Musanze: Abaturage bakanguriwe kurwanya amakimbirane mu miryango

Hon Gatabazi Jean Marie Vianney, Guverineri w'Intara y'Amajyaruguru.

Ku wa 11 Nzeri  2018, Polisi y’u Rwanda ikorera mu karere ka Musanze ku bufatanye n’ubuyobozi  bw’Intara y’Amajyaruguru  basuye inteko z’abaturage bo mu mirenge ya Cyuve na Kinigi yose yo mu karere ka Musanze.

Muri ibi biganiro abayobozi basabye abaturage  kurwanya ikintu cyose cyateza amakimbirane mu miryango, ayanabaye bakihutira kuyakemura nta muturage uyaguyemo cyangwa ngo ayakomerekeremo.

Nk’uko tubikesha Polisi y’u Rwanda, mu murenge wa Cyuve ibi biganiro byari byitabiriwe n’umuyobozi wa Polisi mu karere ka Musanze SP Patrick Butera ndetse na Guverineri w’Intara y’Amajyaruguru, Hon.  Gatabazi Jean Marie Vianney.

Guverineri Gatabazi  yasabye abaturage kujya baharanira kurwanya icyatuma mu miryango hagaragaramo amakimbirane. Yagaragaje ko akenshi amakimbirane mu miryango akunze guturuka ku kutumvikana ku mikoresherezwe y’imitungo, abasaba kujya babana mu buryo bwemewe n’amategeko kandi bakimakaze umuco nyarwanda.

“Akenshi amakimbirane mu miryango aturuka ku mitungo y’umuryango, turabasaba kujya mubanza gusezerana imbere y’amategeko kandi mugire urukundo mu miryango.”

Yakomeje asaba abaturage n’abayobozi ku nzego z’ibanze kujya bihutira ku menya imiryango ifitanye ibibazo, bikemurwe nta muntu urabisigamo ubuzima.

“Turasaba ko guhera mu midugudu mwazajya mumenya imiryango ifitanye ibibazo mubikemure hakiri kare, ibibananiye mubigeze kuzindi nzego zisumbuye ariko ntihazagire umuntu wica undi cyangwa ngo amukomeretse.”

Mu kiganiro cyatanzwe n’umuyobozi wa Polisi mu karere ka Musanze Superitendent of Police (SP) Patrick Butera yasabye abaturage kurwanya ibiyobyabwenge kuko nabyo bikunze kuba intandaro y’amakimbirane mu miryango.

Yagize ati “Uyu murenge wa Cyuve ni inzira icishwamo ibiyobyabwenge, turabasaba kugira uruhare mu kubirwanya mutanga amakuru y’abantu babicuruza n’ababikoresha.”

Abaturage biyemeje ko bagiye gushyira mu bikorwa inama zose bagiriwe, kandi batangira amakuru ku gihe ku kintu cyose cyashaka guhungabanya umutekano w’igihugu.

Kuri uyu munsi kandi  ibiganiro nk’ibi  byanabareye mu murenge wa Kinigi mu kagari ka Nyabigoma mu mudugudu wa Nyakikina. Umuyobozi wa Polisi mu murenge wa Kinigi Assistant Inspector of Police (AIP) Jean Pierre Karegeya yasabye abaturage  kwirinda gukoresha ibiyobyabwenge  ahbwo bakagira uruhare mu kubirwanya  byo ntandaro y’ibindi byaha byose.

Yasabaye abaturage gukomeza ubufatanye n’iznego z’umutekano mu kurwanya ibyaha batangira amakuru ku gihe.Abaturage banakanguriwe kwitabira gahunda za leta nko kwitabira gutanga umusanzu w’ubwisungane mu buzima ndetse n’izindi gahunda ibagenera zigamije kubateza imbere mu mibereho  yabo.

Panorama

Be the first to comment

Leave a Reply

Your email address will not be published.


*