Rubavu: Umukozi wa G.S Muhato yahagaritse akazi agaragaza itotezwa, itonesha n’amacakubiri

Uwera Priscille avuga ko yatotejwe igihe kinini bikamuviramo guhagarika akazi ngo abanze ahabwe ubutabera (Ifoto/Ange De La Victoire)

Uwera Priscille w’imyaka 30 wahoze ari umukozi ishinzwe isomero mu Kigo cy’ishuri cya G.S Muhato giherereye mu murenge wa Gisenyi mu karere ka Rubavu, yahagaritse akazi bitewe n’Impamvu avuga ko zishingiye ku itotezwa, itonesha n’amacakubiri ashingiye ku moko ashinja Umuyobozi w’icyo kigo ndetse n’izindi nzego zigikuriye.

Abashinjwa ni Mukarukundo Jacqueline uyobora ikigo cy’Amashuri cya G.S Muhato ndetse na Padiri Nzayisenga Theoneste ushinzwe Paruwasi ya Muhato nk’Urwego rwa Kiliziya Gatolika rushinzwe kureberera G.S Muhato kuko ari ishuri Leta ifatanyije na Kiliziya.

Uwera avuga ko byatangiye mu 2016 ubwo icyo kigo cyahabwaga umuyobozi mushya ariwe Mukarukundo Jacqueline, aho ngo yatangiye kumutoteza mu buryo bunyuranye kugeza ubwo yafataga umwanzuro wo kwandika ibaruwa ihagarika akazi ku wa 22 Mutarama 2018; ngo kuko ikibazo yakomeje kukigeza ku nzego zitandukanye kugeza ku rwego rw’Akarere ka Rubavu ariko ngo ntikitabweho.

Asobanura ko byafashe indi sura ubwo yahabwaga uruhushya rwo kujya kuvuza umwana i Kigali muri CHUK yagaruka ku mirimo agasanga icyumba cy’isomero yari ashinzwe cyaribwemo ibitabo n’andi makayi yabikwagamo amakuru y’isomero.

Akababaro ka Uwera Priscille

Nyuma y’ibi, Yanditse ibaruwa amenyesha ko yibwe, ati “Maze kwandika ibaruwa ko nibwe mu isomero, umuyobozi ushinzwe amasomo yateranije inama ngo basuzume icyo kibazo, bemeza ko bagiye kumfasha gushaka ibitabo byabuze no gukurikirana icyo kibazo; ariko icyantunguye ni uko ibyo twemeje mu nama atari byo byakurikijwe. Buri wese yaragiye arinumira, ahubwo batangira kujya banyandikira buri gihe bambaza raporo y’ibitabo byibwe, nyamara kumenya umubare wabyo ntibyari kunyorohera dore ko n’amakayi abitsemo amakuru yabyo bari bayatwaye.”

Asobanura ko ajya kuvuza umwana i Kigali, yajyanye urufunguzo rw’isomero, mu kigo na bo basigarana urundi kuko n’ubusanzwe bajyagamo bagiye gukoresha zimwe muri Serivisi zakorerwaga muri iryo somero. Aho atanga urugero rwa Cashpower yaririmo bityo gushyiramo umuriro bikaba bitarabaga ngombwa ko aba ahari ahubwo hakoreshwa urufunguzo rwasigaye.

Mu buhamya burebure Uwera Priscille yahaye Umunyamakuru, yavuze ko ibitabo byatwawe hagamijwe gukomeza kumutoteza, bikiyongeraho kumwongerera imirimo imunaniza, kumugerekaho amakosa y’akazi ndetse akanatunga agatoki ivanguramoko n’itonesha ry’igice kimwe bikorwa n’umuyobozi w’ikigo ndetse akongeraho ko na Padiri bafatanyije kumutoteza aho ngo yamubwiye amagambo, tutatangaje, azakurikiranwa n’Ubugenzacyaha dore ko bwanadutangarije ko iki kibazo kiri mu maboko yabwo kikaba cyaratangiye gukurikiranwa.

