Kibungo: Ntibagihangayikishijwe n’aho ababo bazize Jenoside bashyinguye

Abayobozi batandukanye n’abafite ababo bashyinguye mu Rwibutso rwa Kibungo bashyira indabo ku Rwibutso (Ifoto/Theoneste N.)

Theoneste Nkurunziza /Ngoma

Abarokotse Jenoside yakorewe Abatutsi mu 1994 b’i Kibungo  mu karere ka Ngoma, mu Ntara y’Iburasirazuba bw’u Rwanda bagaragaza ibyishimo batewe no kuba bamaze kubona Urwibutso rwa Jenoside rujyanye n’igihe.

Ibi babigarutseho ku Cyumweru tariki  ya 15 Mata 2018 mu muhango wo kwibuka ku nshuro ya 24 Jenoside yakorewe Abatutsi.  Nk’uko bamwe muribo babitangarije umunyamakuru wa Panorama, ntibagihangayikishijwe  naho ababo bishwe muri Jenoside yakorewe Abatutsi bashyinguye.

Ngutegure Colette, ufite imyaka  59 y’amavuko warokokeye i Kibungo nyuma yo kuvuga ubuhamya bw’ibyamubayeho muri Jenoside, aho yaje kurokorwa n’ingabo zahoze ari iza RPF Inkotanyi zimukuye mu bwiherero aho yari yihishe we n’umwana we wari umaze ukwezi kumwe avutse, yavuze ko ashimira ubuyobozi bwakoze uko bushoboye, kuri ubu bakaba bibukira abavandimwe babo ahantu habahesha ishema.

Yagize ati “Ubu urahagera ugasanga abantu bawe  baruhukiye ahabahesha agaciro, abantu bacu ntibakivirwa, ujyamo ukumva muri kumwe. Bari ahantu heza hasukurwa, ibi turabishima.”

Umwe mu bafite ababo baruhukiye muri uru Rwibutso ariko utuye i Kigali ni Zitoni Innocent. Na we avuga ko  binejeje kuba uru Rwibutso rumeze neza, rwabagaruriye icyizere.  Agira inama ababa batariyakira  ngo bemere kwimurira imibiri y’ababo  bazize Jenoside yakorewe Abatutsi  muri uru Rwibutso, guhindura imyumvire.

Abivuga agira ati “Uru rwibutso rwatugaruriye icyizere kubera ko ahantu abacu bari baruhukiye hatari habahesheje icyubahiro. Twakomeje kugenda dushishikariza abantu bose ko haba ibiganiro nk’abantu batariyakira   ndetse n’abadafite ubushobozi, ubuyobozi bw’akarere n’izindi nzego bireba bakaba baragumye kubiganira kugira ngo abantu bagire imyumvire imwe.”

Ubuyobozi bw’Akarere ka Ngoma buvuga ko bitarenze umwaka wa 2020 uru Rwibutso ruzaba rumaze kubona ibikenewe byose  kugira ngo rujyane n’igihe koko. Aphrodise Nambaje ni Umuyobozi w’Akarere ka Ngoma,  akaba abishingira ko kuri ubu inzu y’amateka yo yamaze kuzura.

Agira ati “Turiho turabitegura, rero muri uyu mwaka w’ingengo y’imari 2018-2019 hari iby’ibanze tuzashyiramo, ariko  buhoro buhoro ku buryo mu mwaka wa 2020, hazaba hari ibyangombwa bihagije kugira ngo abantu babashe gukurikirana iby’aya mateka.”

Hon Mukandera Iphigenie, umudepite mu Nteko Ishinga Amategeko y’u Rwanda wifatanyije n’abatuye umurenge wa Kibungo kwibuka, yihanganishije abarokotse Jenoside yakorewe Abatutsi b’i Kibungo no mu nkengero zaho.

Iyi ntumwa ya rubanda  yari kumwe na Depite Kabasinga Chantal na we warokokeye i Kibungo,  ashima  Akarere ka Ngoma kashoboye kubaka urwibutso rujyanye n’igihe anahumuriza abatarafata icyemezo cyo kuzana imibiri y’ababo muri uru Rwibutso no mu zindi ziri ku rwego rw’akarere, ko ari byiza kubera ko ari icyemezo cyafashwe n’ubuyobozi kugira ngo hasigare inzibutso zishobora kubungabungwa neza.

Agira ati “Dukurikije ubushobozi, ntabwo byashoboka ko buri wese yashaka ko aho abe bari hakubakwa urwibutso.  Ni yo mpamvu inzibutso zigomba guhuzwa. Iyo baruhukiye ahantu heza, abantu bose baratuza bakumva ko bari ahantu heza. Ahantu hose  hari umubiri w’umuntu wishwe muri Jenoside hagomba  gushyirwa  ikimenyetso gihoraho.”

Uru Rwibutso rwa Kibungo rushyinguyemo imibiri ibihumbi makumyabiri na bitanu (25,000)  yo mu Mirenge ya Kibungo, Kazo, Remera na Rurenge. Uru Rwibutso rwa Kibungo rukaba rufite inzu y’amateka imaze kuzura, aho kuri ubu imirimo yo gutunganya aho ruri imaze gutwara ingengo y’imari ihwanye na miliyoni magana arindwi z’amafaranga y’u Rwanda (700,000,000frw).

Abaje kwibuka Jenoside bunamira abaruhukiye mu Rwibutso rwa Kibungo (Ifoto/Theoneste N.)
Inzu y’amateka imaze kuzura ku Rwibutso rwa Kibungo ( Ifoto /courtesy)
Aphrodise Nambaje uyobora akarere ka Ngoma aganira n’abanyamakuru ku bijyanye no kuzuza inzu y’amateka (Ifoto /Theoneste N.)

Be the first to comment

Leave a Reply

Your email address will not be published.


*