Nyarugenge: Abasore batatu bafatanywe ibikoresho bibye mu nzu

Panorama

Polisi y’u Rwanda ikorera mu karere ka Nyarugenge itangaza ko yatahuye ibikoresho byo mu nzu byari byibwe umugabo ufite ubwenegihugu bw’Ubushinwa, bikaba byaribwe mu rugo iwe aho yari atuye mu murenge wa Rwezamenyo.

Ibikoresho byafashwe ni Inyakiramashusho nini igezweho (Flat screen), Matora zo kuryamaho ebyiri (2), Ishyiga ryo gutekaho rikoresha gazi (gas cooker) n’ icyuma gifotora (Camera).

Umuvugizi wa Polisi mu mujyi wa Kigali, Senior Superintendent of Police (SSP) Emmanuel Hitayezu yavuze ati: “Twakiriye ikirego cy’umugabo w’Umushinwa witwa Bing Bing, avuga ko yibwe ibikoresho byo mu nzu, nibwo twahise dutangira iperereza ari nabwo twahise dufata uwari umukozi we wo mu rugo witwa Uwiragiye Bosco.”

Nyuma yo gufata Uwiragiye, iperereza ryerekanye ko hari n’ibindi byitso bye ari byo Munyaneza Theophile alias Kirenge na Habimana Jean de Dieu, bose uko ari batatu (3) bakaba bafungiye kuri Sitasiyo ya Polisi ya Rwezamenyo.

SSP Hitayezu yavuze ko Polisi yakomeje iperereza rikaza gutuma bimwe mu bikoresho byari byibwe biboneka, uretse Matora imwe (1) yo kuryamaho n’icyuma gifotora (Camera), ariko yashimangiye ko iperereza rikomeje ngo n’ibyo bindi bitaraboneka nabyo biboneke.

Yakomeje avuga ati: “Ibyo bikoresho byafashwe byasubijwe nyirabyo, tukaba tugira inama abaturage guhita bitabaza Polisi igihe bahuye n’ibibazo nk’ibi by’ubujura.”

Ingingo ya 300 yo mu gitabo cy’amategeko ahana ibyaha mu Rwanda, ihanisha ubujura nk’ubu igifungo kuva ku mezi atandatu (6) kugeza ku myaka ibiri (2) n’ihazabu y’amafaranga y’u Rwanda yikubye inshuro kuva kuri ebyiri (2) kugeza kuri eshanu (5) z’agaciro k’icyibwe.

Umuvugizi wa Polisi mu mujyi wa Kigali Senior Superintendent of Police (SSP) Emmanuel Hitayezu

Be the first to comment

Leave a Reply

Your email address will not be published.


*