UNIK yiyemeje kongera imbaraga binyuze mu bakozi bayo n’abayizemo

Binyuze muri UNIK Association, hitezwe imbaraga zo kuzamura ubushobozi ndetse n’ireme ry’uburezi muri Kaminuza ya Kibungo –UNIK, abayizemo ndetse n’abakozi bahabwa umwanya wo kuba abanyamuryango no kujya mu nzego zayo zifata ibyemezo.

Ibi bizafasha kaminuza ya Kibungo kunguka amaboko mashya azinjira mu ishyirahamwe ryayishinze, UNIK Association, bizatuma abakozi barushaho kugira Kaminuza iyabo, kandi abayizemo basaga ibihumbi umunani na bo bashoboye kuba abanyamuryango byaba ari imbaraga ku kuzamura ubushobozi n’ireme ry’uburezi, hakiyongeraho no kurushaho kubaka izina mu gihugu ndetse no mu karere.

Nk’uko bitangazwa na Gasasira Janvier, Perezida w’Inama y’Ubuyobozi ya UNIK akaba ari na we uyihagarariye mu rwego rw’amategeko, abakozi b’iyo Kaminuza ndetse n’abayizemo n’imbaraga zitagomba kwirengagizwa.

Agira ati “Dufite abanyeshuri barangije hariya bagera ku bihumbi umunani, ariko tugize Imana bose baza. Kaminuza ni umuryango […] twakira benshi barimo abakozi bayo, abaharangije n’abandi babyifuza. Ni imbaraga rero. Kaminuza nyinshi zo ku isi zagiye zigira ibibazo, zagiye zibikurwamo n’abazizemo.”

Akomeza avuga ko Kaminuza yateye intambwe nziza kuko ubu UNIK iri muri kaminuza za mbere zemewe n’Inama Nkuru ishinzwe uburezi (HEC) ziri mu rwego rwa mbere, bafitanye kandi amasezerano na Minisiteri y’ubuhinzi n’ubworozi mu gutubura imbuto ndetse bafitanye n’andi na Diyosezi ya Kibungo n’intara y’Iburasirazuba mu mikoranire n’uturere.

Umuyobozi wa UNIK, Prof. Egide Karuranga Gahima,  atangaza ko abafatanyabikorwa ba mbere ari abakozi ndetse n’abize muri iyo kaminuza kandi kubakira ari ukwagura amarembo.

Agira ati “Abize iwacu bagomba kugaruka muri kaminuza kuko nibo bazana ubunararibonye kugira ngo itere imbere. N’abakozi rero ni kimwe kuko akora neza iyo ashoye imari mu byo akora. Turakira abafatanyabikorwa banyuranye barimo n’uturere…”

Mutagarama Jean Nepomuscene ni umwe mu bize muri UNIK, avuga ko ishuri yizemo yifuza ko ryatera imbere na we abigizemo uruhare. Agira ati “Kuba umunyamuryango bizampa umwanya wo gutanga ibitekerezo kugira ngo rirusheho gutera imbere kurushaho, kuko ryafashije benshi batuye mu gace rikoreramo bagashobora gutera intambwe mu kwiga kamunuza kandi batavunitse.”

Mushirarungu Dedite yize muri UNIK ariko ubu ni Umukozi muri iyo kaminuza, muri serivisi y’ubujyanama ku banyeshuri. Yemerewe kuba umunyamuryango wa UNIK Association. Avuga ko yishimiye kwakirwa kuba umunyamuryango aho yize.

Agira ati “Uretse kuba narahize kandi nkanahabwamo akazi, nishimiye kuba aho nize ngiye kuhatanga umusanzu w’ibitekerezo n’ubushobozi. Iyi kaminuza iyo itaza muri aka gace, ndahamya ko abantu benshi bahatuye batari bushobore kwiga bakaminuza biboroheye. Ni ahacu rero kuyishyigikira igatera imbere.”

Kaminuza ya Kibungo imaze kurangizamo abarenga ibihumbi umunani, muri serivisi ziri mu ntara y’Iburasirazuba bavuga ko abanyuze muri iyo kaminuza barenga mirongo itanu ku ijana. Inteko rusange isanzwe ya UNIK yo ku wa 15 Nzeri 2018, yemeje ko hagomba kuba inteko rusange idasanzwe ku wa 30 Nzeri 2018, hakazaba amatora ya Komite Nyobozi, abafatanyabikorwa bashya cyane cyane abizemo bakaba bagamagarirwa kugira uruhare muri ayo matora kandi bagahatanira kujya mu nzego zayo zifata ibyemezo.

Rwanyange Rene Anthere

Bamwe mu bagize Komite Nyobozi icyuye igihe ya UNIK bitabiriye inama y’Inteko rusange ku wa 15 Nzeri 2018 (Ifoto/Panorama)
Abanyamuryango ba UNIK Association mu nama y’inteko rusange isanzwe ku wa 15 Nzeri 2018 i Rwamagana (Ifoto/Panorama)
Abanyamuryango ba UNIK Association mu nama y’inteko rusange isanzwe ku wa 15 Nzeri 2018 i Rwamagana (Ifoto/Panorama)

 

Be the first to comment

Leave a Reply

Your email address will not be published.


*