Gicumbi: Abanyeshuri bamwe bakoresheje imbaraga bari bafite mu buryo budahwitse

Abahoze biga mu rwunge rw'amashuri rwa Byumba bunamira bagenzi babo bishwe muri Jenoside yakorewe Abatutsi (Ifoto/Panorama)

Mu muhango wo kwibuka ku nshuro ya 24 abari abanyeshuri b’Urwunge rw’amashuri rwa Byumba (Groupe scolaire De La Salle), bishwe na bagenzi babo muri Jenoside yakorewe Abatutsi, hagarutswe ku kunenga ubugwari bwagaragajwe n’abishe bagenzi babo basangiraga byose.

Ni igikorwa cyateguwe n’abanyeshuri bahoze bigana n’abo bishwe, imiryango yabo ndetse n’inshuti ku bufatanye n’ubuyobozi bw’iri shuri, ubu risigaye ryitwa TTC De La Salle; bakaba bibukwa ku wa 05 Gicurasi buri mwaka.

Ubutumwa bwatanzwe n’abitabiriye iki gikorwa bwibanze ku muco mubi bamwe mu banyeshuri bagaragarije bagenzi babo babagambanira, nyamara bari abavandimwe basangira byose umunsi ku wundi.

Ibi bakoze ngo ni ubugwari nk’uko umuyobozi w’ishuri Frere Barasa Maurice yabibwiye urubyiruko rw’abanyeshuri bafite ubu, abibutsa ko amahirwe yo guhurira kw’ishuri bakwiye kuyabyaza umusaruro barushaho kungurana ibitekerezo ku cyabateza imbere nk’uko kwiga ari uguhozaho.

Muri gahunda y’iminsi 100 yo kwibuka abanyeshuri basabwe kubigiramo uruhare nk’urubyiruko rukeneye gukomeza gusobanukirwa amateka, ntibibe kw’ishuri gusa ahubwo n’iwabo mu miryango. Bakigomwa ibindi binezeza muri iki gihe bityo ubunyarwanda dusangiye bugakomeza gusigasirwa, hamwe n’imbaraga z’urubyiruko mu kubaka u Rwanda rubereye abanyarwanda.

Umwe mu banyeshuri baharokokeye Mukayiranga Irène, atanga ubuhamya yagarutse ku nzira yakujijwemo ingengabitekerezo ya jenoside bikorwa n’ubuyobozi bwariho mu gihe mu 1994 bikabakururira ubwivangure bwanateye bagenzi babo kuhatakariza ubuzima.

Ati “Abari abavandimwe twasenganaga, twararanaga ndetse dusangira ubuzima bwose nk’abanyeshuri nibo batugambaniye nyuma yo gukorana urugendo duhungira i Butare. Byatangiye batugenza, twajya kuryama bakadusaka ntidusobanukirwe nyuma biza gukurikirwa no kudutanga ngo dushyirwe ku malisiti y’abagombaga kwicwa nabo ubwabo bafatanya n’interahamwe.”

Yakomeje asaba abanyeshuri kwiga bafite n’ubushishozi bwo guhitamo ikiri icyiza, bakagendera kure ingengabitekerezo ya jenoside n’igisa nayo cyose.

Mudaheranwa Juvénal, Umuyobozi w’Akarere ka Gicumbi atanga ubutumwa yagize ati “Hari icyizere cy’ejo hazaza heza, gishingiye ku nyigisho zihabwa abakiri bato ari nabo nkingi z’ejo hazaza.”

Akomeza avuga ko icyo basabwa gusa ari ugusesengura bagakurikiza ibibafitiye akamaro n’abanyarwanda bose muri rusange, bahashya burundu ingengabitekerezo ya jenoside.

Yongeyeho ko ubudasa bw’abanyarwanda ari bwo bwabafashije kurenga ingaruka z’amateka mabi banyuzemo, urubyiruko nk’imbaraga z’ejo hazaza bakaba basabwa gushyigikira ibyagezweho baguma mu murongo w’iterambere u Rwanda rurimo. Yashimye kandi uruhare iri shuri ryagize rifata iya mbere mu gutegura igikorwa cyo kwibuka abo ryahoranye.

Ishuri rya Groupe scolaire De La Salle ubu risigaye ryitwa TTC De La Salle, rifatanya n’abanyeshuri bahoze bigana n’abo bishwe, imiryango yabo ndetse n’inshuti mu gutegura ibikorwa byo kubibuka babunamira bikaba ku wa 05 Gicurasi buri mwaka.

Nadine Evelyne UMUBYEYI

Igikorwa cyo kunamira abazize Jenoside yakorewe Abatutsi bashyinguye mu rwibutso rwa Rutare (Ifoto/Panorama)
Igikorwa cyo kunamira abazize Jenoside yakorewe Abatutsi bashyinguye mu rwibutso rwa Rutare (Ifoto/Panorama)
Abahoze biga mu rwunge rw’amashuri rwa Byumba bunamira bagenzi babo bishwe muri Jenoside yakorewe Abatutsi (Ifoto/Panorama)
Igikorwa cyo Kunamira abazize Jenoside yakorewe Abatutsi bashyinguye mu rwibutso rwa Rutare (Ifoto/Panorama)
Abanyeshuri biga muri TTC Byumba bunamira bagenzi babo bishwe muri Jenoside yakorewe Abatutsi (Ifoto/Panorama)

Be the first to comment

Leave a Reply

Your email address will not be published.


*