PSD yibukije abanyarubavu ko kwita ku mutekano aribyo bizabazamurira ubukungu

Dr Vincent Biruta, Perezida wa PSD na Hon Hindura Jean Pierre uhagarariye PSD mu ntara y'Iburengerazuba (Ifoto/Munezero)

 

Ishyaka riharanira demokarasi n’imibereho myiza y’abaturage PSD, ubwo ryiyamamarizaga mu karere ka Rubavu ku wa 18 Kanama 2018, ryasabye abaturage gukomeza gushyira imbaraga mu kubungabunga umutekano, kuko ari byo bizabafasha kuzamura ubukungu bakiteza imbere.

Dr. Vincent Biruta, Perezida wa PSD, yasabye abanyarubavu amajwi ababwira ko bagomba gutora PSD, ariko abibutsako atabatumye gukoresha inama nk’izo kuko bigira uburyo bikorwamo. Agira ati “Simbatumye gukoresha inama, ariko kubiganiraho n’abandi ntacyo bitwaye. Twizeye ko mutazadutenguha.”

Hon. Nyirahirwa Veneranda, Visi Perezida wa kabiri wa PSD akaba no ku rutonde rw’abadepite b’iryo shyaka, yakanguriye abaturage b’i Rubavu kubungabunga umutekano, ahereye ku mateka yaranze ako gace bitewe n’abatariyumvamo ubunyarwanda ahubwo bakibona mu iturufu y’amoko.

Agira ati “Mugomba kwita ku mutekano wanyu, kandi PSD twifuza ko Ndi Umunyarwanda yashyirwamo imbaraga kugira ngo mutazongera kurara mwiruka, munyagirwa, mwicwa n’inzara kandi mwarahinze mukeza.”

Ikindi cyagarutsweho ni uko PSD ishaka ko umusaruro w’ibirayi wiyongera, bakagezwaho inyongeramusaruro ku gihe, kandi umusarruro wabo ntupfe ubusa cyangwa ngo wangirike kuko uruganda rutunganya ibirayi rugomba gukora uko bikwiye kandi bakazashyiraho na banki iha inguzanyo abahinzi.

Banavuze ko mu rwego rwo kurengera inyungu z’umuhinzi hazashyirwaho amakusanyirizo y’ibirayi acungwa n’abahinzi ubwabo, kandi amakoperative y’abahinzi akongererwa ubushobozi.

Icyagarutsweho ni uko babwiye abanyarubavu ko ibyo byose bitagerwaho badafite ubutekano kuko ariryo pfundo ry’ubukire bwabo.

Munezero Jeanne d’Arc

Abayobozi n’abakandida ba PSD basuhuza abaturage b’i Rubavu (Ifoto/Munezero)
Abayoboke ba PSD b’i Rubavu bashyiraho morale (Ifoto/Munezero)
Abayoboke ba PSD mu kwiyamamaza i Rubavu (Ifoto/Munezero)
Abarwanashyaka ba PSD i Rubavu bitabiriye mitingi yo kwamamaza abakandida depite (Ifoto/Munezero)

Be the first to comment

Leave a Reply

Your email address will not be published.


*