Musanze: Abapolisi basoje amahugurwa y’ubunyamwuga n’ubuyobozi

Ku itariki ya 24 Nyakanga uyu mwaka, mu Ishuri rikuru rya Polisi y’u Rwanda (National Police College) riri mu karere ka Musanze, mu Ntara y’Amajyaruguru, hasojwe amahugurwa y’ubunyamwuga n’ubuyobozi mu bya gipolisi.

Abayitabiriye bose hamwe ni 26 harimo abapolisi bo ku rwego rwa Ofisiye 24 ndetse n’abacungagereza 2.

Mu gihe cy’amezi ane,  bahawe  ubumenyi buzabafasha kurushaho kuyobora neza abo bashinzwe ndetse no kumenya inshingano z’akazi muri rusange.

Bahawe kandi amasomo ajyanye n’uko akazi gasanzwe gakorwa umunsi ku wundi  hagamijwe kurushaho kukanoza.

Mu masomo bahawe harimo; kumenya no kurwanya ibyaha bitandukanye by’ikoranabuhanga n’ibindi, kumenya no kuyobora abakozi bashinzwe, gucunga neza ibikoresho by’akazi, imikorere n’imikoranire ya Polisi n’itangazamakuru, kubungabunga amahoro mu butumwa bw’amahoro, amategeko, kumenya imiterere y’isi n’ibiyiriho ku buryo bifasha mu gucunga umutekano, kubungabunga amahoro n’andi masomo.

Ubwo yasozaga ku mugaragro ayo mahugurwa, Umuyobozi Mukuru wa Polisi y’u Rwanda wungirije ushinzwe ubuyobozi n’abakozi, DIGP Juvenal Marizamunda, yashimiye abayitabiriye uko bitwaye.

Mu ijambo rye, yagarutse ku igenamigambi ry’imyaka itanu rya Polisi y’u Rwanda mu kunoza no kuzuza neza inshingano zayo; bityo basabwa kugira uruhare mu ishyirwa mu bikorwa ryayo.

Yakomeje ababwira ko gusoza amahugurwa ari intambwe nziza kubera ubumenyi bahawe, ariko kandi abibutsa ko ari n’intangiriro kuko bisaba kubushyira mu bikorwa mu kazi kabo ka buri munsi.

DIGP Marizamunda yasabye abasoje amahugurwa guhora bihugura hagamijwe kongera ubumenyi kugira ngo babashe kujyana n’aho isi igeze no guhangana n’ibyaha bitandukanye no gucunga umutekano muri rusange.

Yabasabye kandi kugira ubwitange mu kazi, gukunda igihugu, kuzana impinduka nziza mu kazi no guha agaciro mbere na mbere umutekano w’igihugu no gufata ibyemezo byatuma urushaho kubungwabungwa.

Aya ni amwe mu mahugurwa atandukanye atangwa n’ishuri rikuru rya Polisi (NPC), rikaba rinaha amasomo ba ofisiye bakuru (Senior Command and Staff Course) ku bijyanye n’ubumenyi mu by’ubuyobozi no gucunga abakozi ku rwego rwo hejuru.

Uyu muhango kandi wari witabiriwe n’abandi bayobozi bakuru muri Polisi y’u Rwanda barimo Umuyobozi w’iri shuri rya NPC, CP Felix Namuhoranye n’abandi bapolisi bakuru bayobora amashami atandukanye ya Polisi y’u Rwanda.

Abitabiriye ayo mahugurwa bashimiwe uko bitwaye bahabwa n’impamyabushobozi basabwa kuzakora neza akazi mu mirimo bashinzwe hirya no hino.

Inkuru dukesha Polisi y’u Rwanda.

Be the first to comment

Leave a Reply

Your email address will not be published.


*