Centrafrica: Abapolisi b’u Rwanda bari mu butumwa bw’amahoro bavuye abaturage ku buntu

Abapolisi b'u Rwanda bari mu butumwa bwo kubungabunga amahoro muri Centrafrica bavura abaturage b'i Bangui (Photo/RNP)

Ku itariki ya 30 Kamena 2018, abapolisi b’u Rwanda  bari mu butumwa bw’amahoro (MINUSCA) mu gihugu cya Centrafrica bavuye  ku buntu abaturage batuye mu mujyi wa Bangui, Umurwa mukuru w’iki gihugu.

Ubu buvuzi bwahawe  abaturage basaga 400 barimo abakuru n’abato, basuzumwe indwara zitandukanye ndetse banahawe imiti yazo.

Nk’uko tubikesha Polisi y’u Rwanda, iki gikorwa cyo kuvura aba baturage, Polisi yagifatanyije n’indi miryango bakorana mu kubungabunga amahoro muri Centrafrica.

Iki gikorwa cyitabiriwe n’umuyobozi w’ibikorwa by’inzego zishinzwe umutekano muri MINUSCA, Maj Gen. Muhammed Selloum n’abayobozi bakuru b’iki gihugu.

Mu ijambo rye, Major Gen. Muhammed, yashimiye Polisi y’u Rwanda ku gikorwa cyiza yakoze cyo kuvura abaturage ku buntu.

Yaragize ati “MINUSCA iri muri iki gihugu cyanyu kugirango ibarinde mu buryo butandukanye burimo no kugira amagara mazima, ari nayo mpamvu Polisi y’u Rwanda yaje kubavura indwara zitandukanye.”

Umuyobozi wungirije  w’akarere ka munani  mu mujyi wa Bangui, Andre Ndemangou, na we yashimiye Polisi y’u Rwanda ku gikorwa cyiza bakoze baha imiti ku baturage batuye muri kariya gace.

Yagize ati “Malaria n’inzoka zo mu nda ni indwara zikunze kugaragara muri aka gace cyane cyane ku bana bato. Ndabashimiye rero ku gikorwa cyiza nk’iki mwakoze mubaha imiti”.

Umuyobozi w’itsinda ry’abapolisi b’u Rwanda bari mu butumwa bw’amahoro muri Centrafrica, Assistant Commission Sam Rumanzi (ACP),  yavuze ko  umutekano uhera ku kugira ubuzima bwiza.

Yagize ati “Turashimira abayobozi b’akarere ka 8 badufashije bakaduha aho tuvurira aba baturage, rero ntabwo wacungira umutekano umuntu mu gihe afite ubuzima bubi; ni yo mpamvu Polisi yabanje gutanga ubuvuzi ku buntu ku baturage batuye muri aka gace”.

Yakomeje ababwira ko bari muri kiriya gihugu mu buryo bwo kubacungira umutekano kandi ko no mu bindi bikorwa bazakomeza gufatanya.

Panorama

Abapolisi b’u Rwanda bari mu butumwa bwo kubungabunga amahoro muri Centrafrica bavura abaturage b’i Bangui (Photo/RNP)
Umuyobozi w’ibikorwa by’inzego zishinzwe umutekano muri MINUSCA, Maj Gen. Muhammed Selloum (Photo/RNP)

Be the first to comment

Leave a Reply

Your email address will not be published.


*