CLADHO yazamuye abakozi bo mu rugo bagera mu mahoteli

Abari abakozi bo mu rugo bahawe impamyabushobozi zizabafasha kwaka akazi mu mahoteli na resitora (Ifoto/Panorama)

Rene Anthere

Impuzamiryango y’imiryango iharanira uburenganzira bwa muntu mu Rwanda (CLADHO) imaze gufasha benshi mu bari abakozi bo mu rugo, ubu bakaba bageze ku rwego rwo gukora mu mahoteli banahemberwa ku masezerano y’umurimo.

Ibi bitangwamo ubuhamya n’abari abakozi bo mu rugo ubu bakora mu mahoteli abandi bakaba baratangiye kwihangira imirimo, binyuze mu masomo bahawe yo kwiga indimi n’imirimo ijyanye no gukora mu mahoteli na resitora.

Nsabimana Jean Bosco avuka Kugisagara mu karere ka Gisagara, afite imyaka 24. Amaze imyaka irindwi ageze muri Kigali. Nubwo yakoze ikizamini gisoza amashuri abanza ntiyigeze amenya amanota yagize. Avuga ko kutagira ababyeyi byatumye n’aho yabaga badashobora kumwishyurira amafaranga y’ishuri.

Yafashe iya mbere ata ishuri yerekeza mu karere ka Gatsibo mu murenge wa Kabarore, avuga ko agiye kuragira inka bakazamworoza. Intego ye ntiyayigezeho ahubwo yatangiye gukora akazi ko mu rugo igihe cy’umwaka akorera amafaranga ibihumbi icumi. Yagiye gukora mu ruganda rw’umuceri mu gishanga cya Ntende, ahakora amezi atanu ahembwa ibihumbi mirongo itatu, nyuma baramwiruka.

Yaje gushaka akazi i Kigali ariko kugira ngo akabone byamusabye gutanga amafaranga ibihumbi cumi na bitanu n’ubwo atahise akabona ako kanya ariko nyuma aza kugashakirwa ko gukora mu rugo, ahembwa amafaranga ibihumbi makumyabiri.

Nyuma yaje kuva ku kazi ko mu rugo agura igare ajya kuba umunyonzi. Nyuma y’amezi atanu yakoze impanuka agonzwe n’imodoka, ararwara, igare rirashwanyagurika, kandi nta bushobozi yari afite bwo kongera kugura irindi. Yivuje amezi atandatu ariko kubera mituweli yashoboye kwikurikirana n’ubwo byabaye ngombwa ko adakira neza.

N’ubwo yari arwaye yahinduye ubuzima, aho umuntu wize ibijyanye no guteka amubwira ko ubwo yakoze mu rugo CLADHO izamufasha akiga ibijyanye n’amahoteli.

“Nahise nza kwiga, ariko niga nshaka impamyabushobozi yo guteka, nzabone ikimfasha gushaka akazi. Narize nshyizeho umwete, nsindaneza. Aho nagiye gukora baduhaye ikizamini ndagitsinda bahita bampa akazi. Ubu nkora muri Hoteli kandi bamfata nk’umukozi mwiza.”

Umutesi Ange Nelly, afita imyaka 27. Atuye mu karere ka Gasabo. Yatangiye gukora akazi ko mu rugo afite imyaka 17. Ntiyashoboye kwiga ngo arangize amashuri abanza, ariko yamenye gusoma no kwandika, aravuga akanandika icyongereza. Ni umwe mu barangije kwiga guteka, ubu ni rwiyemezamirimo, ku buryo yatangije gutaka imigati. Buri munsi mu ruganda ruto afite, yinjiza inyungu inana n’amafaranga ibihumbi bibiri.

“Natangiye gukora akazi ko mu rugo mfite imyaka cumi n’irindwi. Nakoreraga amafaranga ibihumbi icumi, ariko mu gihe nakamazemo umushahara wanjye ntiwigeze uzamuka. Nareraga abana ngakora n’indi mirimo yo mu rugo. Kari akazi kagoye.”

“Aho ndangirije kwiga aho nakoreye sitaje bashatse kumpemba amafaranga ibihumbi mirongo itatu ndabangira, nahisemo kwikorera. Nshaka gutera imbere kurushaho kandi mfite icyizere ko nzabigeraho. Nzakora ku buryo n’amahoteli ashobora kuzajya anyiyambaza mu gutanga serivisi.”

Mukamusoni Aisha, ni umwari w’imyaka 18, avuka mu karere ka Kicukiro, yacikirije amashuri mu mwaka wa gatatu w’amashuri yisumbuye. Yakoze akazi ko mu rugo ahembwa amafaranga ibihumbi cumi na bitanu. Avuga ko ntayandi mahitamo yari afite kugira ngo akomeze kwiga kubera ko nta mafaranga y’ishuri yabonagana.

