Gicumbi: Abanyamabanga Nshingabikorwa barasaba gukurirwaho inshingano zo kurangiza imanza

Bayingana Jean Marie Vianney, Umunyamabanga Nshingwabikorwa w'Umurenge wa Nyankenke (Ifoto/Marie Josee U.)

Marie Josee Uwiringira

Guhuza inshingano zo kuyobora no kurangiza imanza ku banyamabanga Nshingwabikorwa b’utugari n’ab’imirenge babibonamo imbogamizi, kuko hari igihe batabikora neza kubera guheranwa n’akazi k’ubuyobozi nk’inshingano zabo za buri munsi.

Nk’abahesha b’inkiko batari ab’umwuga, aba banyamabanga Nshingwabikorwa baba bagomba kurangiza imanza zaciwe n’abunzi cyangwa izaciwe n’inkiko. Bamwe muri bo ntibabikorera ku gihe babitewe n’izindi gahunda z’akazi cyangwa impungenge z’ingaruka zishobora kuba kubarangirizwaho urubanza.

Bayingana Jean Marie Vianney, Umunyamabanga Nshingwabikorwa w’Umurenge wa Nyankenke, avuga ko rimwe na rimwe habaho gukerereza kurangiza imanza ariko akenshi bikaba bitabaturukaho.

Ati “mu kurangiza izo manza tubifatanya n’akandi kazi. Birashoboka ko akarere cyangwa intara batumiza inama, icyo gihe iyo wagize iyo nama itunguranye biba ngombwa ko wimura itariki wahaye umuturage ariko we abifata nko gukerererwa”.

Ikindi kibangamira abanyamabanga Nshingwabikorwa ni ukurangiriza urubanza ku muturage babona ko bishobora kugira ingaruka ku mibereho ye n’iy’umuryango.

Uwamungu Jules, Umunyamabanga Nshingwabikorwa w’akagari ka Yaramba, umurenge wa Nyankenke, we ngo hari ubwo abanza kugisha inama mbere yo kurangiza urubanza.

Aragira, ati “iyo tubonye ari ibintu bishobora guteza ibibazo twiyambaza abandi badukuriye bakaduha inama. Nko mu gihe uwo ugiye kurangirizaho urubanza bisaba kumukura mu nzu kandi adafite aho yerekeza umuryango, tuba tugomba kubanza kumusabira ubufasha ku rwego rw’ubuyobozi”.

Abahesha b’inkiko batari ab’umwuga bahabwa amahugurwa ku mategeko arebana n’irangiza ry’imanza, ariko ingingo ya 55 n’iya 56 z’Itegeko rigenga umurimo w’abahesha b’inkiko mu Rwanda, zigenera ibihano k’ubikoze nabi. Ibyo bituma bamwe muri bo bifuza ko izo nshingano zahabwa abandi.

Uwamungu, ati “Byaba byiza bazanye umukozi usobanukiwe n’amategeko akaba ari byo yinjiramo cyane byadufasha kuko tuba dufite n’izindi nshingano”.

Naho Bayingana, yifuza ko kurangiza imanza byakorwa n’urwego. Ati “turasaba ko kurangiza urubanza, byaba inshingano z’urwego. Nko mu murenge dufite abayamategeko nk’ushinzwe irangamimerere n’umukozi ushinzwe ibikorwa remezo. Tugira inshingano nyinshi ku buryo babihaye nk’umukozi ushinzwe irangamimerere  kuko ari we uzi amategeko yajya abidufashamo mu murenge”.

Ubuyobozi bw’akarere ka Gicumbi nk’urwego rukoresha abanyamabanga nshingwabikorwa, ntibushyigikiye ko bakurirwaho inshingano zo kurangiza imanza, ahubwo Umuyobozi w’ako karere Mudaheranwa Juvenal, arabasaba ko banoza gahunda y’akazi kabo no kurangiza imanza bakabigenera umwanya.

Aragira, ati “bagiyeho kugira ngo bunganire abahesha b’inkiko b’umwuga ndetse barinde abaturage gusiragira no gutanga amafaranga atari ngombwa kuko babikorera umuturage ku buntu naho ab’umwuga baca amafaranga atari munsi y’ibihumbi 500frw. Uyu munsi rero abehesha b’inkiko batari ab’umwuga baracyakenewe ntabwo twakora ubuvugizi bwo kugira ngo babivemo ahubwo twakora ubuvugizi bwo kugira ngo inshingano tubaha zindi, ntizibabuze umwanya wo kujya kurangiza imanza”.

Uretse abanyamabanga nshingwabikorwa b’utugari n’imirenge, kurangiza imanza bikorwa na none n’umunyamabanga nshingwabikorwa w’akarere ndetse n’umukozi w’inzu y’ubufasha mu mategeko, ariko ngo haracyagaragaramo ubukerererwe.

Ngombaniro Tharcisse; Umuhuzabikorwa wa MAJ mu karere ka Gicumbi avuga ko umukozi wa MAJ ushinzwe kurangiza imanza, abikorera abatishoboye gusa, ariko ko iyo hari imanza nyinshi zitararangizwa, uwo mukozi agira inama abahesha b’inkiko batari ab’umwuga akanabahwitura.

Be the first to comment

Leave a Reply

Your email address will not be published.


*