Abakandida bigenga bane ni bo bemejwe kuzahatanira kwinjira mu Nteko

Prof Kalisa Mbanda, Perezida wa Komisiyo y'Igihugu y'amatora (Ifoto/Ububiko)

Kuri uyu wa mbere tariki ya 6 Kanama 2018, Komisiyo y’Igihugu y’Amatora yashyize hanze urutonde ndakuka rw’abahatanira kujya mu nteko ishinga amategeko. Mu bakandida bigenga bane ni bo buzuje ibisabwa, umwe we ntiyemejwe.

Komisiyo y’Igihugu y’Amatora (NEC) yatangaje ko mu bantu 539 batanze kandidatire zabo bashaka kwiyamamaza mu matora y’Abadepite ateganyijwe muri Nzeri 2018, abakandida 521 ari bo babyemerewe, abangiwe kubera kutuzuza ibisabwa bakaba 18.

Mu bakandida bigenga, bane bemejwe barimo Ntibanyendera Elissam Salim, Sebagenzi Ally Hussein, Mpayimana Philippe uherutse kwiyamamariza umwanya wa Perezida wa Repubilika ariko agatsindwa, hakaba kandi na Nsengiyumva Janvier. Ntakaburimvano Théodore we yarangiwe kuko atujuje ibisabwa.

Mu bakandida batanzwe n’imitwe ya politiki hemejwe 302, aho mu Muryango FPR-Inkotanyi, PL, PSD abatanzwe bose bemewe.

Mu ishyaka riharanira Demokarasi no kurengera ibidukikije (DGPR), abakandida 34 ryatanze, babiri ntibemerewe kwiyamamaza. PS-Imberakuri yatanze abakandida 45, icyenda ntibemererwa.

Mu gutangaza urutonde rw’agateganyo, Umuyobozi w’ishyaka PS Imberakuri, Christine Mukabunani ntiyari yagaragaye ku rutonde rw’agateganyo kubera kubura amafoto, ariko ku rutonde ntakuka yajeho.

Mu byiciro byihariye, mu rubyiruko hatanzwe kandidatire 32, hemerwa 26. Mu bafite ubumuga hatanzwe kandidatire 10 bose ziremerwa, kuko no kuri lisiti y’agateganyo bo bari baruzuje ibyangombwa byabo. Mu bifuza guhagararira abagore hemejwe abakandida 179.

Muri abo bagore harimo 23 bo mu Majyaruguru, 62 bo mu majyepfo, 39 Iburasirazuba, 39 Iburengerazuba na 16 bo mu mujyi wa Kigali.

Perezida wa Komisiyo y’amatora, Prof Kalisa Mbanda yavuze ko ugereranyije n’amatora y’abadepite yo mu mwaka wa 2013, abakandida uyu mwaka babaye benshi.

Mu mwaka wa 2013, abatanze kandidatire bari 441 hemezwamo 410 muri bo abagore bari 221 bangana na 50 ku ijana. Muri uyu mwaka hatanzwe kandidatire 539 hemezwa 521, muri bo abagore ni 326 bangana na 60 ku ijana.

Ibikorwa byo kwiyamamaza bizatangira ku wa 13 Kanama kugeza ku wa 1 Nzeri 2017. Amatora ateganyijwe ku wa 2 Nzeri 2018 ku Banyarwanda batuye muri Diaspora na ho abari imbere mu gihugu bazazindukira mu matora ku wa 3 Nzeri 2018. Ku wa 4 Nzeri hazaba amatora yo mu byiciro byihariye bigizwe n’abagore, urubyiruko n’abahagarariye abafite ubumuga.

Panorama

Be the first to comment

Leave a Reply

Your email address will not be published.


*