Gicumbi: Abaturage bafatishije imodoka yari itwaye Kanyanga

Amakuru dukesha Polisi y’u Rwanda, avuga ko ubukangurambaga mu kurwanya ibiyobyabwenge bwamaze gucengera mu baturage, ku buryo abo mu karere ka Gicumbi batangiye kugira uruhare mu gufata imodoka zitwaye inzoga ya Kanyanga.

Ku itariki ya 8 Nyakanga, Polisi mu karere ka Gicumbi yafatiye mu murenge wa Rubaya akagari ka Gishari umudugudu wa Gatsata, abagabo babiri aribo Nahimana Celestin w’imyaka 40 na Niyonsenga Anselme w’imyaka 31 batwaye litiro 38 za Kanyanga mu modoka RAA 829 E.

Umuvugizi wa Polisi mu Ntara y’Amajyaruguru Chief Inspector of Police (CIP Hamdun Twizeyimana, yavuze ko aba bombi bafashwe nyuma y’amakuru Polisi yahawe n’umuturage w’inyangamugayo wari ubonye iyo modoka itwaye ibiyobyabwenge, na bo bagahita bayihagarika bakabafata.

Yavuze ati “Kubera ubukangurambaga tumaze iminsi duha abaturage ku bubi n’ingaruka z’ibiyobyabwenge cyane cyane kanyanga, urumogi n’inzoga z’inkorano. Ubu abaturage bamaze kuba abafatanyabikorwa bahambaye ba Polisi, ku buryo aho babonye abinjiza, abanywa n’abacuruza ibi biyobyabwenge baduha amakuru. Ni na ko byagenze rero ubwo aba bombi bafatwaga.”

Yavuze ko Polisi ikimara guhagarika iyi modoka bayisatse bakayisangamo umufuka, abari bayitwaye bakavuga ko ari ibiribwa birimo, ariko abapolisi bawufungura bagasangamo kanyanga zipakiye mu mashashe.

CIP Twizeyimana yavuze kandi ati “Abacuruza ibiyobabwenge bagira amayeri menshi, ariko kubera imikoranire myiza hagati ya Polisi y’u Rwanda n’abaturage biratworohera kubafata. Bamenye ko twabahagurukiye kandi ko iyo mikorere yabo tuyizi kandi ubikora wese amenye ko isaha iyo ariyo yose azafatwa kandi akabihanirwa.”

Yakomeje agira ati “byiza ababyishoramo babiretse mu rwego rwo kwirinda ingaruka zabyo zirimo igifungo, igihombo cy’amafaranga abishorwamo, uburwayi n’izindi ngaruka mbi ku buzima bw’ubinywa.”

CIP Twizeyimana yagaragaje ko ingaruka z’ibiyobyabwenge zitagera k’ubinywa gusa, ubicuruza cyangwa ubitunda, ahubwo ko zigera no ku muryango we, kuko iyo afunzwe cyangwa igihe ibiyobyabwenge biteje ingaruka mbi ku buzima bwe adakora ibiteza imbere umuryango we, kandi abo mu muryango we bamutaho igihe aho afungiye mu mwanya wo gukora ibibateza imbere.

Nahimana na Niyonsenga bahise bashyikirizwa Urwego rw’Igihugu rw’Ubugenzacyaha (RIB), ubu rukaba rurimo kubakorera dosiye ruzashyikiriza ubushinjacyaha.

Nibahamwa n’icyaha, bazahanishwa igifungo kuva ku myaka itatu (3) kugeza ku myaka itanu (5), n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000), nk’uko biteganywa n’ingingo ya 594 y’igitabo cy’amategeko ahana ibyaha mu Rwanda.

Panorama

Be the first to comment

Leave a Reply

Your email address will not be published.


*