Abaremewe inka si izo gushakamo urwagwa _Guverineri Gatabazi

Hon Gatabazi Jean Marie Vianney, Guverineri w'Intara y'Amajyaruguru (Ifoto/Raoul N.)

Ubwo yatangizaga amahugurwa y’iminsi itatu abera mu karere ka Musanze yo kurwanya imirire mibi, ariyo ntandaro yo kugwingira ku bana, Guverineri w’Intara y’Amajyaruguru yibajije abaturage niba inka bahabwa ari zo kunywa urwagwa.

Aya mahugurwa yateguwe n’impuzamiryango ishinzwe kurwanya imirire mibi, SUN Alliance, ku nkunga ya Minisiteri y’ububanyi n’amahanga y’Ubuholandi ibinyujije mu mushinga “Voice for change” wa SNV Rwanda;  yatangiye ku wa kane tariki ya 19 Nyakanga 2018 yitabiriwe n’abashinzwe ubuzima n’imibereho myiza mu turere twose tw’intara y’Amajyaruguru n’Umujyi wa Kigali, harimo kandi abashinzwe imirire mu bitaro bitandukanye byo muri utu turere ndetse n’abafatanyabikorwa batandukanye.

Ubwo Guverineri  Gatabazi JMV yatangizaga aya mahugurwa yibajije impamvu urugo rwahawe inka rugaragamo imirire mibi yibaza niba inka bahawe ariyo gushakamo amafaranga yo kunywa urwagwa.

Yagize ati “umuntu akama amata akayashyira mu kajerekani akayajyana mu ikaragiro, amafaranga akajya mu mufuka w’umugabo akava mu mufuka ajya mu kabari k’urwagwa, inka babahaye nizo kunywa urwagwa? Ni gute urugo rurimo inka rugaragaro imirire mibi?”

Gatabazi yavuze ko bagiye guhagurukira birushijeho ikibazo cy’imirere mibi ariyo ntandaro ahanini y’igwingira ry’abana, kuko iki kibazo kidasaba ingengo y’imari.

Ati “Kwigisha abantu kugaburira abana babo neza nago bisaba ingengo y;imari igisaba ingengo y’imari ni ukubaka ECDs, Ibigo mbonezamikurire y’abana bato. Mu kubaho neza k’umuntu hari ibiba byakozwe nk’isuku, ababyeyi bakipimisha bakanakurikiranwa mu gihe batwite; ibyo byose bikomeza kubaho nta kiguzi kuko tubibonera mu bukangurambaga bwa buri munsi.”

Dr Anitha Asiimwe, Umuhuzabikorwa wa gahunda y’igihugu yo kurwanya Ukugwingira mu bana, yasabye abitabiriye aya mahugurwa kongera kwibukiranya neza inshingano zabo, barushaho gukangurira abaturage  kwita ku nkingi z’imikurire y’umwana.

“Ndabasaba ngo mwongere musubire mwibukiranye inshingano zanyu, mubwire abaturage ko imikurire y’umwana iri mu maboko yabo, mubibutse kwita ku nkingi z’imikurire y’umwana kuva akiri mu nda kugeza avutse. Ni ikibazo kuko ubu cumin a gatandatu ku ijana by’abana bavuka, bavukana ibimenyetso byo kugwingira.” Dr Anitha Asiimwe

Dr Anitha yongeye gukebura ababyeyi bumva ko kuba ari bagufi bagomba kubyara umwana mugufi, bityo umwana yagwingira bakumva ko nta gikuba cyacitse.

Yagize ati “ababyeyi bumva ko ngo niba ndi mugufi umugore wange cyangwa umugabo wange na we ari mugufi, tugomba kubyara abana bagufi. Sibyo, kuko ku myaka ibiri abana bose baba bafite amahirwe angana yo gukura mu ndeshyo. Rero kubera iyo myumvire, hari abana bagwingira ababyeyi bakumva ko impamvu ari uko nabo ari bagufi.”

Ikibazo cy’igwingira ry’abana giteye inkeke igihugu dore ko imibare iheruka ya 2015 igaragaza ko 38% by’abana b’u Rwanda bagwingiye, gusa ngo hari ikizere ko mu mwaka wa 2024 uyu mubare uzaba ugeze byibura kuri 19% gusa.

Raoul Nshungu

Dr Anitha Asiimwe, Umuhuzabikorwa wa gahunda y’igihugu yo kurwanya Ukugwingira mu bana (Ifoto/Raoul N.)
Amahugurwa yitabiriwe n’abashinzwe ubuzima n’imibereho myiza mu turere twose tw’intara y’Amajyaruguru n’Umujyi wa Kigali, harimo kandi abashinzwe imirire mu bitaro bitandukanye byo muri utu turere ndetse n’abafatanyabikorwa batandukanye (Ifoto/Raoul N.)

Be the first to comment

Leave a Reply

Your email address will not be published.


*