Kigali: Abantu basaga 800 baritabira Inama Nkuru ya PAM

Hon Musoni Protais, Umuyobozi w'Umuryango Uharanira Kwigira no Kwihesha Agaciro kw’Abanyafurika (PAM: Pan-African Movement) ishami ry’u Rwanda (Ifoto/TNT)

Abantu basaga magana inani (800) kuri iki cyumweru tariki ya 23 Nzeri 2018, baritabira Inama Nkuru ya kabiri y’Umuryango Uharanira Kwigira no Kwihesha Agaciro kw’Abanyafurika (PAM: Pan-African Movement) ishami ry’u Rwanda. Iyi nama irateranira mu ngoro y’Inteko Ishinga Amategeko ku Kimihurura.

Nk’uko byatangajwe n’Umuyobozi wa PAM-Rwanda, Hon Musoni Protais, iyi nama irahuza abanyarwanda ndetse n’abandi batumirwa baturutse hirya no hino ku Isi. Izaba yiga ku ngingo zitandukanye zirimo no kwemeza gahunda y’ibikorwa mu myaka itatu iri imbere, ikazasozwa n’amatora y’abagize Komite Nyobozi mu ishami ry’u Rwanda.

Nk’uko tubikesha Ikinyamakuru The NewTimes, mu kiganiro Umuyobozi wa PAM Rwanda aherutse kugirana n’itangazamakuru, yagize ati “Uyu ni umwanya wo kuzungurana ibitekerezo kuri gahunda y’ibikorwa y’imyaka itatu n’uburyo bwakoreshwa kugira ngo Umuryango Uharanira Kwigira no Kwihesha Agaciro kw’Abanyafurika utere imbere, ndetse abanyarwanda n’abandi banyafurika bakarushaho kuwugira uwabo.”

Indangagaciro z’Umuryango Uharanira Kwigira no Kwihesha Agaciro kw’Abanyafurika kimwe n’indi miryango igaragara kuri uyu mugabane ni uguteza imbere ukwigira, ubufatanye, ubumwe no kwihesha agaciro tutirengagije no kugera ku iterambere rirambye.

Muri iyi nama kandi hazarebwa n’ibyagezweho mu myaka ishize n’uburyo hanozwa inzira zo kurangiza neza ibigikomeza.

Nk’uko byakomeje bitangazwa na Hon. Musoni, mu myaka itatu ishize, PAM Rwanda yashoboye kubaka inzego zayo kuva ku rwego rw’igihugu kugeza ku rwego rw’akarere, hanashingwa amashami yihariye mirongo ine n’atanu (45) muri za Kaminuza n’amashuri makuru.

Akomeza atangaza ko hanashyizweho za Komisiyo mu nzego nkuru zitandukanye, mu madini n’amatorero, imiryango ya sosiyete sivile, amasendika y’abakozi, mu mitwe ya politiki n’ahandi.

Nk’uko bigarukwaho na Hon. Semasaka Gabriel, Komiseri ushinzwe ubukungu n’ubucuruzi muri PAM Rwanda, mu bashyitsi bategerejwe kuri uyu munsi harimo abagarariye urubyiruko kandi bafitemo umubare ugaragara.

Agira ati “Turateganya kuzakira urubyiruko rusanga magana atatu hamwe n’ababahagarariye. Abo barimo abavuye muri za Kaminuza n’izindi nzego z’urubyiruko zitandukanye ziri hirya no hino mu gihugu. Twizera ko urubyiruko rukeneye izi ndangagaciro kurusha abandi bantu bakuze.”

Abitabira iyi nama barimo abaybozi bakuru b’igihugu, abayobozi b’intara n’uturere, abahagarariye PAM Rwanda mu bigo binyuranye, abaturutse mu turere, abandi batumirwa baturutse hirya no hino.

Panorama

Be the first to comment

Leave a Reply

Your email address will not be published.


*