Ati “Nyuma y’uko nanditse ibaruwa ngaragaza ko mpagaritse akazi ku bw’umutekano wanjye, habaye inama. Iyo nama bayintumiramo ariko ku bw’ibikomere narimfite numva ntashaka kureba abantu bo muri icyo kigo nanga kuyijyamo. Barampamagaza, bahamagara abarimu bose bagira ngo bakurikirane koko ibyo bintu niba ari ukuri. Ariko babikurikiranye ari uko babonye ibaruwa igaragaza ko njyewe mpagaritse akazi ntakiri umukozi.”

Akomeza agira ati “Iyo nama yabaye amashuri yaratangiye ariko njye nanditse mbere y’uko amashuri afungurwa. Babonye ko aho nakabaye nkora nta muntu ukora, kandi nkaba nanditse ibaruwa ihagarika akazi nibwo baje gusa n’aho bikiza ngo bari gukemura ikibazo.

Ariko ntibari baje gukemura ikibazo kuko igihe cyo kugikemura cyari cyararangiye. Executive w’Umurenge aza ku ishuii n’ushinzwe uburezi, bakoresha inama, ari na cyo kintu nshaka gutindaho!

Iyo nama irimo iraba, abarimu batandukanye bagaragaje amacakubiri ari mu kigo, rya vangura, kwa kuntu hari ivangura ry’Abantu runaka, babantu runaka, bwa bwoko runaka, bahabwa amanota runaka abandi bagapyinagazwa, icyo kintu abarimu barakigaragaje.

Bagaragaza uburyo hari abantu bahabwa imirimo irenze ubushobozi, bakabongerera amasomo cyangwa bakabaha inshingano zo kubananiza, nk’itotezwa. Biragaragara, baraboneka hazamo n’abandikiye umurenge basaba kurenganurwa…

Ariko kugeza ubu nk’umuntu wese wagize uruhare mu kugira icyo agaragaza, kugeza uyu munsi arimo gutotezwa.

Uwera avuga ko ibimenyetso byose abifite kandi yiteguye kubitanga igihe cyose azabisabirwa n’inzego zibifitiye ububasha.

Yongeraho ko ubu yahisemo guhunga akava mu karere ka Rubavu aho yakoreraga nk’ushinzwe isomero rya G.S Muhato kubera ko itotezwa yakorewe kandi ntarenganurwe nk’uko abyemeza, byatumye akeka ko ashobora no kuzagirirwa nabi, dore ko hari n’inyandiko afite zigaragaza uko yagiye yishinganisha mu nzego zitandukanye.

Icyo ubuyobozi w’ikigo bubivugaho

Ku wa 6 Gicurasi 2018, ku murongo wa telefoni, umunyamakuru yaganiriye n’umuyobozi w’ikigo cy’ishuri cya G.S Muhato, Mukarukundo Jacqueline, watangiye imirimo yo kuyobora iki kigo muri Gicurasi 2016, ahamya yeruye ko uwo Priscille ibyo amushinja ari ibinyoma byambaye ubusa kuko bitashoboka ko umuntu arenganywa ari mu gihugu kigendera ku mategeko.

Ati “Ibyo avuga by’ibitabo byanabaye ntahari. Nari ndi mu kiruhuko gihabwa umubyeyi wabyaye,…Mu bantu barenganya Priscille rwose sindimo, ahubwo rwose sinzi ikindi agambiriye kuko njye sinanjye watumye asezera. Mubamugira iyo nama sinabamo rwose!”

Uyu muyobozi avuga ko ibyo kwiba ibitabo bifatwa nk’imbarutso yo guhagarika imirimo kwa Uwera byabaye hari umuyobozi ushinzwe amasomo.

 

Mukarukundo arongera ati “…Umuntu ntiyatinyuka kwiyandikira ibaruwa avuga ngo ndakaretse, ngo ajye kwitwaza undi muntu. Inzego izari zo zose zamurenganura aho yaba yahohotewe cyangwa yagize ikindi kibazo. Ntabwo umwanzuro mwiza wari uwo kureka akazi ahubwo yari gusaba akarenganurwa.Turi mu Rwanda rufite amategeko, ntabwo akorera mu gihugu cya wenyine, cyangwa ku ishuri rya wenyine.”

