni igitekerezo cyashimwe na benshi.”

Akomeza avuga ko kandi ari igitekerezo cyakiriwe neza na Perezida wa Repubulika Paul Kagame.

Inyubako y’iki ikigo cy’ishuri ry’impuguke mu kubaga indwara hifashishijwe ikoranabuhanga iratangira muri Nyakanga 2018, ikazamara imyaka ibiri irengaho gato. Izubakwa mu murenge wa Masaka mu karere ka Kicukiro.

Itsinda ry’impuguke zo mu Bufaransa iki kigo nikimara kubakwa zizoherezwa mu Rwanda kwigisha no gufasha abanyarwanda muri ubu buvuzi.

Ikoranabuhanga ry’ubu buvuzi usibye kugabanya ingaruka za nyuma yo kubagwa, rinatuma umurwayi akira vuba agataha.

Marescaux yatangaje ko Minisiteri y’ubuzima izakora ku bijyanye n’inyubako, IRCAD igatanga ibikoresho byo kuvura hifshishijwe iri koranabuhanga.

Dr Hategekimana Theobald, Umuyobozi Mukuru w’Ibitaro bya Kaminuza bya Kigali, CHUK, avuga ko mu Rwanda hari umubare muto w’abaganga basanzwe babaga indwara bakoresheje ubu buryo, ariko bitari ku rwego rwo Hejuru. Avuga ko iki kigo kizaba igisubizo ku baturarwanda ndetse n’abatuye Afurika.

“Mu Rwanda ubu twari dufite umubare muto w’abaganga bavura bakoresheje iri koranabuhanga ariko bitari ku rwego rwo hejuru. Icyo dukeneye ni uko abadogiteri basanzwe bakora ndetse n’abanyeshuri bazajya barangiza amasomo muri ubu buvuzi, bazajya baba bafite ubunararibonye mu kubaga indwara hifashishijwe iri koranabuhanga.”

Yongeyeho ko iki kigo (Center for excellence) kizongera ubukerarugendo bushingiye ku buvuzi (Medical tourism) kuko abanyamahanga benshi bazakenera kuza kwivuza mu Rwanda.

Be the first to comment

Leave a Reply

Your email address will not be published.


*