PSD yijeje abatuye Umujyi wa Huye kuvugurura igishushanyo mbonera cyawo

Abarwanashyaka ba PSD mu bikorwa byo kwiyamamaza mu karere ka Huye (Ifoto/Munezero)

Ishyaka riharanira demokarasi n’imibereho myiza y’abaturage –PSD, ubwo ryekerekanaga abakandida depite baryo mu karere ka Huye, ryijeje abaturage kugira uruhare bakora ubuvugizi mu kuvugurura igishushanyo mbonera cy’uwo mujyi buri wese akacyibonamo.

Ku wa 26 Kanama 2018, abakandida depite ba PSD biyamamarije mu murenge wa Ngoma, Akarere ka Huye kuri Sitade Kamena, aho ibiganiro byatanzwe byibanze ku iterambere ry’ubukungu, bizajyana no gutunganya Umujyi wa Huye.

Ibi byagarutsweho na Hon. Nyirahirwa Veneranda, Visi Perezida wa kabiri wa PSD, akaba no ku rutonde rw’abakandida depite b’iryo shyaka, abizeza gukora ubuvugizi mu gukora igishushanyo mbonera cy’Umujyi wa Huye, aho buri muturage wese azacyibonamo.

Ikindi Nyirahirwa yagarutseho ni uguteza imbere ubuhinzi n’ubworozi ariko cyane cyane babyaza umusaruro uhagije ibishanga bya Rwasave na Rwabuye. Mu guteza imbere ubworozi yavuze ko bazashyiraho gahunda yo gukwirakwiza amatungo magufi hirya no hino mu gihugu, kuko agoboka umuturage vuba agashobora gukemura ibibazo byoroheje afite, kandi na none bigetarwa n’uko abaturage benshi bafite amasambu mato byaborohera korora amatungo magufi.

Dr Vincent Biruta, Perezida wa PSD aganira n’itangazamakuru yavuze ko imyaka itanu iri imbere yubakira ku bindi byagezweho ariko igihugu ntigishobora kurangiza ibyo cyagezeho mu myaka itanu gusa.

Agira ati “Igihugu nticyavuga ko cyageze ku byo cyifuza byose, iteka ryose haba hari indi ntambwe iba ikeneye guterwa […], tureba ibyagezweho twari twarifuje, tukareba n’indi ntambwe dukeneye gutera.”

Dr Biruta avuga ko nta mwihariko w’akarere runaka kuko abadepite dutora ari abadepite b’igihugu buri karere kagomba kwibona muri gahunda zose, kandi harebwa inking iterambere rigomba kubakirwaho.

Avuga kandi ko ubuhinzi n’ubworozi ari inking ikomeye y’ubukungu, akaba ariyo mpamvu bifuza ko abaturage bagomba kubanza kwihaza mu biribwa.

Mutirende Goretti ni umuturage wo mu karere ka Huye, avuga ko PSD ikwiye gufasha abagore na bo bakiteza imbere kandi bakazagaruka kugira ngo baganire bajye banabatuma. Asaba ubuvugizi kugira ngo bajye babonera ifumbire igihe, kandi bakangurire abagore gukorana n’amabanki.

Abatuye Akarere ka Huye basabwe guha amajwi PSD, kugira ngo gahunda babateganyirije zizashobore gushyirwa mu bikorwa, bakaba basabwe kuba intumwa z’abandi batashoboye kugera aho PSD yiyamamarizaga.

Abadepite 24 ni bo bitabiriye ibikorwa byo kwiyamamaza mu karere ka Huye muri 65 bari ku rutonde rw’iri shyaka.

Munezero Jeanne d’Arc

Dr Vincent Biruta, Perezida wa PSD (Ifoto/Munezero)
Hon. Nyirahirwa Veneranda, Visi Perezida wa kabiri wa PSD (Ifoto/Munezero)
Sen Dr. Ntawukuriryayo Jean Damascene aganira n’Umuyobozi w’Akarere ka Huye Sebutege Ange (Ifoto/Munezero)
Dr Vincent Biruta na Dr Jean Chrysotome Ngabitsinze, Umunyamabanga Mukuru wa PSD ari na we uyoboye urutonde rw’abakandida depite b’iryo shyaka (Ifoto/Munezero)

Abakandida depite ba PSD biyeretse abaturage (Ifoto/Munezero)
Sen. Niyongana Gallican asuhuza abaturage (Ifoto/Munezero)
Sebutege Ange, Umuyobozi w’Akarere ka Huye (Wicaye hagati ya Dr Biruta na Dr Ntawukuriryayo) yakiriye PSD yaje kwiyamamariza mu karere ayobora (Ifoto/Munezero)
Abarwanashyaka ba PSD bitabriye ibikorwa byo kwiyamamaza ari benshi (Ifoto/Munezero)
Umuyobozi w’Akarere ka Huye, Sebutege Ange, yahaye ikaze ishyaka PSD (Ifoto/Munezero)

Be the first to comment

Leave a Reply

Your email address will not be published.


*