Karama: Umunsi w’abagore waranzwe no kuremera abatishoboye

Abagore batishoboye baremewe amatungo magufi (Ifoto/Christian)

Shami Christian/Nyagatare

Ku wa 8 Werurwe 2018, Umunsi w’abagore mu murenge wa Karama mu karere ka Nyagatare wizihirijwe Ku rwunge rw’amashuri rwa Bushara. Uwo munsi waranzwe no kuremera bamwe mu bagore batishoboye no gushima ibyagezweho.

Uhagarariye inama y’abagore mu murenge wa Karama, Mukandera Genevieve, yashimiye abagore ku bikorwa by’indashyikirwa bakoze birimo kugurirana matela, ibikoresho byo mu gikoni, intebe za pulasitiki, n’ibikoresho byo kubika amazi byose bifite agaciro ka miliyoni mirongo itatu n’imwe n’ibihumbi ijana na mirongo inani (3118000Frw).

Mu butumwa yatanze yasabye ko bakomeza kwigira bitabira kwibumbira mu mashyirahamwe no kuyoboka ibigo by’imari kugira ngo bibafashe kwikura mu bukene. Asoza asaba abagore gushimira Nyakubahwa Perezida wa Repubulika Paul Kagame wabahaye ijambo.

Madame Manariyo Fatuma wari intumwa y’akarere muri ibyo birori yashimiye abagore bo mu murenge wa Karama intambwe bagezeho mu kwiteza imbere.

Ibirori byaranzwe cyane n’imbyino zinyuranye z’amatorero yari yaturutse mu tugari twose uko ari turindwi tw’umurenge wa Karama.

Ibirori kandi byasojwe no kuremera abagore batishoboye cumi na bane baturutse mu tugari twose aho bashyikirijwe amatungo magufi y’ihene n’ibitenge no gusura icyumba cy’umukobwa cy’Urwunge rw’amashuri rwa Bushara aho batambagijwe berekwa n’umuyobozi w’ikigo Kagame Emmanuel uburyo abakobwa bitabwaho iyo bari ku ishuri.

Abagore batishoboye baremewe amatungo magufi (Ifoto/Christian)
Abagore batishoboye baremewe amatungo magufi (Ifoto/Christian)
Ntibahawe amatungo gusa kuko bahawe n’ibitenge n’ibikoresho by’isuku (Ifoto/Christian)
Icyumba cy’umukobwa mu rwunge rw’amashuri rwa Bushara (Ifoto/Christian)

Be the first to comment

Leave a Reply

Your email address will not be published.


*