Kimwe na bamwe bakozi bo mu rugo bahuguwe na CLADHO, ubu akora muri imwe mu mahoteli yo mujyi wa Kigali, afite umushahara uri hejuru y’amafaranga ibihumbi mirongo itanu, kandi yemera ko ayabona neza nta ngorane. Atanga inama.

Agira ati “ndasaba urubyiruko bagenzi banjye kutitinya ngo ni uko bakora akazi ko mu rugo, mbashishikariza kubaha no guha agaciro umurimo bakora. Ndabasaba gutera intambwe na bo bakiga bagatera imbere kurushaho. Ndateganya kwihangira umurimo ngaha abandi akazi.”

Kubera amakimbirane mu muryango, ababyeyi ba Ingabire Edithe baratandukanye bituma adashobora kurangiza amashuri abanza, afite imyaka cumi n’itanu. Ubu abana na se ariko kandi yahisemo kumusiga ajya gukora akazi ko mu rugo.

“Nabonye abandi biga cyane cyane abakozi bo mu rugo nanjye ntera intambwe kuko abandi bamaze kubona akazi keza. Ndateganya ko nindangiza kwiga nzashaka uburyo nikorera, mpe bagenzi banjye akazi. Amafaranga nzajya mbona yose ngomba kujya ngira ayo nzigama ku buryo nzayabyaza umusaruro.”

Me Safari Emmanuel, Umunyamabanga Nshingwabikorwa wa CLADHO, mu kiganiro n’Ikinyamakuru Panorama, yadutangarije ko abakozi bo mu rugo bafatwa nk’abantu bakora imirimo itazwi, akaba ari muri urwo rwego bahagurukiye ko na bo bahabwa agaciro nk’abandi bakozi.

Me Safari agira ati “Bariya ni abakozi ni n’abantu bakwiye kwizerwa kuko umusigira ibyo kurya, abana n’urugo rwawe ugasanga yaguteguriye byose. Iyo ukwezi gushije uramuhemba, uretse ko hari n’abatabahemba. Uriya mukozi ni uw’agaciro kuko abumbatiye ubuzima bw’umukoresha n’ubw’abana be. Twasanze ari ngombwa ko umurimo bakora wubahwa.”

Aba bakozi bigishwa amezi 12, icyenda bayakoresha mu kwiga gusoma no kwandika n’indimi mpuzamahanga zirimo icyongereza, igifaransa n’igiswahili kugira ngo zizabafashe aho bazashaka akazi, andi mezi atatu bayakoresha biga guteka.

Ku ikubitiro ku butafatanye n’Umuryango mpuzamahanga utegamiye kuri guverinoma ADPM (Action Développement Parrainages Mondiaux), ku ikubitiro CLADHO yahuguye abakozi bo mu rugo 48, icyiciro cya kabiri hahuguwe 98, na ho mu cyiciro cya gatatu ari na cyo cyahawe impamyabushobozi ku wa 5 Mata 2018, hahuguwe abakozi bo mu rugo 112.

Baranyizigiye Jeanne, umubitsi muri CLADHO, avuga ko basanze hari uburenganzira bwo kwiga bamwe mu rubyiruko batarashobora kugeraho, akaba ariyo mpamvu bifuje ko abakozi bo mu rugo na bo bagira ubumenyi bwiyongereye ku byo bazi birimo gusoma no kwandika bakongeraho kwiga umwuga.

Abari abakozi bo mu rugo 112 basoje amahugurwa mu kwiga gusoma no kwandika, indimi n’amasomo yo guteka (Ifoto/Panorama)
Mukamusoni Aisha yavuye ku mushahara w’amafaranga ibihumbi icumi ubu ageze ku mushahara w’amafaranga arenga ibihumbi mirongo itandatu (Ifoto/Panorama)
Umutesi Ange Nelly nyuma yo gukora akazi ko mu rugo ubu ni rwiyemezamirimo. Yahuguwe ku guteka yatangiye gukora imigati (Ifoto/Panorama)
Nyuma y’uko ababyeyi be batandukanye, ntashobore gukomeza amashuri, Ingabire Edithe, yahisemo kwiga umwuga kugira ngo yiteze imbere kandi afite umuhigo ko azabigeraho (Ifoto/Panorama)
Nsabimana Jean Bosco, yacikirije amashuri agira umuhigo wo korora inka ntiyabigeraho, akora akazi ko mu rugo, ubu arakora muri imwe mu mahoteli yo muri Kigali (Ifoto/Panorama)
Me Safari Emmanuel, Umunyamabanga Nshingwabikorwa wa CLADHO (Ifoto/Panorama)

 

 

 

 

Be the first to comment

Leave a Reply

Your email address will not be published.


*