Gicumbi/Burera: Bamwe mu bunzi bavugwaho ikimenyane no kurya ruswa

Marie Josee Uwiringira

Hari abaturage b’akarere ka Gicumbi banenga imikorere ya bamwe mu bunzi, bavuga ko mu gukemura ibibazo hari igihe babogamira ku wo babanye neza kurusha undi cyangwa k’uwabahaye ruswa.

Mukangendahimana Xaverine, umuturage wo mu kagari ka Yaramba, mu murenge wa Nyankenke, ashima gahunda ya Leta yo kwegereza abaturage ubutabera hashyirwaho komite z’Abunzi, ariko agaya bamwe muri bo bakemura ibibazo by’abaturage babogamiye kuri umwe mu baburanyi.

Mukangendahimana, ashinja kubogama bamwe mu bunzi b’umurenge bagendera ku kimenyane aho kujya ku kiburanwa ngo bamenye neza amakuru ku kirego bakiriye. Avuga ko hariho n’uburyo bakira ruswa inyujijwe ku bandi bantu.

Aragira, ati “ruswa ntivuga. Baragenda bagatuma uwishyikira ku mwunzi runaka akamugerezayo amaturo. Ikimenyane mu mikorere y’abunzi, gituma baturenganya kandi bakoze neza byaturinda gusiragira tujya kuburana i Byumba n’i Kigali”.

Ikibazo cya ruswa mu bunzi kivugwa no mu karere ka Burera, mu mirenge wa Bungwe na Rusarabuye, aho bamwe mu baturage bavuga ko kugira ngo abunzi bakire ikibazo bafite bagomba guhamo umwe byibuze amafranga 5000.

Nzamurera Agnes wo mu murenge wa Rusarabuye, ati “ni gute twakwizera abunzi kandi batajya bemera gukemura ikibazo batabanje kwishyurwa? Bavuga ko bakorera Ubuntu ariko barabeshya ahubwo Leta irebe icyo ikora”.

Abunzi ntibahakana ko muri bo harimo abashaka indonke mu nshingano bafite, ariko harimo n’abatabishyigikiye. Jean Damascene Nshakuma, Perezida w’Abunzi mu kagari ka Cyeru, mu murenge wa Bungwe, ati “sinahakana ko mu bunzi harimo abakora nabi bashaka ruswa mu bo bakemurira ibibazo, ariko rwose ndabahamagarira ku bireka kuko ubuyobozi buduha ibikenewe kugira ngo twuzuze inshingano zacu”.

Mu nama aheruka kugirana n’Abunzi bo mu karere ka Rusizi tariki 6 Werurwe 2018, Minisitiri w’ubutabera Johnston Busingye, yabiyamye kugira ikiguzi cyangwa indonke basaba abaturage kugira ngo bamuhe serivisi.

Yaragize ati “Nta nyoroshyangendo umuturage agenera Inteko y’Abunzi kugira ngo ikunde imukemurire ikibazo, nta muti w’ikaramu usabwa umuturage ngo ni ukugira ngo Inteko y’Abunzi ikunde imuhe umwanzuro ku kibazo cye, nta mafaranga ngo yitwa “Guhagurutsa Inteko” ava ku muturage akarengera mu mifuka y’Abagize Inteko y’Abunzi, nta kiguzi cyitwa icyo gutanga ikirego kibaho mu Bunzi. Ntaho bigenwa ko Umuturage ufite ikibazo agomba kugenera Abunzi isabune, n’ibindi. Ibyo byose byitwa ruswa kandi ari uwayitanze ari n’uwayihawe bose bahanwa kimwe imbere y’amategeko.”

Komite y’abunzi igizwe n’abantu barindwi b’inyangamugayo batuye mu kagari,  ku rwego rw’umurenge na ho hakaba Komite y’abunzi b’ubujuririre barindwi batuye mu murenge. Mu ngingo ya 4 y’itegeko No37/2016  rigena imitunganyirize, ifasi, ububasha n’imikorere bya komite y’abunzi, hateganyijwe  ko umurimo w’abagize abunzi ari umurimo w’ubwitange kandi udahemberwa.

Abunzi b’umurenge n’abakuriye ab’akagari bahawe amagare yo kubafasha mu ngendo; buri Mwunzi n’umuryango we w’abantu batanu barihirirwa umusanzu w’ubwisungane mu kwivuza. Ibikoresho abunzi bakoresha nk’impapuro n’ibiro, babihabwa n’urwego bakoreraho rwaba Akagari cyangwa umurenge.

Be the first to comment

Leave a Reply

Your email address will not be published.


*