Nyagatare: Urubyiruko rwasabwe gutanga amakuru ku bakoresha n’abakwirakwiza ibiyobyabwenge

Urubyiruko rwo mu karere ka Nyagatare rwiganjemo abakorerabushake n’abanyeshuri bo mu mashuri yisumbuye, basabwe gutangira amakuru ku gihe ku bantu bakoresha ibiyobyabwenge ndetse n’abagira uruhare mu kubicuruza.

Mu biganiro uru rubyiruko rwahawe mu mpera z’icyumweru gishize nyuma y’urugendo rwitabiriwe n’abakorerabushake bo mu karere ka Nyagatare  n’abanyeshuri  bo  mu bigo by’amashuri yisumbuye birimo Urwunge rw’amashuri rwa Nyagatare n’ishuri rizwi ku izina rya Bright Academy  riherereye muri aka karere.

Mu kiganiro cye, Umuyobozi wayo mu karere ka Nyagatare Senior Superintendent of Police (SSP) Pierre Tebuka, yasabye urubyiruko kwirinda gukoresha no gukwirakwiza ibiyobyabwenge,  batanga amakuru ku bantu bagira uruhare mu kubinywa no kubikwirakwiza.

SSP Tebuka yagize  ati “Urubyiruko nimwe  mwibasiwe cyane n’ibiyobyabwenge muri iki gihe, turabasaba gutangira amakuru ku gihe ku bantu muzi bacuruza cyangwa bakoresha  ibiyobyabwenge kugira ngo bafatwe babihanirwe.”

Umuyobozi w’akarere wungirije ushinzwe imibereho myiza y’abaturage mu karere ka Nyagatare Murekatete Juliet, yavuze ko hari ingamba  kafashe  zigamije kurwanya ibiyobyabwenge mu rubyiruko bahereye ku rwego rw’imidugudu.

Yagize ati “Urubyiruko rwo hasi mu midugudu usanga ari rwo rwibasiwe cyane n’ibiyobyabwenge, kandi rukunda imyidagaduro na siporo, twateguye  irushanwa ry’umupira w’amaguru mu midigudu, n’utugari   bizadufasha kurugezaho ubu butumwa byoroshye”.

Bonane Emmanuel, uhagarariye urubyiruko rw’abakorerabushake mu karere ka Nyagatare yavuze ko nk’urubyiruko bishimiye ibiganiro bahawe n’abayobozi.  Yanavuze ko n’ubwo umubare munini ari uw’urubyiruko rukoresha ibiyobyabwenge, atari rwo rubicuruza, asezeranya ko bagiye kujya batangira amakuru ku gihe ku bantu bakekwaho gucuruza no gukoresha ibiyobyabwenge.

Nyuma y’uru rugendo rwakurikiwe n’ibiganiro ku kurwanya ibiyobyabwenge, hakurikiyeho igikorwa cyo gutwikano kumena  amoko atandukanye y’ibiyobyabwenge n’inzoga zitemewe mu Rwanda.

Hamenwe amakarito 892 y’inzoga yo mu bwoko bwa Zebra Gin, Kanyanga litiro 77, Amakarito 45 y’inzoga ya Zebra Waragi ndetse n’amakarito 08 y’inzoga izwi ku izina rya  Kambuca hanatwikwa ibiro 45 by’urumogi. Ibi byose byafashwe mu kwezi kumwe bifatirwa mu mirenge itandukanye igize akarere ka Nyagatare, bifatanwa abantu 150.

Panorama

Be the first to comment

Leave a Reply

Your email address will not be published.


*