Ku bijyanye n’ikimenyane ndetse n’ivangura bishinzwa uyu muyobozi, Mukarukundo, abisubiza muri aya magambo “Yego koo! Yewe umva ibyo byo rwose ntaho bihuriye. We ku giti cye nk’umuntu wasezeye afite impamvu, yaba avuga ibyo byose,…Ariko rwose ibyo ni ibinyoma byambaye ubusa. Mu kigo cyacu nta bintu by’amoko bibamo. Ntabyo pe!”

Umuyobozi ushinzwe amasomo muri G.S Muhato avuga ko iki kibazo kirimo ibintu birebire bisaba gukora ubushakashatsi, ndetse yemeza ko ku bijyanye n’ikibazo cy’amacakubiri kuri iryo shuri ntakihagaragara, avuga ati “Ku kigo dufite na Ndi Umunyarwanda” ntabihari.

Ku kibazo cy’ibitabo byabuze mu isomero ubwo Uwera yari yaragiye kuvuza umwana, uyu muyobozi yagaragaje uko ikibazo cyatangiye avuga ko Uwera yasabwe gukora inventaire (raporo y’ibitabo) byibwe ariko ntiyayikora kuko kugeza ubu niyo raporo ntayo yatanze.

Ku rundi ruhande Umuyobozi ushinzwe amasomo yanemeje ko hari bimwe mu bitabo bigenda bigarurwa kugeza ubwo muri iyi minsi hamaze kugarurwa ibitabo 57 byabonetse nyuma y’uko Uwera avuye mu kazi.

Ku kibazo cyo kumutoteza ngo ahabwa andi masomo yo kwigisha kandi ashinzwe isomero bikaba bimuvuna, yavuze ko mu nteganyanyigisho iriho kuri ubu Minisiteri y’Uburezi ivuga ko umuntu ushinzwe isomero ari na we ugomba kwigisha abanyeshuri imikorere y’isomero ndetse n’uko bakora ubushakashatsi.

Tugeze ku kibazo cy’amacakubiri n’itonesha yagize ati “Icyo ntacyo nakivugaho rwose. Ntacyo nakivugaho. Niba yarabibabwiye ubwo nyine azagaragaza ibimenyetso bikurikiranwe.”

Twakomeje gukurikirana iyi nkuru, duhamagara na Padiri Theoneste Nzayisenga ushinzwe G.S Muhato nk’ikigo cya Kiliziya Gatolika, mu kiganiro kitari kigufi adusobanurira ko Kiliziya na Leta batahohotera umuntu icya rimwe ngo bikunde.

Ati “Reka nkubwire rero ntabwo umuntu ashobora kurenganywa na Leta na Kiliziya icyarimwe. Ibyo bigira inzego zibishinzwe agezaho ikibazo kigakemuka. Ntabwo umuntu yarenganywa n’abantu bose…kandi koko niba yaranditse agaragaza ikibazo cye abo bantu yandikiye bagomba kugishakira igisubizo”

Ku kibazo cy’amagambo avanzemo n’iby’amaccakubiri, Padiri Theoneste yagize ati “Umva nkubwire muvandi, muri iki gihugu haba ivangura ry’amoko bakabura uburyo iri vangura barimenyamo? Ese muvandi wambwiye ko uri umunyamakuru, ese koko ibyo bakubwiye byose ubifata nk’ukuri?…Njye numva icy’ingenzi muri ibi ari ukureba ukuri kandi ukuri gushingiye kubifatika.”

Abarezi bo muri GS Mutaho babivugaho iki?

Tariki ya 6 Gicurasi 2018 na none ahagana mu masaha akuze y’umugoroba, mu kiganiro kirenga iminota 16 twagiranye n’umwe mu barimu bigisha kuri icyo kigo witwa Nzakizwanimana Zakariya, mu bisubizo agasa n’uwitangira gusubiza ati “Nanjye ibyo niko mbyumva. Njye nabonye akora nyuma numva ko yaje kuhava…”

Avuga ko Uwera yagiye agira abasimbura bakajya bakorere mu isomero kandi bakajyamo adahari.

Abajijwe ku kibazo cy’amacakubiri n’itonesha rya bamwe bivugwa ku buyobozi bw’Ikigo yagize ati “Bon ibyo ngibyo n’ubwo bitari mu bubasha bwanjye nanjye mbyumva ntyo, ariko nkumva ko ari umwe mu bo byabayeho, ariko…Ntacyo nabivugaho, ntacyo nabitangazaho ariko nziko byashakuje, we aba abifiteho amakuru arenze ibyo njye ntabivugaho, njye nta bindi namenya.”

Arongera ati “Njye nta muntu wari wantwara amanota naho ibindi byo mbisa (Ntiyarangije kuvuga icyo yarashatse kuvuga)..hari ibyo mbona nkabifata uko mbibonye gusa. Icya ngombwa ni uko nkora akazi nshinzwe ngataha. Iyo mbonye ngize amahirwe ngataha, ibyo biba bihagije.”

Muri iki ganiro kandi Zakariya yabaye nk’ukomoza ko habazwa n’izindi nzego zikuriye ikigo zirimo akarere ka Rubavu ndetse na Padiri uhagarariye urwego rwa Kiliziya kuri iryo shuli akaba, nk’Uko byatangajwe na Uwera, yaba yaravuze amagambo agaragaza amacakubiri nk’uko abivuga.

Ubuyobozi bubivugaho iki?

Ku nshuro zigera kuri ebyiri twahamagaye Umuyobozi w’Akarere ka Rubavu, Habyarimana Gilbert, ntiyatwitabye ariko nyuma aza kutwihamagarira, tumaze kumusobanurira ikibazo uko giteye, yagize ati “Ubu njye simpari nta kintu nakumarira ndarwaye. Nta kintu nakumarira maze igihe ndwaye n’ubu ndarwaye wabaza Visi-Meya.”

Umuyobozi w’Akarere ka Rubavu wungirije ushinzwe iterambere ry’ubukungu, Murenzi Janvier, ntiyatwitabye, tumwoherereza ubutumwa bugufi bugira buti “Muraho Visi Meya? Nitwa Ange de la Victoire Dusabemungu, ndi Umunyamakuru hari ikibazo kivugwa mu karere ka Rubavu cy’umukozi wa G.S Muhato witwa Uwera Priscille  yagejeje ku karere. Meya yarambwiye ngo nkuvugishe we ararwaye none nari mbahamagaye ngira ngo mbasabe amakuru akerekeyeho. Mbaye mbashimimiye.” Nyuma y’ubu butumwa twongeye kumuhamagara ntiyatwitaba kugeza ubwo twandika iyi nkuru.

Nyuma y’ibi byose twavuganye n’inzego z’umutekano zitandukanye zirimo Ushinzwe Community Policing mu karere ka Rubavu, Umuvugizi wa Polisi mu ntara y’Iburengerazuba akaba ari na we waduhaye amakuru ko iki kibazo kirimo gukurikiranwa kuko ubu kigeze ku rwego rw’Ubugenzacyaha.

Mu kiganiro twagiranye n’Umuvungizi w’agateganyo w’Urwego rw’igihugu rw’ubugenzacyaha -RIB (Rwanda Investigation Bureau), Mbabazi Modeste, yatwemere ko iki kibazo kirimo gukurikiranwa hakorwa iperereza ati “Ikirego baracyakiriye kirimo gukurikiranwa kandi kizakemuka neza. Inzego zose ziragikurikirana, tuzahuza ibyo tuzabona gikemurwe.”

Ange de la Victoire Dusabemungu

 

Be the first to comment

Leave a Reply

Your email address will not be published.


*